1 Ayi 13 - Chiyawo Bible

¹ Lisiku line Yelobowamu ŵajimi pambali pa malo gakupelecela mbopesi ku Beteli, ŵaliji mkuliŵicila cile kutaga mbopesi.

² Mwacisisimucisya mundu jwakulocesya* jwa Mlungu ŵayice ku Beteliko, kutyocela ku Yuda mpela muŵandamulile AMBUJE.* Nipo ŵagalwesile malo gakupelecela mbopesigo, pakusala maloŵe ga ŵamlamwile AMBUJE, ŵatite, “Malo gakupelecela mbopesi agano, malo gakupelecela mbopesi agano, mpikane maloŵe ga AMBUJE, akusala kuti, ‘Mwanace jwamlume tacipagwa mwiŵasa lya Daudi,* lina lyakwe tiliciŵa Yosiya. Jwalakwejo, tacimwulajila jemanja ŵakutaga mbopesi, ŵele ŵakutumicila ni kupeleka mbopesi pa malo agano, nipo mawupa ga ŵandu tacigajoca pa malo gakupelecela mbopesi gelega.’ ”

³ Nipo mundu jwakulocesya jwa Mlungu jula ŵaŵecete soni maloŵe gakuti, “Malo gakupelecela mbopesi gelega tigacigumuka nipo liwu liticiŵa pelepo tilicimwalamwasika. Nipo timcimanyilila kuti AMBUJE aŵecete kupitila mwa une.”

⁴ Mwenye Yelobowamu piŵapikene yakuŵeceta ya mundu jwakulocesya jwa Mlungu jula, ya kusala ya malo gakupelecela mbopesi ga ku Beteli gala, jwalakwe ŵamlosisye cala ali kumalo gakupelecela mbopesi gala, mundu jwakulocesya jwa Mlungu jula, ni ŵatite, “Mumkamule!” Ndaŵi jijojo mkono uŵalocesyaga cala mundu jwakutaga mbopesi jwa Mlungu jula, wajumwile kuti gwaa, ni nganapakombola kuwuwucisya.

⁵ Ndaŵi jijojo malo gakupelecela mbopesi gala gaŵalwice cilikati, nipo liwu lilyaliji pacanya pakwe lyakusucile pasi, mpela mwele muŵaŵecetele mundu jwakulocesya jwa Mlungu jula.

⁶ Nipo Mwenye Yelobowamu ŵaŵecete ni mundu jwakulocesya jwa Mlungu jula kuti, “Conde mumbopelele kwa AMBUJE Mlungu jwenu kuti andendele canasa, kuti mkono wanguwu upole.” Mundu jwakulocesya jwa Mlungu jula ŵapopesile kwa AMBUJE, nipo mkono wa mwenye ula ŵaposile.

⁷ Papopo mwenye ŵala ŵatite kwa mundu jwakulocesya jwa Mlungu jula, “Kwende tujawule ku nyumba jangu, kuti mkalye yakulya, nipo tingampe mtuka pa yindu yimundendeleyi.”

⁸ Nambo mundu jwakulocesya jwa Mlungu jula, ŵajanjile kuti, “Atamose ali ambele hafu ja cipanje cawo cosope, une ngajenda ni ŵalakwe, kapena kulya ni kumwa ni ŵalakwe.

⁹ Pakuŵa AMBUJE andamwile kuti ngalya kapena kumwa kandu akuno, kapena kupitila soni litala lilyolyo limbitile pakwisa akuno.”

¹⁰ Myoyo mundu jwakulocesya jwa Mlungu jula, ŵapitile litala line, nganapitila soni litala liŵapitile pakwawula ku Beteli.

Mundu jwakulocesya jwamcekulupe jwa ku Beteli

¹¹ Ndaŵi jelejo ku Beteli kwaliji mkutama mundu jwakulocesya jwa Mlungu jwamcekulupe. Ŵanace ŵakwe ŵayice kukumsalila yosope yiŵayitesile mundu jwakulocesya jwa Mlungu ku Beteli lyele lisikulyo, ni yosope yiŵaŵecete kwa Mwenye Yelobowamu.

¹² Nipo mundu jwakulocesya jwa Mlungu jwa mcekulupe jula, ŵawusisye ŵanace ŵakwe ŵala kuti, “Ana apitile litala lyakwe lyapi?” Ŵanace ŵakwe ŵala ŵamlosisye litala liŵapitile mundu jwakulocesya jwa Mlungu jwakutyocela ku Yuda jula.

¹³ Ndaŵi jijojo mdala jula ŵasalile ŵanace ŵakwe ŵala kuti ataŵilile sadulo pa bulu. Ŵanace ŵala ŵataŵilile sadulojo, nipo ngalamba jila jakwesile.

¹⁴ Ngalambajo, jamkuyisye mundu jwakulocesya jwa Mlungu jwakutyocela ku Yuda jula, ni ŵajile kumsimana ali atemi pa m'bwilili, kusi kwa citela ca mtundu. Mdala jula ŵawusisye kuti, “Ana ŵalakwe ni mundu jwakulocesya jwa Mlungu jwatyocele ku Yuda?” Mundu jula ŵajanjile kuti, “Elo, ni uneji.”

¹⁵ Ngalamba jila jatite, “Kwende kumangwetu tukalye.”

¹⁶ Nambo mundu jwakulocesya jwa kutyocela ku Yuda jula ŵajanjile kuti, “Une ngakomboleka kuwujilila ni ŵalakwe, soni une ngaŵa mkulya kapena kumwa cindu cilicose ni ŵalakwe.

¹⁷ Ligongo AMBUJE andamwile une kuti ngalya kapena kumwa cindu cilicose, kapena kuwujila kumangwetu pakupitila litala linapitile pakwawula.”

¹⁸ Nambo ngalamba ja ku Beteli jila jamsalile kuti, “Une soni ndili mundu jwakulocesya mpela m'mwejo, nipo lilayika lya AMBUJE lyayice kukusalila une, kuti namjigale m'mwejo tujawule ku nyumba jangu kuti mkalye yakulya ni kumwa mesi.” Nambo ngalambaji jaliji mkuŵeceta ya unami.

¹⁹ Myoyo mundu jwakulocesya jwa Mlungu jwakutyocela ku Yuda jula, jwawujilile najo mdala jula mpaka ku nyumba jakwe, nipo ŵalile yakulya ni kumwa mesi.

²⁰ Ndaŵi jiŵaliji mkulya, AMBUJE ŵaŵecete ni jwakulocesya jwa mcekulupe juŵamwusisye mjakwe petala jula,

²¹ nipo ŵagumisile kwa mundu jwakulocesya jwakutyocela ku Yuda jula kuti, “Mpikane maloŵe ga AMBUJE, akuti nganimwapikanila AMBUJE Mlungu jwenu, ni nginimkuya lilamusi lyawo liŵalamwile.

²² M'malo mwakwe mwujilile, mlile yakulya ni kumwa mwesi pa malo gele AMBUJE giŵamsalile kuti mkaja kulya yakulya, kapena kuja kumwa mesi. Ligongo lya yindu yimtesileyi timwulajidwe, nambo mtembo wenu ngasawusika ku malembe ga acinangolo ŵenu.”

²³ Myoyo ali amasile kulya ni kumwa, ngalamba jila jataŵilile sadulo pa bulu jwa mundu jwakulocesya jwa Mlungu, jwakutyocela ku Yuda jula.

²⁴ Nipo jwakulocesya jwa ku Yuda jula, ŵawutandite ulendo. Nambo petala ŵasimene ni lisimba, ni lyamwuleje. Mtembo wa mundujo wagwilile mu msewu, nipo lisimba ni bulu jula ŵajimi mumbali mwa mtembowo.

²⁵ Ŵandu ŵane ŵiŵapitaga mu msewumo, ŵawuweni mtembo wa mundujo uli cigonele mu msewu, lisimba lili lijimi pambali pakwe. Nipo ŵapelengenye ulendo wawo, ni ŵapitaga mcasalila acimjawo ŵa mu msinda wa Beteli, ya yindu yiŵayiweni pa msewu pala.

²⁶ Jwakulocesya jwamcekulupe jula piŵapikene jele nganiji, jwatite kuti, “Mundu jwawilejo, akwenela kuŵa jwakulocesya jwa Mlungu jwakutyocela ku Yuda jula, jumkanapikanila maloŵe ga AMBUJE. Ni ligongo lyakwe AMBUJE ŵatumisye lisimba kuti limpacule ni kumwulaga, mpela muŵaŵecetele AMBUJE kuti tacitenda.”

²⁷ Myoyo ngalamba jila jasalile ŵanace ŵakwe kuti, ataŵilile sadulo pa bulu jwakwe, nipo ŵanacewo piŵamasile kutaŵilila sadulojo,

²⁸ ngalamba jila jakwesile bulujo kwawula, ni jasimene mtembo ŵa mundu jula uli ngundangunda pa msewu, lisimba ni bulu jula ali ajimi pa mbali pakwe. Lisimba nganilitawuna mtembowo kapena kumpacukulanya bulu jula, iyayi.

²⁹ Jwakulocesya jwamcekulupe jula, ŵawujigele mtembo ula, ŵawuŵisile pa bulu jwakwe, ni ŵawujile nawo ku Beteli, kuti akalile malilo ga jwakulocesya jwa ku Yuda ni kuti akawusice mtembowo m'malembe.

³⁰ Ŵawusicile mtembowo ku malembe ga acinangolo ŵakwe. Jwalakwe ni ŵanace ŵakwe pakulila ŵatiji kuti, “Ngondone mlongo mjangu! Ngondone mlongo mjangu!”

³¹ Nipo ali amsicile m'malembe, jwakulocesya jwamcekulupe jula ŵasalile ŵanace ŵakwe kuti, “Patinjiwa une, timusice mwilembe lyagonile jwakulocesya jwa Mlunguju. Timwugonece mtembo wangu pa mbali pa mtembo wakwe.

³² Une ngukulupilila kuti yosope yiŵaŵecete jwakulocesya jwa Mlungu jwa kutyocela ku Yuda, yakwamba malo gakupelecela mbopesi ga ku Beteli ni malo gosope gakulambila ga ku Samaliya, nditu tiyicitendekwa.”

Kulemwa kwa Yelobowamu

³³ Nambo atamose kuti yindu yaliji myoyo, Mwenye Yelobowamu jwa cilambo ca Isalaeli, nganaleka matala gakwe gakusakala. Ŵasagwile ŵandu wamba, ŵimkanaŵa Alefi, kuŵa ŵakutaga mbopesi, ŵiŵatumicilaga m'malo gakupelecela mbopesi giŵataŵile jwalakwe. Mundu jwalijose juŵasakaga kuŵa jwakutaga mbopesi, ŵamkundile.

³⁴ Ligongo lya ulemwa* waukulungwa welewu, liŵasa lya Yelobowamu lyajonasice lyosope, ni mtundu wakwe wosope wasimasice pa cilambo cosope capasi.