1 Ayi 3 - Chiyawo Bible

Solomoni akuŵenda lunda

¹ Solomoni ŵaliji pa uganja ni Mwenye jwa ku Iguputo ligongo lya kulombela mwanace jwakwe. Ŵaliji mkutama najo jwamkongwejo mu msinda ŵakala wa Daudi* wa Yelusalemu, ŵaliji mkutama kweleko mpaka pa ndaŵi jiŵamasile kutaŵa nyumba jakwe ja sambano ni Nyumba ja AMBUJE* ni lipupa lya kusyungulila msindawo.

² Ndaŵi jeleji ŵandu ŵaliji mkutaga mbopesi syawo m'malo ga kulekanganalekangana, ligongo ŵaliji mkanataŵe Nyumba ja AMBUJE jakupopelela.

³ Solomoni ŵanonyele AMBUJE, soni ŵagakuyaga majiganyo ga Daudi babagwe, nambo ŵaliji mkutaga mbopesi ni kututumisya ubani* m'malo gakulekanganalekangana nombe najo.

⁴ Lisiku line Solomoni ŵajile ku Gibiyoni kukutaga mbopesi, ligongo kweleko kwaliji kwana malo gakupelecela mbopesi gakugapunda malo gane gosope. Solomoni ŵaliji ali apelece mbopesi syakutinisya pa malo gakupelecela mbopesi gelega syakwanila 1,000.

⁵ Cilo cine Solomoni ali ku Gibiyoniko, AMBUJE ŵamwonecele jwalakwe cilo musagamisi, ni ŵamsalile kuti, “Mŵende cindu cilicose cimkusosa kuti nampe.”

⁶ Solomoni ŵajanjile kuti, “Ŵalakwe AMBUJE ŵalosisye cinonyelo cawo cacikulungwa cangamala kwa jwakutumicila jwawo Daudi, baba ŵangu, ligongo ŵaliji mundu jwambone, jwa kutenda yindu yiŵamlamwile ŵalakwe kuti ayitende mwakulupicika. Ni mwalosisye baba ŵangu Daudi cinonyelo cenu cacikulungwa cangamalaco, pakwapa babawo mwanace, juŵajinjile ucimwene m'malo mwawo.

⁷ “Ŵalakwe AMBUJE Mlungu, sambano ambisile une jwakutumicila jwawo kuŵa mwenye, m'malo mwa baba ŵangu Daudi, atamose ndili mwanace soni jwangapakombola kamula kwakwe kwa gele masengoga.

⁸ Une jwakutumicila jwawo ngutama pasikati pa ŵandu ŵele ŵalakwe ŵasagwile kuti aŵe ŵandu ŵawo, mtundu wawukulungwa, ŵandu ŵakwe ŵangakomboleka kwaŵalanga ligongo ali ŵajinji.

⁹ Myoyo AMBUJE, ngwaŵenda kuti ambe une lunda lwa kwalamulila cenene ŵandu ŵenu, kuti manyilileje kulekanganya yindu yambone ni yakusakala. Naga une ngakola lunda, tinapakombole uli kuwulamulila mtundu wawukulungwa wa ŵandu wenu?”

¹⁰ Maloŵe gaŵajanjile Solomoni, gakuŵenda lunda, ganonyele AMBUJE.

¹¹ Myoyo Mlungu ŵamsalile jwalakwejo kuti, “Ligongo lyakuti mŵendile kuti nampe lunda lwa kuti mlamulileje ŵandu cenene, ni kuti nganimŵenda kuti nimpe umi wa mpaka kuwa mli mcekulwipe, kapena cipanje kapena soni kuŵenda kuti amagongo ŵenu awe,

¹² myoyo une tinamtendele yimŵendileyo. Tinampe kumanyilila ni lunda lwejinji, lwamkanakola mundu jwine jwalijose jwa kala ni soni ngasawoneka soni jwine msogolo, jwakulandana ni m'mwejo.

¹³ Konjecesya pelepo tinimpe soni yindu yimkanimŵenda. Tinimpe cipanje ni ucimbicimbi, pangali mwenye jutacilandana ni m'mwejo pa masiku gosope ga umi wenu.

¹⁴ Soni naga mkumbikanila une ni kugasunga malamusi gangu, mpela muŵatendelaga baba ŵenu Daudi, timciwa mli mcekulwipe.”

¹⁵ Solomoni ŵajimwice nipo ŵamanyilile kuti Mlungu ŵaliji mkuŵeceta najo mu sagamisi. Myoyo ŵawujile ku Yelusalemu, ni ŵajile kwima pasogolo pa Libokosi lya Cilanga ca AMBUJE. Ni ŵatasile mbopesi jakutinisya ni mbopesi ja mkamulano* kwa AMBUJE. Panyuma pakwe, ŵasikolocesye nduna syakwe syosope cindimba.

Solomoni akulamula magambo gakusawusya

¹⁶ Lisiku line acakongwe ŵaŵili ŵalilama ŵayice ku nyumba ja Mwenye Solomoni ni ŵajimi pameso pakwe.

¹⁷ Jumo jwa acakongwewo ŵamsalile mwenye kuti, “Ambuje ŵangu, une ni mjanguju tukutama nyumba jimo. Une naŵelece mwanace jwamlume, mjanguju ŵaliji m'Nyumba m'momo.

¹⁸ Pali papite masiku gatatu, une ndili ŵelece kala jwele mwanaceju, mjanguju nombe najo ŵaŵelece mwanace jwakwe jwamlume. Paliji pangali mundu jwine, nambo twaliji ŵaŵilipe m'Nyumbamo.

¹⁹ Nambo mwanace jwa mjanguju awile ciloci, ligongo ŵamgonele.

²⁰ Sambano mjanguju ŵajimwice pakati cilo, ni ŵamjigele mwanace jwangu jwa umi pa cindanda jangu, ni ŵamgonece pa cindanda jakwe, nipo ŵamgonece mwanace jwakwe jwam'wejo pa cindanda jangu, une ndili mlugono.

²¹ Pinajimwice kuti namjonjesye mwanangu, nam'weni kuti awile. Nambo pinamlolecesye, nam'weni kuti nganaŵa kose mwanace jwa une.”

²² Nambo jwamkongwe jwine jula ŵamkatile maloŵe mjakwejo, ŵatite, “Iyayi, mwanace jwali cijumiju ni jwangu, jwakuwaju ni jwenu.” Jwamkongwe jwandanda jula ŵamjanjile mjakwe jula kuti, “Iyayi, mwanace jwam'weju ni jwenu, nambo mwanace jwa cijumiju ni jwangu.” Ŵakanganile acakongwewo camti myoyo pameso pa mwenye.

²³ Nipo Mwenye Solomoni ŵatite, “Jwine akuti, ‘Mwanace jwa cijumiju ni jwangu,’ jwine soni akuti, ‘Iyayi, mwanace jwenu ni jwawileju, jwangu ni jwali cijumiju.’ ”

²⁴ Papopo mwenye ŵaŵilasisye upanga, piŵayice nawo upanga,

²⁵ mwenyewo ŵalamwile kuti, “Mumkate pasikati mwanace jwa umiju, jwalijose jwa acakongweŵa, mumpe mbali jimo ja mwanaceju.”

²⁶ Ndaŵi jijojo, jwamkongwe juŵaliji mamagwe msyesyene jwa mwanace jwa umi jula, camkamwile canasa cacikulungwa mu mtima mwakwe ligongo lya mwanacejo. Ni ŵamsalile mwenyejo kuti, “Pepani Ambuje ŵangu, ngwaŵenda kuti agambe kumpeleka mwanace jwa umiju kwa mjanguju, conde akamwulaga.” Nambo jwamkongwe jwine jula ŵatite, “Iyayi, akampeleka kwa jwalijose jwa uweji, agambe kumkata pasikati basi.”

²⁷ Mwenye Solomoni ni ŵalamwile kuti, “Mkamwulaga mwanacejo! Mumpelece mwanace jwa umi kwa jwamkongwe jwandandajo. Jweleju ni mamagwe msyesyene jwa mwanaceju.”

²⁸ Ŵandu ŵa ku Isalaeli piŵapikene yiŵatite Mwenye Solomoni ulamule wakwe wa lunda pa gele magamboga, ŵatandite kumcimbicisya mwenyejo, ligongo ŵayiweni kuti mwenyejo ŵaliji ni lunda, lwakuwuma kwa Mlungu, lwa kulamula magambo mwa cilungamo.