1 Ayi 2 - Chiyawo Bible

Daudi akumsalila Solomoni misyungu kambesi

¹ Jili jiŵandicile ndaŵi jakuti Mwenye Daudi* awe, ŵamsalile Solomoni mwanagwawo kuti,

² “Unetu ulendo awuno, sambano m'mweji mlimbe mtima nipo mŵe ŵamacili.

³ Mtendeje yitamlamulileje AMBUJE* Mlungu jwenu. Mgapikanileje maloŵe, ni malamusi ga Mlungu mpela mugalembecele m'malamusi ga Mose,* kuti yindu yosope yimjendeleje cenene kulikose kutimjawuleje.

⁴ Naga mkwapikanila AMBUJE Mlungu, tacisunga cilanga* cawo ciŵaŵisile, piŵasalile une kuti, ŵanace ŵangu ŵacalume tacalamulila Aisalaeli, naga akugapikanila malamusi, ni kuŵa ŵakulupicika kwa Mlungu ni mtima wawo wosope, ni umi ŵawo wosope.

⁵ “Konjecesya pelepo, mkaliŵalila yakusakala yiŵandendele Yowabu, mwanace jwa Seluya, pakwawulaga acakulungwakulungwa ŵaŵili ŵakulongolela ngondo ŵa Aisalaeli ŵala, Abinele mwanace jwa Nele ni Amasa mwanace jwa Yesa. Mkumbucile yiŵatite pakwawulaga ŵele ŵanduŵa pa ndaŵi ja mtendele, pakusosa kuwucisya ciwa ca ŵandu ŵiŵawuleje pa ndaŵi ja ngondo. Jweleju akwete magambo, ligongo lyakwawulaga ŵandu ŵangalemwa.

⁶ Sambano tim'manyilile yakutenda ni m'mwejo, nambo mkakunda kuti awe ciwa ca pa ugono ali acekulwipe.

⁷ “Nambo mwatendele canasa ŵanace ŵa Balisilayi jwa ku Giliyadi, nipo mlyeje nawo pampepe, ligongo jemanjaji ŵangamucisye une pa ndaŵi jinatilaga Abisalomu, akulu ŵenu.

⁸ “Mtende soni kandu pa Shimeyi mwanace jwa Gela, jwa mu msinda ŵa Bahulimu wawuli mcilambo ca Benjamini, juŵandukene une kwakutesya canasa, pa lisiku linajawulaga ku Mahanaimu. Nambo piŵasimene ku Lusulo lwa Yolodani, nalumbile mu lina lya AMBUJE kuti ngasinimwulaga.

⁹ Nambo m'mwejo mkaleka kumpa cilango jwalakweju. Atamose kuti acekulwipe, m'mwejo mli ŵalunda, tim'manyilile mwasyene yakutenda kuti awulajidwe basi.”

Ciwa ca Daudi

¹⁰ Myoyo Daudi ŵawile, nipo ŵamŵisile mwilembe mu msinda wa Yelusalemu.

¹¹ Daudi ŵawile ali mwenye jwa Isalaeli kwa yaka makumi mcece. Ŵalamulile ku Hebuloni yaka msano ni yiŵili, ni ku Yelusalemu yaka 30.

¹² Myoyo Solomoni ŵajinjile ucimwene wa Daudi babagwe. Nipo ucimwene wakwe waliji wakutamilicika mnope.

Ciwa ca Adoniya

¹³ Lisiku line Adoniya, mwanace jwa Hagiti, ŵajawile kwa Betisheba, mama ŵawo Solomoni. Betisheba ŵamwusisye kuti, “Ana kwambone?” Jwalakwe ŵajanjile kuti, “Elo, kwambone.”

¹⁴ Ni ŵatite, “Nambo ngwete maloŵe gakuti mbecete ni wawo.” Betisheba ŵatite, “Ŵecetani mbikane.”

¹⁵ Adoniya ŵajanjile kuti, “Wawo akumanyilila cenene kuti ucimwene welewu waliji wa uneji, nipo Aisalaeli wosope ŵajembeceyaga kuti tinjilamulila une. Nambo yindu yigalawice, ucimwenewo upite kwa mpwanga, mwa kusosa kwawo AMBUJE.

¹⁶ Sambano ngwaŵenda cindu cimo. Conde akanganya.” Betisheba ŵatite, “Salani mbikane.”

¹⁷ Jwalakwejo ŵatite, “Wawo akamŵende Mwenye Solomoni, kuti conde ambe une Abishagi, mwali jwa ku Shunemu jula, kuti aŵe ŵamkwangu. Ngumanyilila kuti ŵalakwe ngaja kwakanya.”

¹⁸ “Cambone,” “Une tingamŵecetele kwa mwenye.” Betisheba ŵajanjile myoyo.

¹⁹ Myoyo Betisheba ŵajaŵile kwa Mwenye Solomoni kuja kuŵeceta nawo m'malo mwa Adoniya. Mwenye ŵajimi kwakomasya ni kwajinamila mama ŵawo. Ni ŵatemi pa mpando wawo wa ucimwene. Ni ŵaŵilasisye mpando wine soni kuti mama ŵawowo atame. Myoyo mama ŵawo ŵala ŵatemi pa mpando ca ku mkono wamlyo wa mwenye.

²⁰ Nipo mama ŵawowo ŵatite, “Ngusosa kwaŵenda kandu kamnono. Conde akasanganya.” Mwenye ŵasalile mama ŵawowo kuti, “Aŵende mama cakusosa, une nginakanya.”

²¹ Mamawo ŵatite, “Akunde kuti Adoniya ŵali akulu ŵawo, alombele Abishagi, mwali jwa ku Shunemu jula.”

²² Mwenye Solomoni ŵawusisye mama ŵawowo kuti, “Akuti cici mama? Ligongo lyakwe ni lyakuti uli kuti nakunde acimwene kuti alombele Abishagi? Ni sambano tambusye soni kuti mbelece ucimwene wangu kwa acimwenewo pakuŵa ali ŵakulungwa. Soni jemanjajo akukamulana ni Abiyatala jwakutaga mbopesi ni Yowabu mwanace jwa Seluya.”

²³ Papopo Mwenye Solomoni ŵalumbile mu lina lya AMBUJE kuti, “Ngulumbila mu lina lya Ambuje kuti Adoniya tawulajidwe ligongo lya cindu caŵendile. Naga ngakuwa lelo, ngwaŵenda Mlungu kuti ambulaje une.

²⁴ AMBUJE ŵasagwile ni kundamika une pa mpando wa ucimwene wa baba ŵangu Daudi, awupelece ucimwene kwa une ni kwa ŵanace ŵangu mpela muŵaŵicile AMBUJEWO cilanga. Ni ngulumbila mu lina lya AMBUJE ŵa umi kuti Adoniya tawulajidwe lelo jino.”

²⁵ Myoyo Mwenye Solomoni ŵamlamwile Benaya mwanace jwa Yehoyada kuti akamwulaje Adoniya, nipo Adoniya ŵawile.

Kutoposyedwa kwa Abiyatala ni ciwa ca Yowabu

²⁶ Mwenye Solomoni ŵamsalile Abiyatala jwakutaga mbopesi kuti, “Mjawule kumangwenu ku Anatoti. Ligongo m'mwejo mkwenela kuwa, nambo nginimwulaga sambano jino, pakuŵa mwaliji mkusunga Libokosi lya Cilanga ca AMBUJE, pa ndaŵi jimwaliji ni baba ŵangu Daudi, soni yisawusyo yiŵasimene nayo babawo, nomwe ŵakwe mwalasile nawo.”

²⁷ Myoyo Solomoni ŵamtyosisye Abiyatala pa masengo gakwe gakutaga mbopesi kwa AMBUJE. Pakutenda myoyo Solomoni ŵayitesile yiŵaŵecete AMBUJE ku Shilo, ya liŵasa lya Eli.

²⁸ Yowabu ni mundu jumo juŵamkamucisye Adoniya kuti aŵe mwenye, nambo nganamkamucisya Abisalomu. Ni Yowabu piŵapikene kuti Adoniya awulajidwe, ŵawutucile ku Tenti Jeswela ja AMBUJE ni ŵajile kukamula songa sya ndumba sya malo gakupelecela mbopesi.

²⁹ Mwenye Solomoni piŵapikene kuti Yowabu atilile ku Tenti Jeswela ja AMBUJE, ni kuti atemi mungulugulu mwa malo gakupelecela mbopesi, ŵamtumile Benaya mwanace jwa Yehoyada kuti akamwulaje Yowabujo.

³⁰ Myoyo Benaya ŵajawile ku Tenti Jeswela ja AMBUJE jila, ni ŵamsalile Yowabu jula kuti, “Mwenye akumlamula m'mwejo kuti mkopoce mwelemo.” Nambo Yowabu ŵajanjile kuti, “Iyayi, une timbwile munomuno.” Benaya ŵawusile kuja kukumsalila mwenye yiŵaŵecete Yowabu.

^31-32 Mwenye ŵamjanjile Benaya kuti, “Jawulani mkatende mwaŵecetele jwalakwejo. Mkamwulaje, ni mkamŵice mwilembe. Pakutenda myoyo timundyocesye une pamo ni liŵasa lyosope lya baba ŵangu Daudi magambo ga yindu yakusakala yiŵatesile Yowabu, pakwawulaga Abinele jwakulongolela jwa asilikali ŵa ku Isalaeli, ni soni Amasa jwakulongolela jwa asilikali ŵa ku Yuda. Ŵawuleje ŵandu ŵeleŵa ŵangalemwa kandu, mwangamanyilila baba ŵangu Daudi. Ŵandu ŵaŵawulejewo ŵaliji ŵandu ŵambone kulekangana ni jwalakwejo. Sambano AMBUJE tampe cilango Yowabujo ligongo lya kwawulaga wele ŵanduwo.

³³ Cilango ca yiwa ya wele ŵanduwo ticiŵe pa Yowabu ni pa yisukulu yakwe kwa yaka yosope, nambo AMBUJE taŵe ali mkupeleka upile ndaŵi syosope pa liŵasa lya Daudi ni pa yisukulu yakwe ya kwinjila ucimwene wakwe kwa yaka yosope.”

³⁴ Benaya ŵajawile ku Tenti Jeswela ja AMBUJE ni ŵamwuleje Yowabu, mtembo wakwe ŵawujigele kuja kuwuŵika mwilembe kumangwawo kucipululu.

³⁵ Myoyo Mwenye Solomoni ŵamŵisile Benaya kuwa jwakulongolela jwa ngondo m'malo mwa Yowabu, ni Sadoki jwakutaga mbopesi kwinjila m'malo mwa Abiyatala.

Ciwa ca Shimeyi

³⁶ Mwenye Solomoni ŵatumile ŵandu kuja kumŵilanga Shimeyi, piŵayice mwenye ŵamsalile kuti, “Mtaŵe nyumba jenu mu Yelusalemu muno. Mtameje mu msindawu ngakopoka kuja kwendajenda kwine kulikose.

³⁷ Naga mkukopoka mu msindawu ni komboka Lusulo lwa Kidiloni, mwangakayicila timciwulajidwa. Magambo gakwe tigaciŵa pa mtwe penu mwasyene.”

³⁸ Shimeyi ŵamjanjile mwenye kuti, “Yasasileyi yili yindu yambone. Une ambuje, tindende mwaŵecetelemo.” Myoyo Shimeyi ŵatemi mu Yelusalemu masiku gamajinji.

³⁹ Pali papite yaka yitatu, acikapolo ŵaŵili ŵa Shimeyi ŵatisile kuja kwa Mwenye Akishi, mwanace jwa Maaka, jwa cilambo ca Gati. Piŵapikene Shimeyi kuti acikapolo ŵakwe atilile ku Gati,

⁴⁰ ŵakwesile bulu kwawula ku Gati, kwa Mwenye Akishi kuja kukwasosa acikapolo ŵakwe. Ŵajile kwasimana acikapolo ŵala ku Gatiko, ni ŵajigele kuwuja nawo ku Yelusalemu.

⁴¹ Piŵapikene Solomoni kuti Shimeyi ŵakopwece mu msinda wa Yelusalemu kuja ku Gati, ni kuti awusileko,

⁴² ŵamtumile mundu kuja kumŵilanga Shimeyijo, ni ŵamwusisye kuti, “Ana ngininamlumbilisya m'mwejo pa lina lya AMBUJE kuti mkakopoka mu msinda muno wa Yelusalemu, soni namgombelecesye kuti naga mkukopoka mu msinda awuno timciwa. Nipo m'mwejo mwajiticisye kuti timtende yinamsalileyo.

⁴³ Nambi ligongo cici nganimsunga cilanga cimwalumbilile kwa AMBUJE, soni ligongo cici mkasile malamusi gangu?

⁴⁴ M'mwejo mkumanyilila mu mtima mwenumo yindu yosope yakusakala yimwatesile baba ŵangu Daudi. Sambano AMBUJE tampe cilango m'mwejo ligongo lya yindu yakusakala yimwatesileyo.

⁴⁵ Nambo AMBUJE tambe une upile, ni ucimwene wa Daudi tiwuciŵa wamacili kwa yaka yosope.”

⁴⁶ Papopo Mwenye Solomoni ŵamlamwile Benaya kuti amwulaje Shimeyi. Nipo Benaya ŵamkopwesye kusa Shimeyi ni ŵamwuleje. Sambano Mwenye Solomoni ŵakwete macili gakulamulila cilambo cosope, pangali jwine jwakumjogopa.