1 Ayi 4 - Chiyawo Bible

Nduna syasikulungwa sya Solomoni

¹ Solomoni ŵaliji mwenye jwa ku Isalaeli,

² syakuyicisyasi syaliji nduna syakwe: Ŵakutaga mbopesi: Asaliya mwanace jwa Sadoki

³ Acimlembela ŵa ku nganya: Eliholefu ni Ahiya ŵanace ŵa Shisha Ŵakusunga mabuku: Yehoshafati mwanace jwa Ahiludi

⁴ Jwamkulungwa jwakulongolela ngondo: Benaya mwanace jwa Yehoyada Ŵakutaga mbopesi: Sadoki ni Abiyatala

⁵ Nduna ja acibwanamkubwa: Asaliya mwanace jwa Natani Nduna ja mwenye: Sabudi mwanace jwa Natani

⁶ Jwakulolela ŵamasengo ku nyumba ja mwenye: Ahisha Ŵakulolela ga tangata: Adonilamu mwanace jwa Abida.

⁷ Solomoni ŵasagwile nduna sine likumi kwisa siŵili ni ŵasiŵisile ku mbali syosope sya cilambo ca Isalaeli. Nduna syelesi syapelekaga yakulya kwa mwenye ni liŵasa lyakwe lyosope. Nduna jilijose japelekaga yakulya kwa mwenye mwesi umo pa caka.

⁸ Mena ga nduna likumi ni siŵili ni mbali siŵalolelaga ni asi: Beni Huli: ku cilambo ca ku matumbi ga Efelemu

⁹ Beni Deka, ŵaliji mkulolela misinda aji. Makasi, Shalabini, Beti Shemeshi, Eloni ni Beti Hanani

¹⁰ Beni Hesedi: ŵaliji mkulolela misinda wa Aluboti ni Soko, pamo ni upande wosope wa Hefele

¹¹ Beni Abinadabu: jwalombele Tafati, mwanace jwamkongwe jwa Solomoni: ŵaliji mkulolela mbali syosope sya ku matumbi ga Doli

¹² Baana mwanace jwa Ahiludi: ŵaliji mkulolela misinda ja Tanaki, Megido, ni dela josope ja Beti Shani, jakuŵandikana ni musi wa Saletani, ca kum'mwela kwa musi wa Yesilele, ni soni kutandila ku Betesani mpaka ku msinda wa Abele Mehola ni msinda wa Yokimimu

¹³ Beni Geba: ŵaliji mkulolela msinda wa Lamoti ku Giliyadi, ni misi ja ŵandu ŵa mwiŵasa lya Yaili, cisukulu ca Manase, jili ku Giliyadi. Ŵaliji mkulolela soni dela ja Agobu, jele jili ku Bashani, misinda josope jajikulungwa jaliji 60, jakuŵa mkati mwa mapupa ni matanga ga bulonsi

¹⁴ Abinadabu mwanace jwamlume jwa Ido: ŵaliji mkulolela dela ja Mahanaimu

¹⁵ Ahimasi, jwele juŵalombele Basemati, mwanace jwamkongwe jwa Solomoni: ŵaliji mkulolela cilambo ca Nafutali

¹⁶ Baana mwanace jwamlume jwa Hushai: ŵaliji mkulolela dela ja Asha ni msinda wa Biloti

¹⁷ Yehoshafati mwanace jwamlume jwa Paluwa, ŵaliji mkulolela upande wa Isakala

¹⁸ Shimeyi mwanace jwamlume jwa Ela: ŵaliji mkulolela upande wa Benjamini.

¹⁹ Geba mwanace jwa Uli: ŵaliji mkulolela cilambo ca Giliyadi, cele pandanda ŵaliji mkucilamulila Sihoni mwenye jwa Aamoli ni Ogi mwenye jwa ku Bashani Japali soni nduna jimo jijalolelaga cilambo cosope ca Yuda.

Kulamulila kwa Solomoni kukwendelecela cenene

²⁰ Ŵandu ŵa Ciyuda ni Aisalaeli ŵatupile mpela mcenga ŵa mungulugulu nyasa. Ŵaliji ŵandu ŵakusengwa mnope, ligongo mundu jwalijose ŵakwete yakulya ni yakumwa yakwanila.

²¹ Solomoni ŵaliji mkulamulila yilambo yosope, ya kutandila ku Lusulo lwa Yufuleti mpaka ku cilambo ca Afilisiti, mpaka kuja kwika kumalile ga cilambo ca Iguputo. Ŵandu ŵa myilambo yeleyi ŵaliji mkukoma msongo, ni kumtumicila Solomoni masiku gosope ga umi wakwe.

²² Yakulya yakusosekwa ku nyumba kwa Mwenye Solomoni pa lisiku limo, yakwanilaga ngalala 150 sya utandi weswela, ni ngalala 300 sya mgayiwa.

²³ Ng'ombe likumi syakwimbala cenene, syakulicisya mwicinga, ng'ombe 20 syakulicisya kwitinji, ngondolo 100, pangaŵalanjila mbaŵala, ngolombwe, njati, ni yijuni yakunakana yakulanga.

²⁴ Solomoni ŵaliji mkulamulila cilambo cosope ca kungapilo lyuŵa kwa Lusulo lwa Yufuleti, kutandila ku Tifisa mpaka ku Gasa. Ayimwene wosope ŵaŵaliji kungapilo lyuŵa kwa Lusulo lwa Yufuleti, ŵaliji pasi pakwe, soni ŵaliji mkutama mwa mtendele ni yilambo yakuŵandikana nayo.

²⁵ Myoyo ndaŵi josope ja umi wakwe Solomoni, ŵandu wosope ŵa ku Yuda ni Isalaeli ŵaliji pa mtendele, soni ŵaliji ŵandu ŵangasoŵa cindu cilicose.

²⁶ Solomoni ŵakwete malo ga yipinda 40,000 yakusunjila mahaci gakuwuta mageleta gakwe, ŵakwete soni ŵandu ŵakwana 12,000 ŵakukwela pa mahaci.

²⁷ Nduna likumi ni siŵili sila syapelekaga yakulya ya Mwenye Solomoni ni ya ŵandu wosope ŵaŵalyaga ku nyumba ja mwenye, nduna jilijose japelekaga mwesi wakwe. Ndunasyo syapelekaga yakulya yosope yakusosekwa ku nyumba ja mwenye.

²⁸ Soni syapelekaga jwalijose mbuwa jakwe ja yakulya yakuwoneka mpela tiligu, yakolanjidwa kuti balele* pamo ni manyasi, gakulicisya mahaci gakuwuta mageleta ni mahaci gane, yosopeyi ŵayikaga nayo ku malo kuyasosekwaga.

²⁹ Mlungu ŵampele Solomoni lunda lwejinji. Lunda lwakwe lwaliji lwakupunda mnope.

³⁰ Myoyo lunda lwa Solomoni lwapundile lwa ŵandu wosope ŵalunda ŵa kungopoko lyuŵa, ni lwa ŵandu wosope ŵa ku Iguputo.

³¹ Jwalakwejo ŵaliji jwalunda kwapunda ŵandu ŵane wosope, ŵampundile atamose Etani jwa ku Esala, ni Hemani, Kaliko ni Dalida, ŵanace ŵacalume ŵa Maholi. Nipo mbili jakwe japikanice kwa mitundu josope ja ŵandu, jakusyungulila cilambo cakwe.

³² Solomoni ŵalembile misyungu 3,000 ni nyimbo syakupunda 1,000.

³³ Mu jele misyungujo ni nyimbosyo, ŵajiganyisye ngani ja yitela ni yakumela yine, kutandila ngani ja mikungusa ja ku Lebanoni mpaka ja kawukutu ka hisope* kakumela m'mapupa. Ŵaŵecete soni ya yinyama, yijuni, yinyama yakwaŵa pasi ni ya somba.

³⁴ Ayimwene ŵosope ŵa yilambo yapasi ŵajipikene mbili ja lunda lwakwe, ni ŵatumisyaga ŵandu ŵawo kuti akapikane ya lunda lwakwelo.