1 Ayi 5 - Chiyawo Bible

Solomoni akuliŵicila cile kutaŵa Nyumba ja AMBUJE

¹ Mwenye Hilamu jwa ku Taya ŵaliji mkunonyelena ni Daudi* ndaŵi syosope, ni piŵapikene kuti Solomoni ajinjile ucimwene m'malo mwa babagwe Daudi, ŵasitumile nduna syakwe kuja kuwonegana najo.

² Nipo Solomoni ŵatumisye maloŵe kwa Hilamu gakuti,

³ “Ŵalakwe akumanyilila kuti baba ŵangu Daudi, nginapakombola kwataŵila nyumba jakwapopelela AMBUJE* Mlungu jwawo, ligongo lya ngondo sya amagongo ŵawo, ŵaŵasyungulile mbali syosope sya cilambo. Nambo pambesi AMBUJE ŵapelece amagongo ŵawowo pasi pa ulamusi ŵa babawo.

⁴ Nambo sambano AMBUJE Mlungu jwangu ambele une mtendele kumbali syosope sya malile ga cilambo cangu. Nganingola amagongo ŵaliwose kapena cakusawusya cilicose.

⁵ Ni une ngusosa kwataŵila nyumba jakwapopelela AMBUJE Mlungu jwangu, mpela mwele jwalakwe muŵasalilile baba ŵangu kuti, ‘Daudi, mwanace jwenu jutinjimtamika pa mpando wenu wa ucimwene m'malo mwenu, jwelejo ni jutacindaŵila une nyumba ja kumbopela.’

⁶ Myoyo ngwaŵenda kuti ŵatume ŵamasengo ŵawo ku Lebanoni kuti akangatile yitela ya mikungusa. Tinjalipila mtengo uliwose utacisala ŵalakwe, soni tinjatumisya ŵamasengo ŵangu kuti akakamusyane masengo ni acimjawowo. Ŵalakwe akumanyilila kuti ŵamasengo ŵangu ŵangapakombola kata yitela mpela mwakusakatila ŵamasengo ŵa ŵalakwe.”

⁷ Hilamu ŵasengwile mnope, piŵagapikene maloŵe ga Solomonigo, nipo ŵatite, “Lelo AMBUJE acimbicikwe, ligongo ŵampele Daudi mwanace jwalunda camti myiyi, kuti aŵe mwenye jwa kulamulila mtundu wa ŵandu ŵakupikanika, m'malo mwakwe.”

⁸ Nipo Hilamu ŵatumisye aga maloŵega kwa Solomoni, “Mbikene yindu yosope yaŵendile une. Ndili tayale kutenda yindu yosope yakuyisosayo. Timbelece yitela ya mikungusa ni payini.

⁹ Ŵamasengo ŵangu tacituluka ni yitelayo kutyocela ku Lebanoni kuno mpaka ku nyasa. Ni taciyitaŵa yitelayo pamo ni kuyijajaŵilisya mungulugulu nyasa mpaka kumalo gatagasale ŵalakwe. Kweleko ŵamasengo ŵangu takayigopole yitelayo, nipo ŵamasengo ŵenu taciyipocelela pelepo. Cakwaŵenda une ŵalakwe ni cakuti ambe une yakulya yakwalisya ŵandu ŵangu.”

¹⁰ Myoyo Hilamu ŵapelece kwa Solomoni yitela yosope yiŵayisakaga ya mikungusa ni payini.

¹¹ Nombe najo Solomoni ŵapelekaga kwa Hilamu caka ni caka, tiligu jwakwanila matani 2,000, ni soni mawuta gambone ga olifi* gakwanila malita 400,000, kuti yiŵe yakulya ya ŵandu ŵakwe.

¹² AMBUJE ŵampele Solomoni lunda mpela muŵatendele cilanga.* Myoyo paliji pana mtendele pasikati pa Hilamu ni Solomoni, nipo ŵaŵisile cilanga ca mkamulano.

¹³ Mwenye Solomoni ŵalamwile ŵandu 30,000 mcilambo cosope ca Isalaeli, kamula masengo gakukata yitela ya Nyumba ja AMBUJE.

¹⁴ Ŵagaŵile ŵanduwo m'makuga gatatu. Likuga lililyose lyaliji lya ŵandu 10,000, ni likuga lililyose lyaliji mkamula masengo mwesi umo ku Lebanoni ni miesi jiŵili ŵaliji mkupumula kumusi. Adonilamu ni ŵaliji kapitawo jwakulolela gele masengoga.

¹⁵ Solomoni ŵakwete soni ŵandu ŵamasengo 80,000 ŵakasa maganga, ku matumbi ga cilambo ca Isalaeli, ni ŵandu 70,000 ŵakututa magangago.

¹⁶ Ŵaŵisile acikapitawo 3,300 ŵakwalolela ŵele ŵanduwo pamo ni masengogo.

¹⁷ Mwenye Solomoni ŵalamwile ŵandu ŵa masengowo kuti akase maganga gamakulungwakulungwa gambone, gakuti akatandile kutaŵa pasi pa Nyumba ja AMBUJE.

¹⁸ Ŵandu ŵamasengo ŵa Solomoni ni Hilamu ŵakamwile masengo pamo ni ŵandu ŵa ku Gebala. Ŵasepile maganga ni kolosya yitela cenene yakutaŵila Nyumbajo.