1 Ayi 18 - Chiyawo Bible

Eliya ni Obadiya

^1-2 Mu caka catatu cilecele ula kugwa mu Samaliya, nipo sala jili jiyice pakusakala mnope mcilambomo. AMBUJE* ŵamsalile Eliya* kuti, “Mjawule mkawonegane ni Mwenye Ahabu, nipo tingwisye ula pangakaŵa.” Myoyo Eliya ŵajawile kuja kuwonegana ni Ahabu.

³ Mwenye Ahabu ŵamŵilasile Obadiya, mundu juŵalolelaga yosope ya ku nyumba ja ucimwene. (Jwalakwe ŵaliji mkwatumicila AMBUJE.

⁴ Ndaŵi jele Yesebele ŵawulagaga ŵakulocesya ŵa AMBUJE, Obadiya ŵasisile ŵakulocesya 100. Ŵakulocesya 50 ŵasisile mu mbanga jine, 50 ŵane mu mbanga jine soni, ni ŵapaga yakulya ni mesi).

⁵ Ahabu ŵamsalile Obadiya kuti, “Kwende tucijendele cilambo cosope, tukalole mu yisima yosope ya mesi, ni tujawule soni mu yiŵata yosope. Kuti mwine mwakwe tukomboleka kupata manyasi gakulicisya mahaci ni abulu ŵetu kuti akole umi.”

⁶ Myoyo Ahabu ni Obadiya ŵagaŵene mbali ja cilamboco jakuti acijendele. Ahabu ŵajinjile mbali jine, Obadiya mbali jine soni.

⁷ Obadiya ali pa ulendo ŵakwe, ŵasimene ni jwakulocesya* Eliya. Obadiya ŵam'manyilile Eliyajo, ŵamjinamile nipo ŵamwusisye kuti, “Ana ŵalakwe kweli ali ambuje ŵangu Eliya?”

⁸ Eliya ŵajanjile kuti, “Elo, ni uneji. Mjawule mkasalile ambuje ŵenu kuti Eliya ayice.”

⁹ Obadiya ŵamwusisye Eliya kuti, “Ana une ndemwisye cici, kuti ŵalakwe ambelece une jwakutumicila jwawo m'magasa mwa Ahabu kuti ambulaje?

¹⁰ Ngulumbila pali AMBUJE Mlungu jwenu ŵacijumi, kuti pangali cilambo cele Ahabu camkiniŵatuma ŵandu kuja kumlolesya m'mwejo. Naga jwakulamula cilambo ciŵatumisye Ahabu ŵandu, kuja kumsosa m'mwejo akusala kuti, kwangali Eliya akuno. Ahabu ŵaliji mkulumbilisya jwakulamula jwa cilambo celeco, kuti jwalakwe asimicisye kuti yili yakuwona, kuti ŵalakwe kwangali mcilambo mwakwemo.

¹¹ Ni sambano ŵalakwe akusosa kuti une njawule ngasalile ambuje ŵanguwo kuti ŵalakwe ayice?

¹² Nambi mwine une pitindyoce apano, msimu wa AMBUJE tiŵatyosye ŵalakwe apano, kwawula nawo ŵalakwe kumalo kwangakumanyilila une. Sambano patingamsalile Ahabu, nipo pataciyika apano ngasimana ŵalakwe, nditu tacimbulaga une. Akumbucile ŵalakwe kuti une jwakutumicila jwawo, mbele ndili mkwatumicila AMBUJE kutandilila ndili mcanda.

¹³ Ana ŵalakwe ambuje ŵangu, nganapikana kuti pa ndaŵi jele Yesebele ŵawulagaga ŵakulocesya ŵa AMBUJE, une nasisile ŵakulocesya ŵa Ambujewo 100, ŵandu 50 mu mbanga jimo, 50 ŵane mu mbanga jine, ni kuti naliji mkwapa yakulya ni mesi gakumwa?

¹⁴ Sambano ligongo cici ŵalakwe akunduma une kuti ngasalile mwenye kuti ŵalakwe ayice? Nditu ngwasalila kuti ŵalakwewo tambulaje une!”

¹⁵ Eliya ŵajanjile kuti, “Ngulumbila pa lina lya AMBUJE ŵa cijumi, ŵingwatumicila une, asyene Ŵamaciligosope, kuti une lelo timbonegane nawo Mwenye Ahabu.”

¹⁶ Myoyo Obadiya ŵajawile kwa Mwenye Ahabu kuja kwasalila malo gakuja kumsimana Eliya. Nipo Ahabu ŵajawile kuja kuwonegana najo Eliya.

¹⁷ Nipo Ahabu piŵam'weni Eliya ŵakalipe, ali mkusala kuti, “Ana paja m'mwe ni mundu jumkwasawusya Aisalaeli, kweli myice akuno?”

¹⁸ Eliya ŵajanjile kuti, “Jwakwasawusya ŵandu ŵa ku Isalaeli ngaŵa une, nambo ŵalakwe ni liŵasa lya baba ŵawo, ligongo alesile Malamusi ga AMBUJE nipo akutumicila Baala.*

¹⁹ Sambano ŵasalile ŵandu wosope ŵa ku Isalaeli, kuti ayice, ngasimane nawo Kwitumbi lya Kalimeli. Ayice ni ŵakulocesya ŵa Baala 450, ni ŵakulocesya 400 ŵa mlungu jwakolanjidwa kuti Ashela, ŵele ŵakukamucisidwa ni Yesebele.”

²⁰ Myoyo Ahabu ŵaŵilasile Aisalaeli wosope, ni ŵakulocesya ŵa Baala, kuti akasimane Kwitumbi lya Kalimeli.

²¹ Eliya ŵajimi pasogolo pa ŵanduwo ni ŵasalile kuti, “Ana timtame ŵandu ŵa mitima jiŵili mpaka cakaci? Naga AMBUJE ni ŵali Mlungu mwalambileje ŵelewo. Nambo naga Baala ni jwali Mlungu, mumlambileje jwalakwejo.” Ŵanduwo nganajanga maloŵe galigose.

²² Eliya ŵasalile ŵandu ŵala kuti, “Une sigele jika jwakulocesya jwa AMBUJE, nambo ŵakulocesya ŵa Baala apali 450.

²³ Myice nasyo ng'ombe sya mkambako siŵili. Ŵakulocesya ŵa Baala asagule acimsyene ng'ombe jimo, ajiwulaje, ni ajikatanye ndulinduli, nipo asiŵice pacanya pa sasu ndulisyo, nambo akakolesya moto. None jwakwe tindende yalumope ni ng'ombe jinejo.

²⁴ Nipo ŵakulocesya ŵa Baala apopele kwa mlungu jwawo, soni une timbopele kwa AMBUJE, nipo jutajanje mapopelo pakutumisya moto, jwelejo kweli ni Mlungu.” Ŵandu ŵala ŵajanjile kuti, pelepo, aŵecete cenene.

²⁵ Nipo Eliya ŵasalile ŵakulocesya ŵa Baala ŵala kuti, “Mlongole jemanja. Msagule ng'ombe jimo ja mkambako, mjikolosye cenene, pakuŵapo jemanja mli ŵajinji. Nipo mpopele kwa mlungu jwenu, nambo mkakolesya moto.”

²⁶ Jemanjajo ŵajijigele ng'ombe jamkambako jiŵapelejo, ŵajiwuleje, ni ŵajikolosisye cenene. Nipo ŵapopesile kwa Baala kutandila kundaŵi mpakana musi, ŵaliji mkugumila kuti, “Ŵalakwe Baala, atujanje uwe.” Ŵakulocesya ŵa Baala ŵala ŵaliji mkuŵina, ali mkugasyungulila malo gakupelecela mbopesi gaŵataŵile. Nambo Baalajo nganiŵajanga.

²⁷ Ndaŵi ja musi Eliya ŵatandite kwaseka jemanjajo, ni ŵasalile kuti, “Mpopele mwagumila, ana ngati mkuti jwelejo ali mlungu! Mwine mwakwe gamtupile masengo, kapena apite kwine kuja kulikamucisya, mwine ali pa ulendo, kapena mwine ali mlugono, nipo mkwenela kumjimusya.”

²⁸ Myoyo ŵakulocesya ŵa Baalawo ŵagumisile mnope, ŵaliji mkulikapa pa cilu ni yipula ni yikwanje, pakuya misyungu jawo, mpaka jakopwece miasi m'maŵanga gaŵalikapagago.

²⁹ Ŵapitilisye kugumila musi wosope mpaka ndaŵi jakutaga mbopesi jakwanile, nambo paliji pangali jwakwajanga, soni nganilipikanika liloŵe lili lyose.

³⁰ Nipo Eliya ŵasalile ŵandu ŵala kuti, “Msejele ni kuŵandicila kundili une.” Ŵandu wosope ŵala ŵasejelele kuŵaliji jwalakwe. Jwalakwejo ŵatandite kutaŵa soni malo gakupelecela mbopesi ga AMBUJE, gigagumulidwe.

³¹ Ŵajigele maganga likumi kwisa gaŵili, liganga lililyose lyajimilaga mitundu likumi kwisa jiŵili ja ŵanace ŵa Yakobo,* mundu juŵampele AMBUJE lina lyakuti Isalaeli.

³² Ŵataŵile malo gakupelecela mbopesi ja kwalambila AMBUJE ni gele magangago. Ŵasosile ngalande kusyungulila malo gakupelecela mbopesigo. Ukulu wangalande waliji ŵakomboleka kukwanila mesi ga malita likumi kwisa mcece.

³³ Nipo ŵasiŵisile sasu pacanya pa malo gakupelecela mbopesi, ni ŵajiwuleje ng'ombe jila ni kujikatanya ndulinduli, ni ŵasiŵisile ndulisyo pacanya pasasupo. Panyuma pakwe ŵasalile ŵandu ŵala kuti, “Mgumbasye mesi malulo mcece, nipo mgataje mesigo pa nyama ja mbopesi, ni pasasusyo.” Ŵanduwo ŵagatasile mesigo.

³⁴ Ni ŵasalile soni kuti, “Mtaje soni kaŵili.” Ŵandu ŵala ŵatasile soni mesi kaŵili. Ŵasalile soni kuti, “Mtaje soni katatu.” Ŵandu ŵala ŵatesile myoyo.

³⁵ Mesigo gajendelele pa malo gakupelecela mbopesi gala, ni gagumbele mu ngalande jila.

³⁶ Jili jikwanile ndaŵi jakupelecela mbopesi ja ligulo, jwakulocesya Eliya ŵasejelele kuŵandicila ku malo gakupelecela mbopesi, ni ŵapopesile kuti, “Ŵalakwe AMBUJE, Mlungu jwa Abulahamu,* Isaki ni Yakobo, lelo yimanyice kuti ŵalakwe ali Mlungu jwa Aisalaeli, ni soni kuti une ndili jwakutumicila jwa ŵalakwe, ni soni kuti nayitesile yindu yosopeyi ligongo lyakuti asasile ŵalakwe.

³⁷ Anjanje une, ŵalakwe AMBUJE, anjanje kuti ŵanduŵa amanyilile kuti ŵalakwe AMBUJE ali Mlungu, ni kuti soni ŵandu ŵeleŵa apitikucile mitima jawo kwa ŵalakwe.”

³⁸ Ndaŵi jijojo AMBUJE ŵatumisye moto, ni watinisye mbopesi jila, sasu sila, maganga gala ni mataka gakwe. Motowo wapwesisye soni mesi galiji mu ngalande mula.

³⁹ Ŵandu ŵala piŵalolite yindu yeleyo, ŵaligwisisye pasi nipo ŵagumisile kuti, “AMBUJE wawo kweli ali Mlungu! AMBUJE ni ŵali kweli Mlungu!”

⁴⁰ Ndaŵi jijojo Eliya ŵalamwile kuti, “Mwakamule ŵakulocesya wosope ŵa Baala. Akasakulupuka jwalijose.” Myoyo ŵandu ŵakamwile ŵakulocesya ŵa Baala wosope ŵene ŵala. Nipo Eliya ŵajawile nawo ŵakulocesyawo ku Lusulo lwa Kishoni, ni ŵawulajile kukoko.

Kuyika soni kwa ula

⁴¹ Nipo Eliya ŵamsalile Mwenye Ahabu kuti, “Ajawule akalye ni kumwa, pakuŵa kukupikanika kukokoma kwa ula.”

⁴² Ndaŵi jiŵatyosile Ahabu kuja kulya, Eliya ŵakwesile penani Petumbi lya Kalimeli. Kweleko ŵajinamile ngope jakwe pasi, ni ŵaŵisile mtwe wakwe pasikati pa malungo gakwe.

⁴³ Ni ŵamsalile jwakutumicila jwakwe kuti, “Mjawule nipo mkalole mbali ja ku nyasa.” Jwakutumicilajo ŵajawile kuja kulola, ni ŵatite, “Kwangali kandu kalikose.” Eliya ŵamsalile soni kuti, “Mjawule kasano ni kaŵili.”

⁴⁴ Pakuwuja jwakutumicilajo, pa ulendo wakwe wa kasano ni kaŵili, ŵatite kuti, “Nguliwona liwunde lya mwana likukopoka, lya mwana mpela ligasa.” Eliya ŵamsalile jwakutumicilajo kuti, “Mkasalile Mwenye Ahabu kuti akolosye ligeleta lyawo nipo ajawuleje, nimkaŵa kwasiŵila ula.”

⁴⁵ Pangatamilisya kwinani kwagambile kuŵa bii ni mawunde, mbungo japujile nipo ula jatandite kugwa. Mwenye Ahabu ŵakwesile ligeleta lyawo ni ŵajawile ku Yesilele.

⁴⁶ AMBUJE ŵampele Eliya macili, ŵakwindile cakuwala cakwe, ni ŵawutwice kwamacili mpaka ŵampelete Ahabu. Ŵalongolele jwalakwe kuja kwika ku cipata ca msinda wa Yesilele.