1 Ayi 21 - Chiyawo Bible

Mgunda wa mipeleya wa Naboti

¹ Mundu jwine lina lyakwe Naboti ŵakwete mgunda ŵa mpeleya, mwakuŵandikana ni nyumba ja ucimwene ja Ahabu ku Yesilele.

² Lisiku line Ahabu ŵamsalile Naboti kuti, “Mumbe une mgunda wenuwu kuti uŵe litimbe lyangu, pakuŵa uŵandikene ni nyumba jangu. M'malo mwakwe tinampe mgunda wine wambone, kapena naga mkusosa, tisume pa mtengo wakwenela mgundawo.”

³ Naboti ŵajanjile kuti, “Mgunda welewu uli wa acinangolo ŵangu, kutandila kalakala. Ni ngulumbila pali AMBUJE,* kuti ngakomboleka une kwapa ŵalakwe wele mgundawu.”

⁴ Myoyo Ahabu ŵajawile ku nyumba jawo ali atumbile ni ŵangasangalala, ligongo lya maloŵe giŵajanjile Naboti gala. Nipo Ahabu ŵagonile pa cindanda jakwe ali alolite kwipupa, nipo ŵakanile kulya.

⁵ Nipo Yesebele, ŵamkwawo Ahabu ŵala, ŵajawile kwa jwalakwe ni ŵamwusisye kuti, “Ligongo cici ngope jenu jikuwoneka jangasangalala, soni ngamkusosa kulya?”

⁶ Ahabu ŵajanjile ŵamkwawowo kuti, “Ligongo lyakwe lili maloŵe gaŵecete Naboti kwa une. Une naŵecete ni Naboti kuti ambe mgunda wakwe wa mpeleyawu kuti sume, kapena naga akusaka, mbelece mgunda ŵine m'malo mwakwe. Nambo jwalakwejo akanile kumba.”

⁷ Yesebele ŵamwusisye Ahabu kuti, “Ana ngati ŵalakwe mwenye jwa ku Isalaeli? Ajimuce, asangalale, soni akalye. Une tingajigalile wele mgunda wa mpeleyawo kwa Naboti.”

Naboti akuwulajidwa

^8-10 Myoyo Yesebele ŵalembile yikalata kwa acakulungwakulungwa ni kwa ŵakulongolela msinda uŵatamaga ku Yesilele. Myikalatamo ŵalembile kuti, “Mwagombelesye ŵandu kuti atame ŵangalya cakulya, ŵaŵilanje ŵandu wosopewo pa malo gamo, nipo amtamice Naboti pa malo gakucimbicika. Mwajigale ŵandu ŵaŵili ŵakusakala mtima ayice pasogolo pa jwalakwe, nipo ŵalambucisye kuti, ‘M'mwe Naboti, mumlwesile Mlungu ni soni mwenye.’ Nipo panyuma pakwe mumkopocesye kusa kwa msindawo, nipo mumsome maganga mpaka awe.” Nipo ŵasayine yikalatayo lina lya Ahabu ni ŵayidindile cidindo ca mwenyejo. Nipo ŵayitumisye kwa ŵakulongolela msindawo.

¹¹ Myoyo ŵandu, pamo ni acakulungwakulungwa ŵa msinda wa Yesilele ŵayitesile yiŵalamwile Yesebele, ŵamkwawo mwenye.

¹² Acakulungwakulungwa ŵala ŵagombelecesye ŵandu kuti akalya cakulya, nipo ŵandu wosope ŵasongene pa malo gamo, ni ŵamtamice Naboti pa malo gakucimbicika.

¹³ Ŵandu ŵaŵili ŵakusakala mtima ŵala, ŵamlambucisye Naboti pameso pa likuga lya ŵandu, ŵatite, “Nabotiŵa ŵamlwesile Mlungu soni ni mwenye ŵakwe.” Myoyo ŵanduwo ŵamkopocesye Naboti kusa kwa msinda, ŵamsomile maganga mpaka ŵamwuleje.

¹⁴ Nipo ŵatumisye maloŵe kwa Yesebele gakuti, “Akuno Naboti jula tukolosisye, nipo awile.”

¹⁵ Yesebele piŵapikene kuti Naboti awile, mwacitemacitema ŵamsalile Ahabu kuti, “Jimukani, mkajigale mgunda wa mpeleya uŵakanyaga Naboti kumsumisya ula, pakuti Naboti awile.”

¹⁶ Cagamba kupikana Ahabu kuti Naboti awile, ŵajile kumgunda wa mpeleya wa Naboti, nipo ŵawujigele kuti uŵe wakwe.

Eliya akumsalila Ahabu kuti liŵasa lyakwe lyosope tilicijonasika

¹⁷ Nipo AMBUJE ŵamsalile Eliya* jwakulocesya jwakutyocela ku Tishibe kuti,

¹⁸ “Mjawule kwa Mwenye Ahabu jwakutama ku Samaliya. Jwalakweju ali mu mgunda wa mpeleya ŵa Naboti. Ajawile kweleko kuti akajigale mgundawo kuti uŵe wakwe.

¹⁹ Sambano mkamsalile kuti, AMBUJE akumwusya m'mwejo kuti, ‘Ana m'mweji mwuleje mundu, ni kujigala cipanje cakwe?’ Ni mkamsalile soni kuti, ‘AMBUJE akuti, pa malo gelego m'mbwa syalapitaga miasi ja Naboti, pa malo gagogo m'mbwa tisicilapita miasi jenu.’ ”

²⁰ Eliya piŵamsimene jwalakwe, Ahabu ŵamwusiye Eliya kuti, “Ana musimene lelo, m'mwe m'magongo jwangu?” Eliya ŵajanjile kuti, “Elo nimsimene, ligongo ŵalakwe mwenye alipelece mnope, kutenda yindu yosope yakusakala yakuŵengana nayo AMBUJE.

²¹ Myoyo AMBUJE akusala kuti, ‘Tinamjonanje, kutandila m'mwejo ni jwamlume jwalijose jwa mwiŵasa mwenu, jwamkulungwa kapena mwanace, tawe.

²² Liŵasa lyenu tilimale kuŵa mpela mulyamalile liŵasa lya Mwenye Yelobowamu mwanace jwa Nebati, ni soni mpela liŵasa lya Basha mwanace jwa Ahiya. Nombe m'mwejo mundumbilisye, ligongo mwatendesye kulemwa ŵandu ŵa ku Isalaeli.’

²³ Sambano kusala ya Yesebele, AMBUJE akuti m'mbwa ticisimlya jwalakwejo mkati mwa msinda wa Yesilele.

²⁴ Mundu jwalijose jwa mwiŵasa lya Ahabu jutaciwila mu msinda, m'mbwa ticisimlya. Nipo jwalijose jwa mwiŵasa lyelelyo jutaciwila mwitinji, tiyicimlya yijuni ya mwinani.”

²⁵ Paliji pangali mundu jwine juŵalipelece mnope kutenda yindu yakusakala, ni kumlemwecesya AMBUJE mpela Ahabu, juŵanyenjece ni Yesebele ŵamkwakwe.

²⁶ Ahabu ŵatesile ulemwa* wakutesya soni mnope pakulambila milungu ja cilendo, mpela muŵatendelaga ŵandu ŵa mtundu wa Aamoli ŵala, mtundu wa ŵandu wele AMBUJE ŵawutopwele ndaŵi jiŵayikaga Aisalaeli.

²⁷ Ahabu piŵagapikene gele maloŵego, ŵapapwile yakuwala yakwe, ni ŵawete yiguduli, ŵakanile kulya, ni ŵagonile pa yiguduliyo. Nipo ŵajesile mwakudandawula ni mwakulinondiya.

²⁸ Nipo AMBUJE ŵamsalile jwakulocesya* Eliya kuti,

²⁹ “Ana mlolite yatite pakulinondiya Ahabu pameso pangu? Pakuŵa jwalakwe alinondiye pameso pangu, ngambeleka cilango cila, jwalakweju ali cijumi. Nambo tinjipeleka cele cilangoco ndaŵi jitaciŵa mwanace jwakwe mwenye.”