1 Ayi 8 - Chiyawo Bible

Akulijigalila Libokosi lya Cilanga ku Nyumba ja AMBUJE

¹ Kaneko Mwenye Solomoni ŵaŵilasile acakulungwakulungwa ŵakulongolela ngosyo, ni maŵasa ga Aisalaeli wosope, kuti ayice ku Yelusalemu, kujigala Libokosi lya Cilanga ca AMBUJE* kutyocela ku Siyoni,* msinda wa Daudi, kuja nalyo ku Nyumba ja AMBUJE.

² Nipo Aisalaeli ŵasongene pameso pa Mwenye Solomoni pa lisiku lyakutenda cindimba ca masakasa,* m'mwesi wa Etanimu, wele uli mwesi wa msano ni kaŵili.

³ Piŵayikangene acakulungwakulungwa ŵala, ŵakutaga mbopesi ŵanyakwile Libokosi lya Cilanga ni ŵalijigalile ku Nyumba ja AMBUJE.

⁴ Alefi ni ŵakutaga mbopesi ŵajigele soni citenti ca kusimanilana ni yida yosope yiyaliji mwelemo kuja nayo ku Nyumba ja AMBUJE.

⁵ Mwenye Solomoni ni ŵandu wosope ŵa ku Isalaeli, ŵaŵasongene pameso pakwe, ŵajimi pasogolo pa Libokosi lya Cilanga ŵatasile mbopesi ngondolo ni ng'ombe syangawanika.

⁶ Ŵambopesi ŵayice nalyo Libokosi lya Cilanga ku Nyumba ja AMBUJE ni ŵaliŵisile mcipinda ca mkati ca Nyumba ja AMBUJE, ŵaliŵisile kusi kwa mapapiko ga akelubi.

⁷ Mapapiko gamatambasukule ga akelubiwo galiwunicile libokosilyo pamo ni mbiko syakwe syakunyakulila.

⁸ Mbiko syakunyakulilasyo syaliji mkuwonecela kwa mundu jwalijose juŵatemi mwakulolegana ni mlango ŵa cipinda ca mkati ca Nyumba ja AMBUJE, nambo nganisiwonecelaga kwa mundu juŵatemi kumbali. Mbiko syakunyakulilasyo sili ciŵela m'momo mpaka lelo jino.

⁹ Mwibokosimo mwaliji mwana mawubawo gaŵili ga maganga gaŵaŵisile Mose* ali Kwitumbi lya Sinayi, kwele AMBUJE ŵatesile cilanga* ni ŵandu ŵa ku Isalaeli, jemanjajo ali akopwece ku cilambo ca Iguputo.

¹⁰ Piŵakopwece ŵakutaga mbopesi mcipinda ca mkati ca Nyumba ja AMBUJE kula, liwunde lyagumbele m'Nyumba ja AMBUJE.

¹¹ Nipo ŵakutaga mbopesi ŵalepele kutumicila masengo gawo, ligongo lya liwundelyo ni kumelemenda kwa lilanguka lya lumbili lwa AMBUJE.

¹² Mwenye Solomoni ŵapopesile ŵatite, “Ŵalakwe AMBUJE, asagwile kutama mwiwunde ni mcipi.

¹³ Nambo sambano nataŵile ŵalakwe nyumba jakucimbicika, malo gakuti atameje ŵalakwe kwa yaka yosope.”

Maloŵe giŵaŵecete Solomoni kwa ŵandu ŵakwe

¹⁴ Ŵandu wosope ŵa ku Isalaeli ali cimile, Mwenye Solomoni ŵagalawucile ŵanduwo ni ŵajaliwasisye.

¹⁵ Mwenyewo ŵatite, “Acimbicikwe AMBUJE Mlungu jwa Aisalaeli, jwele kala ŵakopwesye ŵandu ŵakwe ku Iguputo. Nipo panyuma pakwe ŵasunjile cilanga cakwe cakwaŵika baba ŵangu Daudi kuŵa mwenye jwa Aisalaeli.

¹⁶ ‘Myoyo AMBUJE ŵasasile soni kuti, nganasagula msinda uliwose mcilambo cosope ca Isalaeli, wakuti ŵandu ataŵe nyumba jakuti ampopeleje Jwalakwe.’ ”

¹⁷ “Baba ŵangu Daudi ŵakwete nganisyo mu mtima mwawo syakuti ataŵe nyumba jakwapopelela AMBUJE Mlungu jwa Aisalaeli.

¹⁸ Nambo AMBUJE ŵasalile baba ŵangu Daudi kuti, ‘Mwatesile cenene ganisya mu mtima mwenu yakundaŵila nyumba jakumbopelela une.

¹⁹ Nambo ngaŵa m'mwejo ŵatimundaŵile nyumbajo, nambo mwanace jwenu msyesyene, ni jutacindaŵila nyumba jakumbopelela une.’

²⁰ “Sambano AMBUJE ayitesile yindu yiŵaŵisile cilanga yila. Pakuŵa une ni junjinjile ucimwene m'malo mwa baba ŵangu, nipo ngwalamulila ŵandu ŵa ku Isalaeli. Nipo kweli une ni jundaŵile Nyumba jakwapopelela AMBUJE Mlungu jwa Aisalaeli.

²¹ Nipo m'Nyumba ja AMBUJEJO mbisile malo gakuŵika Libokosi lila, mugali ma ubawo gaŵili ga maganga ga malembe Cilanga ca AMBUJE, gaŵapele acinangolo ŵetu, pa ndaŵi jiŵakopwesye ku Iguputo.”

Lipopelo lya Solomoni

²² Solomoni ŵajimi pasogolo pa malo gakupelecela mbopesi, ŵandu wosope ŵa ku Isalaeli ŵiŵasongene ali mkulola, nipo ŵanyakwile makono gakwe kwinani.

²³ Nipo ŵapopesile kuti, “Ŵalakwe AMBUJE Mlungu jwa Aisalaeli, pangali mlungu jwine jwakulandana ni ŵalakwe, kwinani atamose pa cilambo ca pasi. Ŵalakwe akusunga cilanga ni kulosya cinonyelo cangamala, kwa ŵandu ŵakwenda m'matala genu ni kumpikanila ni mtima wawo wosope.

²⁴ Ŵalakwe ayitesile yindu yiŵasalile baba ŵangu Daudi, akwanilisye maloŵe gawo, mpela muyikuwonecela lelo jinomu.

²⁵ Ni sambano ŵalakwe AMBUJE Mlungu, jwa Aisalaeli, ngwaŵenda kuti asunje soni cilanga cine ciŵaŵisile kwa baba ŵangu, cakuti ndaŵi syosope tacipatikana mundu jwa mwiŵasa mwa baba ŵangu jwakwinjila ucimwene wa Isalaeli, nabola ŵanacewo aŵe ŵakwapikanila ŵalakwe, mpela muŵatendele baba ŵangu Daudi.

²⁶ Ni sambano ŵalakwe Mlungu jwa Aisalaeli, ngwaŵenda kuti yosope yiŵaŵecete ni baba ŵangu Daudi, ŵakutumicila ŵenu, yitendekwe.

²⁷ “Ana yakuwona kuti ŵalakwe Mlungu akukomboleka kutama pa cilambo capasi? Ligongo atamose kwinani kosope ngikukukwanila kutama ŵalakwe, nambi tikombolece uli ŵalakwe kukwanila m'Nyumba jindaŵileji?

²⁸ Nambo ŵalakwe AMBUJE Mlungu jwangu, alipikane lipopelo ni kuŵenda kwangu, kungupeleka une jwakutumicila jwawo, kwa ŵalakwe lelo jino.

²⁹ Jeleji ni Nyumba jajisagwile ŵalakwe, kuti ŵandu ŵalambileje mwelemo. Ajilondeleje Nyumbaji cilo ni musi. Nipo ambikane kingupopela ndili mkulola ku Nyumba jeleji.

³⁰ Agapikane mapopelo gangu ni soni mapopelo ga ŵandu ŵenu Aisalaeli, ndaŵi jakupopela pa malo agano. Agapikane kwinani kwakutamako, nipo pitagapikanepo, conde atukululucile ulemwa* ŵetu.

³¹ “Naga mundu akumlemwecesya mjakwe, nakumsalila kuti alumbile, naga akwika kulumbila* pasogolo pa malo genu gakupelecela mbopesi m'Nyumba jino, kulosya kuti nganalemwa,

³² ŵalakwe AMBUJE apikane kwinaniko, nipo ŵalamwile ŵakutumicila ŵawo. Jwakulemwa ampe cilango cakwenela ni kulemwa kwakweko. Nipo jwangalemwajo amlamule kuti jwangali magambo.

³³ “Naga amagongo akwapunda pa ngondo, ŵandu ŵenu Aisalaeli ligongo lyakuti ŵamlemwecesye, nipo panyuma pakwe akuwujila soni kwa ŵalakwe ni kulilumba lina lyawo, naga akwika kukupopela ni kwaŵenda ŵalakwe kuti ŵakululucile, m'Nyumba jino,

³⁴ ndaŵi jelejo conde AMBUJE, ŵapikane kwinaniko. Mkululucile ulemwa wa ŵandu ŵenu Aisalaeli, ni myice nawo ku cilambo cimwacipelece kwa acinangolo ŵawo.

³⁵ “Naga ula akujilekasya ŵalakwe kugwa, ligongo lyakuti ŵandu ŵalemwecesye ŵalakwe, naga akupesya ni kuleka ulemwa wawo, panyuma pakwe akupopela ni kulilumba lina lya ŵalakwe, ali mkulola ku Nyumba ajino,

³⁶ ndaŵi jelejo conde AMBUJE, ŵapikane kwinaniko. Awukululucile ulemwa wa mwenye ni wa ŵandu ŵa ku Isalaeli. Ŵalakwe ŵajiganye ŵanduwo kutenda yindu yambone. Nipo conde, ŵagwicisye ula pa cilambo cenu, cimwacipelece kwa ŵandu wenu kuti ciŵe cawo kwa yaka yosope.

³⁷ “Naga mcilambomo mukwinjila sala, cilwele cakogoya, kapena mbeju sikumula ni mbungo ja mtukuta, kapena sikukola cimbulukuku, kapena sikonasika ni sombe kapena ni yiwungu, mwine amagongo akwasawusya mu msinda wawo wine uliwose, kapena ulwele wine uliwose,

³⁸ agapikane mapopelo gawo, naga mundu jwalijose jwa ŵandu ŵenu Aisalaeli, akupopela mwakwadandawulila ŵalakwe kutyocela pasi pa mtima ŵakwe, nipo akunyakula makono gakwe ali mkulosya ku Nyumba jino,

³⁹ ndaŵi jelejo conde AMBUJE, ŵapikane ŵandu ŵawo kwinani kwakutamako, mpela mwele mwakutamila umi wakwe mundu jwalijose, ni mwaŵelele mkati mwa mtima wakwe. Pakuŵa ŵalakwe akumanyilila yili mkati mwa mtima mwa mundu jwalijose.

⁴⁰ Kuti ŵandu ŵenu aŵe ŵakumpikanila ndaŵi syosope syakutama mcilambo cele ŵalakwe ciŵacipelece ŵalakwe kwa acinangolo ŵetu.

^41-42 “Mwine mwakwe mlendo jwamkanaŵa jumo jwa ŵandu ŵa Aisalaeli, akupikana ya lina lyenu ni mbili ja yindu yayikulungwa yimwatendele ŵandu ŵenu, naga jwalakwe akwisa kukupopela ni kwalambila ŵalakwe m'Nyumba jino,

⁴³ ndaŵi jelejo conde AMBUJE, alipikane kwinani kwa kutamako lipopelo lyakwe. Nipo amtendele mlendojo yindu yosope yiŵaŵendile jwalakwejo. Amtendele yeleyi kuti ŵandu ŵa mitundu josope ja cilambo capasi ŵamanyilile ŵalakwe, mpela mwele mwakutendela ŵandu ŵenu Aisalaeli. Nipo tacimanyilila kuti Nyumba aji jinajitaŵileji, gali malo ga kwalambila ŵalakwe.

⁴⁴ “Ndaŵi jele ŵalakwe AMBUJE, kakwalamula ŵandu ŵawo kwawula kungondo kuja kumenyana ni amagongo ŵawo. Naga akupopela kumalo galigose gali, ali mkulola ku msinda awuno ŵawusagwile ŵalakwe ni ku Nyumba ajino jinataŵile ŵalakwe,

⁴⁵ ndaŵi jelejo conde AMBUJE, agapikane kwinaniko mapopelo gawo, nipo ŵape macili ga kupunda pa ngondo.

⁴⁶ “Ndaŵi jele ŵandu ŵenu Aisalaeli akumlemwecesya, pakuŵa pangali mundu jwangalemwa, nipo ŵalakwe akwatumbilila ni kwapeleka kwa amagongo ŵawo, kuti ŵajigale ukapolo kwawula nawo ku cilambo cine cilicose, atamose cilamboco ciŵe kwakutalicila,

⁴⁷ agapikane mapopelo gawo. Naga pali acikapolo kumalo ga cilendogo, akupesya ya kulemwa ni kupitikuka mitima jawo, ni kupopela kwa ŵalakwe, mwakulinondiya ali mkusala kuti, ‘Tulemwisye, tutesile yindu yangalumbana, tulemwisye.’ Agapikane mapopelo gawo conde AMBUJE.

⁴⁸ Naga ŵanduwo ali ku cilambo ca cilendoco akupitikuka mtima kusyene, ni akupopela ali mkulola kucilambo acino cimwacipelece kwa acinangolo ŵawo, ku msinda wele ŵalakwe ŵawusagwile, ni soni ku nyumba jino jinataŵile ŵalakweji,

⁴⁹ jele ndaŵijo conde ŵalakwe AMBUJE, agapikane kwinani kwakutamako mapopelo gawo, ni kwatendela canasa.

⁵⁰ Ŵakululucile ulemwa wawo wosope wakwajimucila ŵalakwe, nipo ŵape mtima ŵakuweŵa amagongo ŵaŵajigele ukapolo, kuti ŵasunje jemanjaji ni mtima wacanasa.

⁵¹ Pakuŵa ŵandu ŵeleŵa Aisalaeli ali ŵandu ŵenu, ŵimwakopwesye ku Iguputo, mu ng'aso ja moto.

⁵² “Conde AMBUJE Mlungu, ngumŵenda kuti mwalolele ŵandu ŵenu Aisalaeli pamo ni mwenye jwawo, mgapikane mapopelo gawo ndaŵi ja kumŵenda kuti mwakamucisye.

⁵³ Pakuŵa mwalekangenye jemanjaji ni ŵandu wosope ŵa pa cilambo capasi, kuti aŵe ŵandu ŵenuŵenupe, mpela mwele mumwaŵecetele kupitila mwa Mose jwakutumicila jwenu, ndaŵi jimwakoposyaga acinangolo ŵetu ku Iguputo.”

Lipopelo lya mbesi

⁵⁴ Ali amalisisye Solomoni kupopela kwa AMBUJE, ŵajimwice kumalo gakupelecela mbopesi ga AMBUJE kuŵaliji ali atindiŵele, makono ali akwesisye kwinani.

⁵⁵ Ŵajimi ni ŵajaliwasisye ŵandu wosope, ni ŵaŵecete mwakwesya maloŵe acitiji kuti:

⁵⁶ “Acimbicikwe AMBUJE Mlungu ŵele ŵapelece mtendele kwa ŵandu ŵawo Aisalaeli, mpela mwa cilanga cawo ciŵaŵisile. Yindu yosope yambone yiŵaŵisile cilanga ŵalakwe kwa Mose kuti tayitende, akwanisye kuyitenda.

⁵⁷ AMBUJE Mlungu jwetu atame ni uweji mpela muŵatamile ni acinangolo ŵetu. Akatuleka jika kapena kutujasa.

⁵⁸ Ajigalawusye mitima jetu kuti tuŵe ŵandu ŵakwapikanila, ni kugasunga maloŵe, malamusi ni majiganyo gawo, gele giŵapele acinangolo ŵetu.

⁵⁹ Conde, Ambuje Mlungu jwetu, alikumbucile ndaŵi syosope lipopelo lyanguli ni maloŵe gakuŵenda kwangu, kunakupelece kwa ŵalakwe. Conde AMBUJE Mlungu jwetu ŵatendeleje canasa ndaŵi syosope ŵandu ŵawo Aisalaeli, pakwapa yindu yakuyisosa lisiku ni lisiku, pamo ni une mwenye jwawo.

⁶⁰ Pakutenda myoyo ŵandu ŵa mitundu josope ja cilambo ca pasi, tacimanyilila kuti AMBUJE jika ni ŵali Mlungu, pangali jwine soni.

⁶¹ Sambano jemanja Aisalaeli, mkwenela kuŵa ŵandu ŵakulupicika kwa AMBUJE Mlungu jwetu, pakugapikanila maloŵe gawo ni kugakuya malamusi gawo mpela mumtesile lelo jino.”

Akujipeleka Nyumba kwa AMBUJE

⁶² Kaneko Mwenye Solomoni, pamo ni ŵandu ŵa ku Isalaeli wosope ŵiŵasongene pa malopo, ŵatasile mbopesi kwa AMBUJE.

⁶³ Solomoni ŵatasile mbopesi sya mkamulano kwa AMBUJE pa kuwulaga ng'ombe 22,000 ni ngondolo 120,000. Myoyo mwenye pamo ni ŵandu wosope ŵa ku Isalaeli ŵaŵasongene pa malopo, ŵajipelece Nyumba jila kwa AMBUJE.

⁶⁴ Lisiku lilyolyo mwenyewo ŵagaswejesye malo ga luŵala, galiji pasogolo pa Nyumba ja AMBUJE, nipo panyuma pakwe ŵatasile mbopesi syakutinisya, sya yakulya, ni soni mawuta ga mbopesi sya mkamulano sila. Ŵatasile mbopesi syelesi pa malo gelega ligongo lyakuti malo gakupelecela mbopesi gaŵapanganyisye ga bulonsi gala, ganandipe.

⁶⁵ Ndaŵi jijojo soni, Solomoni ni ŵandu wosope ŵa ku Isalaeli, ŵatesile cindimba ca masakasa kwa masiku msano ni gaŵili. Kwaliji kwana likuga lyalikulungwa lya ŵandu, lyagumbele kutandila ku Mpata wa Hamati kumpoto ni mpaka ku malile ga Iguputo kum'mwela.

⁶⁶ Lisiku lya msano ni gatatu, Solomoni ŵasalile ŵandu wosope ŵala, kuti ajawuleje kumangwawo. Ŵanduwo ŵamtogolele mwenye, ni ŵapite ŵanduwo msimangwawo ali ŵakusengwa, ligongo lya upile gosope giŵapelece AMBUJE, kwa jwakutumicila jwawo Daudi ni kwa ŵandu ŵakwe wosope Aisalaeli.