1 Ayi 16 - Chiyawo Bible

¹ AMBUJE* ŵamtumile jwakulocesya* jwawo Yehu, mwanace jwamlume jwa Hanani, kuti akasale maloŵe aga kwa Basha.

² “M'mweji nganimŵa kandu kose, une namkwesisye m'mwejo kuti mŵe jwakwalongolela ŵandu ŵangu ŵa ku Isalaeli. Nambo yindu yimkutenda ngamkulekangana ni yiŵatesile Yelobowamu. Soni mwalongolele ŵandu ŵangu kuti alemwe, nipo ulemwa* wawo wundumbilisye une.

³ Tinimjonanje m'mwejo pamo ni liŵasa lyenu lyosope, mpela munatendele ni liŵasa lya Yelobowamu.

⁴ Jwalijose jwa mwiŵasa mwenu jutaciwila mu msinda, tacilidwa ni m'mbwa. Jwalijose jutaciwila mwitinji tacilidwa ni yijuni.”

^5-7 Basha ŵamtumbilisye AMBUJE mnope, ni ligongo lyakwe AMBUJEWO ŵamtumisye jwakulocesya Yehu ni maloŵe gelaga kwa Basha ni kwa liŵasa lyakwe lyosope. Basha ŵaliji mkwalemwecesya AMBUJE kaŵilikaŵili, pakusyasya kutenda yakusakala yiŵatendaga Yelobowamu ni ŵandu ŵakwe, ni soni kupunda pelepo jwalakwejo ŵalemwisye pakwawulaga ŵandu wosope ŵa mwiŵasa lya Yelobowamu. Masengo gane gaŵatesile Basha ni yosope ya macili yiŵatesile piŵaliji mwenye, yilembedwe m'buku ja Mbili ja Ayimwene ŵa ku Isalaeli. Basha ŵawile nipo ŵamsicile m'malembe ga ku Tilisa. Nipo Ela mwanace jwakwe, ŵajinjile ucimwene m'malo mwakwe.

Mwenye Ela jwa ku Isalaeli

⁸ Ela mwanace jwa Basha, ŵajinjile ucimwene wa ku Isalaeli ku Tilisa, mu caka ca 26 ca ucimwene wa Asa wa ku Yuda. Nipo ŵalamulile kwa yaka yiŵilipe basi.

⁹ Nipo mundu jwine lina lyakwe Simuli, juŵaliji jwamkulungwa jwakulolela hafu lya mageleta gakwe, ŵamtendele jwalakwejo malindi. Lisiku line Ela ŵaliji ku Tilisa, ŵaliji mkumwa mpakana kukolelwa, ku nyumba ja Alisa, juŵaliji jwamkulungwa jwakulolela nyumba josope ja ucimwene ku Tilisako.

¹⁰ Simuli ŵajinjile m'Nyumbamo ni ŵamwuleje Elajo, nipo jwalakwe ŵajinjile ucimwene m'malo mwakwe. Yeleyi yatendekwe mu caka ca 27 ca ucimwene wa Asa wa ku Yuda.

¹¹ Ali atandite Simuli kulamulila, ŵawuleje ŵandu wosope ŵa mwiŵasa lya Basha. Nginamlecela amta jwamlume kapena mcanda jumo, jwa mwa acalongo acimjakwe, kapena mwa acambusanga ŵakwe.

¹² Myoyo Simuli ŵawuleje ŵandu wosope ŵa mwiŵasa lya Basha, mpela muŵaŵecetele AMBUJE, kupitila mwa Yehu jwakulocesya jula.

¹³ Paja Yehujo ŵamjamwice Basha ligongo lya yindu yakusakala yiŵatesile jwalakwe ni yiŵatesile Ela mwanace jwakwe. Jemanjaji ŵalongolele Aisalaeli kulemwa. Pakulambila milungu ja cilendo. Pakutenda myoyo ŵatumbilisye AMBUJE, Mlungu jwa Aisalaeli.

¹⁴ Masengo gane gaŵatesile Ela piŵaliji mwenye, yilembedwe m'buku ja Mbili ja Ayimwene ŵa ku Isalaeli.

Mwenye Simuli jwa ku Isalaeli

¹⁵ Simuli ŵajinjile ucimwene wa ku Isalaeli ku Tilisa, mu caka ca 27 ca ucimwene wa Mwenye Asa jwa ku Yuda. Nambo ŵalamwile kwa masiku msano ni gaŵilipe basi. Ndaŵi jelejo asilikali ŵa ngondo ŵa Isalaeli ŵaliji ali awusyungulile msinda wa Afilisiti, lina lyakwe Gibitoni.

¹⁶ Nambo asilikali ŵa ngondowo piŵapikene kuti Simuli atesile malindi nipo amwuleje mwenye, lisiku lilyolyo ali ciŵela ku masakasa gawogo, ŵamsagwile Omuli jwakulongolela jwa ngondo kuti aŵe mwenye jwa Aisalaeli.

¹⁷ Myoyo Omuli pamo ni asilikali ŵakwe wosope ŵa ngondo ŵatyosile ku Gibitoni kula, ni ŵajile kuwusyungulila msinda wa Tilisa.

¹⁸ Simuli piŵalolite kuti msinda usumulidwe, ŵatisile kuja kwinjila mcipinda ca mkati mnope ca nyumba ja ucimwene, ni ŵajijocice nyumba ja ucimwenejo ni moto, nipo jwalakwe ŵawile mlilamba lya motolyo.

¹⁹ Simuli ŵawile camti myoyo, ligongo lya ulemwa wuŵatesile pameso pa AMBUJE. Jwalakwejo ŵayikuyisye yitendo yakusakala ya Yelobowamu, ni ŵatendesye Aisalaeli kulemwa.

²⁰ Masengo gane gaŵatesile Simuli piŵaliji mwenye, pamo ni malindi giŵatesile, yilembedwe m'buku ja Mbili ja Ayimwene ŵa ku Isalaeli.

Mwenye Omuli jwa ku Isalaeli

²¹ Piŵawile Shimuli, ŵandu ŵa ku Isalaeli ŵagaŵanice, ŵane ŵamkuyisye Tibini mwanace jwa Ginati, kuti akamjinjisye ucimwene, nipo ŵane ŵiŵamkuyisye Omuli.

²² Pambesi pakwe, ŵandu ŵiŵamkuyisye Omuli ŵapundile pa ngondo, Tibini ŵawile nipo Omuli ŵajinjile ucimwene wa ku Isalaeli.

²³ Jwalakwe ŵajinjile ucimwene welewu mu caka ca 31 ca ucimwene wa Asa wa ku Yuda. Ŵalamulile kwa yaka 12. Yaka msano ni cimo yandanda ŵalamulile ali ku Tilisa.

²⁴ Omuli ŵasumile Litumbi lya Samaliya kwa mundu jwine lina lyakwe Shemeli, pa mtengo wa mbiya 6,000 sya silifa.* Nipo ŵataŵile msinda pelepo ni ŵawupele lina lyakwe Samaliya, pakukuya lina lya Shemeli, msyene jwa litumbi lila jwandanda.

²⁵ Omuli ŵatesile ulemwa wekulungwa pameso pa AMBUJE, ulemwa wakupunda wuŵatesile acayimwene wosope ŵakala.

²⁶ Ŵatesile ulemwa mpela wuŵatesile Yelobowamu, pakwalongolela Aisalaeli kulemwa, ni kujilambila milungu ja cilendo. Pakutenda myoyo ŵamtumbilisye AMBUJE, Mlungu jwa Aisalaeli.

²⁷ Masengo gosope giŵatesile pamo ni ya macili gakwe, giŵalosisye Omuli piŵaliji mwenye, yilembedwe m'buku ja Mbili ja Ayimwene ŵa ku Isalaeli.

²⁸ Myoyo Omuli ŵawile nipo ŵamsicile m'malembe ku Samaliya. Nipo Ahabu mwanace jwakwe, ŵajinjile ucimwene m'malo mwakwe.

Mwenye Ahabu jwa ku Isalaeli

²⁹ Ahabu mwanace jwa Omuli ŵajinjile ucimwene ŵa ku Isalaeli mu caka ca 38 ca ucimwene wa Asa jwa ku Yuda. Nipo ŵalamulile ŵandu ŵa ku Isalaeli, ni ku Samaliya kwa yaka 22.

³⁰ Nombe najo Ahabu ŵatesile ulemwa wawukulungwa pameso pa AMBUJE, ulemwa wakupunda wuŵatesile acayimwene wosope ŵakala.

³¹ Jwalakwe nginajikutila ni gamba kulemwa mpela muŵatendele Yelobowamu, nambo jwalakwe ŵajonjecesye kutenda ulemwa pakulombela jwamkongwe lina lyakwe Yesebele, mwanace jwa Mwenye Etibala, jwa ku Sidoni, nipo ŵatandite kulambila mlungu jwa cilendo lina lyakwe Baala.*

³² Ahabu ŵataŵile nyumba jakupopelela ni ŵapanganyisye malo gakupelecela mbopesi kwa Baala, m'Nyumba jakupopelelajo, ku Samaliya.

³³ Nipo ŵaŵisile soni mlungu jwa cilendo lina lyakwe Ashela m'Nyumba jakupopelelamo. Ahabu ŵatesile ulemwa wejinji wakwatumbilisya AMBUJE, Mlungu jwa Aisalaeli, kulekangana ni ulemwa wuŵatesile acayimwene wosope ŵakala.

³⁴ Pa ndaŵi jeleji ja ucimwene wa Ahabu, Hiyele mundu jwa ku Beteli ŵataŵile soni msinda wa ku Yeliko. Nambo ndaŵi jiŵataŵaga Hiyele yilimbilimbi ja lipupa lya msindawo, mwanace jwakwe jwamlume jwandanda kupagwa, lina lyakwe Abilamu ŵawile. Ndaŵi jiŵamalisyaga kutaŵa yipata ya msindawo, mwanace jwakwe jwamlume jwakumalisya, lina lyakwe Segubu nombe najo ŵawile. Yindu yosopeyi yatendekwe mpela muŵaŵecetele AMBUJE kalakala, kupitila mwa Yoswa mwanace jwa Nuni.