1 Ayi 19 - Chiyawo Bible

Eliya Petumbi lya Sinayi

¹ Mwenye Ahabu ŵamsalile Yesebele ŵamkwawo, yindu yosope yiŵatesile Eliya* yila, ni soni kuti ŵawuleje ŵakulocesya wosope ŵa Baala ni upanga.

² Yesebele ŵamtumile mundu kuti akamsalile Eliya kuti, “Milungu tujimbulaje naga une ngangumwulaga m'mwejo malaŵi ndaŵi mpela jinojino, mpela mumwawulajile ŵakulocesya ŵala.”

³ Eliya ŵatesile woga, nipo ŵatisile kuti awukulupusye umi wakwe. Ŵamjigele jwakutumicila jwakwe ni ŵajile kwika ku Belesheba, msinda wacilambo ca ku Yuda, ŵamlesile jwakutumicilajo kweleko.

⁴ Nipo Eliya ŵajesile ulendo ŵa lisiku limo mcipululu. Nipo pambesi pakwe, ŵajimi ni kutama pasi pam'bwilili wa citela. Ŵaŵendile kwa AMBUJE* kuti awe, ŵatite, “Yimbesisye sambano! Ŵalakwe AMBUJE, angunde kuti une ngambe kuwa! Une ngaŵa mkwapunda acinangolo ŵangu.”

⁵ Ali amasile kuŵecetako, ŵagonile lugono pasi pam'bwilili wa citela cila. Mwacisisimucisya lilayika lyamtenganyisye kumjimusya Eliya, lyamsalile kuti, “Jimukani, mlye.”

⁶ Piŵalolite aku nakuku, ŵagambile kulola kumitwe kwakwe kuti kwana mkate wejoce pa makala, soni lulo lwana mesi. Ŵalile mkatewo ni kum'mwela mesi, nipo ŵagonile soni.

⁷ Lilayika lya AMBUJE lila lyayice kaŵili kukumtenganya ni kumjimusya Eliya, lyamsalile kuti, “Jimukani, mlye ni mkaŵa kuwulepela ulendowu.”

⁸ Eliya ŵala ŵajimwice, ŵalile mkate ni kumwela mesi. Nipo cakulyaco campele macili gakupakombola kwenda ulendo wa masiku 40 mpaka kuja kwika ku Sinayi, Litumbi lya Mlungu.

⁹ Kweleko ŵajile kuyicila mu mbanga, ni ŵagonile mwelemo. Mwacisisimucisya AMBUJE ŵamwusisye kuti, “Eliya, ligongo cici mli akuno?”

¹⁰ Jwalakwe ŵajanjile kuti, “Ŵalakwe AMBUJE, Mlungu Ŵamaciligosope, une natumicile ŵalakwe jikape, ndaŵi josopeji. Nambo ŵandu ŵa ku Isalaeli akasile cilanga* ciŵapangene ni ŵalakwe. Nipo agumwile malo ga ŵalakwe gakupelecela mbopesi, ni kwawulaga ŵakulocesya ŵawo ni upanga. Sigele une jikape basi. Sambano ŵanduwo akusosasosa une kuti ambulaje.”

¹¹ AMBUJE ŵamsalile kuti, “Mkopoce, mkajime petumbi, ngusosa kuti mkalole pitingapiteje une.” Mwacisisimucila, mbungo jamacili japapulenye matumbi ni kugakasanya maganga, nambo AMBUJE nginaŵa mu mbungojo. Jili jipite mbungojo, catesile cisukunya, nambo AMBUJE nginaŵa mcisukunyaco.

¹² Cili cipite cisukunya cila, wayice moto, nambo AMBUJE nginaŵa m'motomo. Uli upite motowo, kapikanice kambungo kagamba kuti sisisi.

¹³ Eliya piŵakapikene kambungoko, ŵaliwunicile ngope jakwe ni malaja, ŵakopwece ni ŵajile kwima pa mlango wakwinjilila mu mbanga. Papopo papikanice maloŵe gakumwusya kuti, “Eliya, ligongo cici mli akuno?”

¹⁴ Jwalakwe ŵajanjile kuti, “Ŵalakwe AMBUJE, Mlungu Ŵamaciligosope, une natumicile ŵalakwe jikape ndaŵi josopeji. Nambo ŵandu ŵa ku Isalaeli akasile cilanga ciŵapangene ni ŵalakwe. Nipo agumwile malo ga ŵalakwe gakupelecela mbopesi, ni kwawulaga ŵakulocesya ŵawo ni upanga. Sigele une jikape basi. Sambano ŵanduwo akusosasosa une kuti ambulaje.”

¹⁵ AMBUJE ŵamsalile kuti, “Mwujile, mjinjilile litala lyakwawula ku cipululu ca ku Damasiko. Patimkayice kweleko, mkajinjile mu msindawo ni mkapakasye mawuta Hasaele, kuti akaŵe mwenye jwa ku Siliya.

¹⁶ Mkampakasye Yehu mwanace jwa Nimishi mawuta, kuti akaŵe mwenye jwa ku Isalaeli. Mkapakasye soni Elisha mwanace jwa Shafati jwa ku Abele Mehola, kuti aŵe jwakulocesya* jwakwinjila m'malo mwenu.

¹⁷ Jwalijose jutacikulupuka jwangawulajidwa ni Hasaele, taciwulajidwa ni Yehu. Jutacikulupuka jwangawulajidwa ni Yehu, taciwulajidwa ni Elisha.

¹⁸ Nambo ku Isalaeli tinasunje ŵandu 7,000 ŵacijumi, ŵandu ŵele ŵakumbikanila une, soni ŵakanile kumlambila Baala.”*

AMBUJE akumŵilanga Elisha

¹⁹ Eliya ŵatyosile ni ŵajile kumsimana Elisha ali mkulima mu mgunda ni pulawo jakuwutidwa ni ng'ombe siŵili. Ŵapali ŵandu msano ni jumo pasogolo pa jwalakwe, jwalijose ŵaliji mkulima ni pulawo jakuwutidwa ni ng'ombe siŵili. Eliya ŵayice kuŵaliji jwalakwejo, ŵawusile malaja gakwe ni ŵam'wecice Elisha.

²⁰ Ndaŵi jijojo Elisha ŵalesile kulima ni ng'ombe syakwesyo, ni ŵamwutucile Eliya jula ni ŵamŵendile kuti, “Conde, angunde kuti njawule ngalanje baba ŵangu ni mama ŵangu, nipo panyuma pakwe tinakuye.” Eliya ŵamjanjile jwalakwe kuti, “Jawulani, ana une mpela namlekasisye?”

²¹ Elisha ŵawujilile, ni ŵasijigele ng'ombe syakwe siŵili sila, ni ŵasiwuleje. Ŵajigele makongwa gaŵasitaŵililaga ng'ombesyo, ni ŵagatesile sasu syakutelecela nyamajo, nipo ŵajipelece nyamajo kwa ŵandu kuti alye. Panyuma pakwe ŵaliji mkwenda ni Eliya, ni ŵaliji mkumtumicila.