1 Ayi 6 - Chiyawo Bible

Solomoni akutaŵa Nyumba ja AMBUJE

¹ Ŵamasengo ŵa Solomoni ŵatandite kutaŵa Nyumba ja AMBUJE* m'mwesi wa Sifi, wele uli mwesi waŵili wacaka ca Ahebeli. Caliji caka ca mcece Solomoni ali mwenye jwa Aisalaeli, soni pali papite yaka 480 Aisalaeli ali akopwece ku cilambo ca Iguputo.

² Mkati mwa Nyumba ja AMBUJE mwaliji mamita 27 mcilewu, mcijipi mwakwe mwaliji mamita msano ni mcece ni ukulu wakwe ŵaliji mamita 13 ni hafu.

³ Cipinda cakusa cakwinjilila caliji mamita msano ni mcece ca mlutumbo mwakwe, calandene ni mcijipi mwa Nyumbajo.

⁴ Ŵaŵisile mawindo gele mafelemu gakwe galiji gakwinjila mkati mwa mapupa.

⁵ Ŵataŵile soni yipinda yakusajikana yitatu mu mbali mwa Nyumba ja AMBUJE, kusyungulila mapupa ga Nyumba jajikulungwajo ni malo gamaswela ga mkati.

⁶ Cipinda capasi caliji mamita gaŵili mcijipi mwakwe, cipinda capasikati caliji mamita gaŵili ni hafu mcijipi mwakwe. Cipinda ca penani mnope mcijipi mwakwe mwaliji mamita gatatu. Pacilikati pa yipinda yiŵataŵileyo ni lipupa lya Nyumba ja AMBUJE paliji pana lipesa, kogopela kuti yitela ya yipindayo yikakwaya Nyumba ja AMBUJE.

⁷ Nyumbajo ŵajitaŵile ni maganga gesepele cile ku cilambo ca matumbi cila. Myoyo pakamula masengo gakutaŵago, nginipapikanika lisegwe lya nyundo, kapena liŵago kapena cida cilicose cacisyano.

⁸ Mlango ŵakwinjilila ku cipinda capasi cila waliji ca kum'mwela kwa Nyumba ja AMBUJE. Ni gapali makwelelo gakwinjilila mcipinda caŵili ni ku cipinda catatu.

⁹ Myoyo Mwenye Solomoni ŵajitaŵile Nyumba ja AMBUJE mpaka kujimalisya. Siling'i jakwe ja Nyumba ja AMBUJEJO, jaliji ja mitanda ja yitela ni matabwa ga mkungusa.

¹⁰ Ŵamalisisye soni kutaŵa yipinda yakusajikana kusyungulila Nyumba ja AMBUJE. Ukulu wa cipinda cilicose waliji ma mita gaŵili, nipo ŵayilumbikenye ku Nyumba ja AMBUJE ni mitanda ja yitela ya mkungusa.

¹¹ AMBUJE ŵamsalile Solomoni kuti,

¹² “Naga mkugapikanila malamusi gangu ni kutenda yingumsalila, une tinjimtendela yindu yosope yinaŵisile cilanga* kwa baba ŵenu Daudi.*

¹³ Tinjitama pasikati pa ŵandu ŵangu Aisalaeli m'Nyumba ja une AMBUJE jimkutaŵaji, nipo ngasinaleka jemanjajo.”

¹⁴ Myoyo Solomoni ŵamalisisye kutaŵa Nyumba ja AMBUJE.

Yakusalalisya mkati mwa Nyumba ja AMBUJE

¹⁵ Mapupa ga Nyumba ja AMBUJE mkati mwakwe, Mwenye Solomoni ŵagasalalisye ni matabwa ga mkungusa, kutandila pasi pa Nyumbajo mpaka ku msakasa. Pasi pakwe pa Nyumbajo ŵakomile matabwa ga payini.

¹⁶ Cipinda ca mkatikati ca Nyumba ja AMBUJE cakolanjidwa Cipinda Ceswela Mnope ŵacitaŵile, ni matabwa ga mkungusa, kutandila pasi mpaka ku msakasa kunyuma kwa Nyumba ja AMBUJE. Nipo mcilewu mwakwe caliji mamita msano ni mcece.

¹⁷ Mbali ja Nyumba ja AMBUJE jijaliji pasogolo pa cipinda ca mkatikati ca Nyumba ja AMBUJE cila, galiji mcilewu mwakwe mamita 18.

¹⁸ Pa matabwa ga mkungusa gigaliji mkati mwa Nyumba ja AMBUJE gala, ŵagobile yitusitusi ya migawo ni yamaluŵa. Maganga ga lipupa mkati mwa Nyumbajo nginigawonecelaga, ligongo mkati mosopemo kusyungula mapupa gosope, ŵaŵisile matabwa ga mkungusa.

¹⁹ Cipinda ca mkatikati ca Nyumba ja AMBUJE cila, ŵacitaŵile mkati mwa Nyumba mula kuti aŵice Libokosi lya Cilanga ca AMBUJE.

^20-22 Cipinda celeci caliji mamita msano ni mcece mbali syakwe syosope, mcilewu, mcijipi ni mu ukulu wakwe. Ŵacipacile cipindaco ni golidi* msyesyene. Ŵaŵisile soni mikufu ja golidi mwakutumbulukanya pasogolo pa cipinda ca mkatikati ca Nyumba ja AMBUJEJO. Ŵapanganyisye mkatimo malo gakupelecela mbopesi ni matabwa ga mkungusa. Mkati mosope mwa Nyumba ja AMBUJE ni malo gakupelecela mbopesi ga mcipinda ca mkatikati ca nyumba gala ŵapacile golidi.

²³ Ŵapanganyisye akelubi ŵaŵili ŵa citela ca olifi,* ukulu ŵa jwalijose waliji mamita mcece ni hafu, nipo ŵaŵisile mkati mwa cipinda ca mkatikati ca Nyumba ja AMBUJE.

^24-26 Akelubi ŵaŵili wosopewo ŵaliji ŵa misingu ja kulandana, soni ŵapanganyisye mwakulandana. Jwalijose ŵakwete mapapiko gaŵili, lipapiko lililyose lya mkelubi ulewu wakwe lyaliji mamita gaŵili ni kandu. Kutambasukula mapapiko gaŵiligo, kutyocela songa jine mpaka ku songa jine, ulewu ŵakwe ŵaliji mamita mcece ni hafu.

²⁷ Solomoni ŵaŵisile akelubiwo mwakulolegana mkati mwa cipinda Ceswela Mbope m'Nyumba ja AMBUJE, kuti mapapiko gawo gaŵili getambasukule galiji mkwayana pa cilikati pa cipindaco, ni mapapiko gane gaŵili gakwayiye mapupa gakwe.

²⁸ Nipo akelubiwo ŵapakesye ni golidi.

²⁹ Mapupa ga cipinda cacikulungwa ca Nyumba ja AMBUJE, ni ga cipinda ca mwana ca mkatikati ca Nyumba ja AMBUJE ŵagasalalisye ni yitusitusi ya kusokota ya akelubi, ya migwalangwa, ni ya maluŵa.

³⁰ Ni atamose pasi pa yipindayo ŵapacile golidi.

^31-32 Matanga gaŵili ga matabwa ga olifi, ŵagaŵisile pa mlango wakwinjilila ku cipinda ca mkatikati ca Nyumba ja AMBUJE. Ŵagasalalisye ni yitusitusi ya kusokota ya akelubi, ya migwalangwa, ni ya maluŵa. Matanga ni yakusalalisyayo yosope ŵayipacile ni golidi. Mafelemu ga matangago ŵagalumbikenye ni kugasimanya pacanya pa matangago.

^33-34 Matanga gaŵili ga pa mlango wakwinjilila m'Nyumba ja AMBUJE, ŵagapanganyisye ni matabwa ga yitela ya payini, litanga lililyose lyakwete mbali siŵili syakomboleka kusipinda. Mafelemu gakwe ŵagapanganyisye ga yitela ya olifi.

³⁵ Matangago ŵagasalalisye ni yitusitusi ya kusokota ya akelubi, ya migwalangwa ni ya maluŵa, ni ŵagapacile golidi.

³⁶ Ŵalutaŵile luŵala lwa mkati ni luŵala lwa mapupa, lulwakwete msela umo wakutaŵidwa ni matabwa ga mkungusa pa misela jitatu jilijose ja maganga, pasogolo pa Nyumba ja AMBUJE.

³⁷ Ŵatandite kutaŵa yilimbilimbi ja Nyumba ja AMBUJE m'mwesi waŵili, wele uli mwesi wa Sifi, mcaka ca mcece cinjilile Solomoni kuŵa mwenye.

³⁸ Pa mwesi wa msano ni jitatu, wele uli mwesi wa Buli,* mcaka ca 11 cinjilile Solomoni kuŵa mwenye, Nyumba ja AMBUJE jamasile kutaŵidwa. Ŵajitaŵile Nyumbajo mpela muŵajisoselaga kujitaŵa. Mwenye Solomoni ŵajitaŵile Nyumbajo kwa yaka msano ni yiŵili.