1 Ayi 17 - Chiyawo Bible

Jwakulocesya Eliya akulekasya ula

¹ Eliya* ŵaliji mundu jwakulocesya* jwakutyocela m'musi wa Tishibe ku Giliyadi. Lisiku line ŵajile kwa Mwenye Ahabu ni ŵamsalile kuti, “Mu lina lya AMBUJE,* Mlungu jwacijumi jwa Aisalaeli, jwele jungumtumicila une, ngumsalila kuti ngigapagwa mangame kapena ula mu yaka yiŵili kapena yitatu yikwisayi, mpaka patinjiŵeceta une.”

² Kaneko AMBUJE ŵamsalile Eliya kuti,

³ “Mtyoce akuno, mjawule ca kungopoko lyuŵa, mkajuŵe ku Lusulo lwa Keliti, ca kungopoko lyuŵa kwa Yolodani.

⁴ Mkamweje mesi ga mu lusulomo, nipo nigalamwile makungulu kuti gakamlisyeje kweleko.”

⁵ Eliya ŵatesile yosope yiŵalamwile AMBUJE. Ŵajawile kuja kutama mungulugulu mwa Lusulo lwa Keliti, kungopoko lyuŵa kwa Yolodani.

⁶ Myoyo makungulu gayikaga kukumpa mkate ni nyama kundaŵi kulikose ni ligulo lililyose. Ni ŵamwaga mesi ga mu lusulomo.

⁷ Palipapite kandaŵi, lusulolo lwapwele, pakuŵa kwaliji kwangali ula mcilambomo.

Eliya ni jwamkongwe jwamasije jwa ku Selefati

⁸ Myoyo AMBUJE ŵamsalile Eliya kuti,

⁹ “Sambano mjawule ku Salefati, musi wa ku Sidoni, nipo mkatame kweleko. Nimlamwile jwamkongwe jwamasije jwakutama kweleko kuti akamlisyeje.”

¹⁰ Myoyo Eliya ŵajawile ku Selefati. Piŵaŵandicile pa cipata cakwinjilila m'musi wa Selefatiwo, ŵam'weni jwamkongwe jwamasije ali mkulokota sasu. Ŵamŵilasile jwamkongwejo ni ŵamsalile kuti, “Angaŵile mesi panandi, kuti mwe.”

¹¹ Ndaŵi jiŵajawulaga jwamkongwejo kuja kuteka mesigo, Eliya ŵamŵilasile soni ni ŵamsalile kuti, “Akanjigalile soni mkate.”

¹² Pelepo jwamkongwejo ŵajanjile kuti, “Pali AMBUJE, Mlungu jwenu jwa cijumi, une nganingola mkate uliwose. Nambo ngwete utandi panandi mciŵiga ni mawuta panandi mwibotolo. Une nayice kukulokota sasu kuti ngatelecele kawutandiko, kuti ngalye une ni mwanace jwangu, celeco cikaŵe cakulya cetu cakumalisya, kaneko basi tukawe ni sala.”

¹³ Nambo Eliya ŵamsalile jwamkongwejo kuti, “Mkasadandawula. Mjawule, mkatelece cakulya cawoco. Nambo pandanda mkasapule katandi panandi, mkandelecele une ka mkate, ni myice nako akuno. Kaneko mkatelece soni mkate kuti mkalye m'mwejo ni mwanagwenujo.

¹⁴ AMBUJE, Mlungu jwa Aisalaeli, akusala kuti, ‘Utandi uli mciŵigamo ngasiwumala, soni mawuta gali mwibotolomo ngasigamala, mpaka pa lisiku lyele Une, AMBUJE tinjipeleka ula pa cilambo cosope capasi.’ ”

¹⁵ Myoyo jwamkongwe jwa masije jula ŵajawile kuja kutenda mpela mwele Eliya ŵaŵecetele. Jwamkongwejo ni Eliya, soni ni wosope ŵapeŵasa lya jwamkongwejo ŵalile utandiwo kwa masiku gejinji.

¹⁶ Utandi ŵaliji mciŵiga mula nganiwumala, ni mawuta galiji mwibotolo mula nginigamala soni, mpela mwele AMBUJE ŵaŵecetele kupitila mwa Eliya.

¹⁷ Lisiku mwanace jwamlume jwa jwamkongwe jwamasije, msyene nyumba jula ŵalwasile. Ulwele wakusile mnope, mpaka mwanacejo ŵawile.

¹⁸ Jwamkongwe jula ŵamwusisye Eliya kuti, “Ana nalemwecesye cici, ŵalakwe ŵakulocesya ŵa Mlungu? Ana ŵalakwe ayice kwa une kuno kwisa kukumkumbusya Mlungu ulemwa* wangu ni kuti mwanangu awe?”

¹⁹ Eliya ŵamsalile jwamkongwejo kuti, “Myice najo mwanacejo kwa une.” Myoyo Eliya ŵamjigele mwanace jula m'myala mwa mamagwe, ni ŵajile najo ku cipinda capenani, kuŵagonaga jwalakwe. Nipo Eliya ŵajile kumgoneka mwanacejo pa cindanda cakwe.

²⁰ Nipo ŵapopesile Eliya mwakwadandawulila AMBUJE kuti, “Ŵalakwe AMBUJE, Mlungu jwangu, ligongo cici amtendele yindu yakusakala ya mtundu welewu, jwamkongwe jwa masije jwakusunga uneju? Ligongo cici ŵalakwe akundile kuti mwanace jwakwe awe?”

²¹ Nipo ŵamkumbatile mwanacejo katatu, ni ŵapopesile mwakwadandawulila AMBUJE kuti, “Ŵalakwe AMBUJE, Mlungu jwangu, amwucisye umi wakwe mwanaceju.”

²² Nipo AMBUJE ŵalijanjile lipopelo lya Eliya. Ndaŵi jijojo umi wa mwanace jula ŵawujile mwa jwalakwe, nipo ŵatandite soni kupumula.

²³ Eliya ŵamjigele mwanace jula, ni ŵatulwice najo kutyoka mcipinda ca penani cila, nipo ŵampelece kwa mamagwe. Ŵasalile mamagwewo kuti, “Mlole, mwanace jwenu ali cijumi.”

²⁴ Jwamkongwe jula ŵamsalile Eliya kuti, “Sambano ngumanyilila kuti ŵalakwe ali mundu jwa Mlungu, nipo kuti AMBUJE akuŵeceta kupitila mwa ŵalakwe.”