1 Ayi 12 - Chiyawo Bible

Ngosyo sya kumpoto sikumjimucila Lehobowamu

¹ Lehobowamu ŵawile ku Shekemu, kuŵasongene ŵandu wosope ŵa ku Isalaeli ŵa ku mpoto, kuti akamjinjisye ucimwene.

² Ndaŵi jelejo ni kuti Yelobowamu mwanace jwa Nebati ŵaliji ali ku Iguputo kumtila Mwenye Solomoni pa ngani ja ucimwene, nipo piŵapikene ya nganiji, jwalakwejo jwawujilile ku Iguputo.

³ Ŵandu ŵa ku Isalaeli ŵa ku mpoto ni ŵele ŵamŵilasile. Yelobowamu ni ŵandu wosope ŵajawile kwa Lehobowamu ni ŵamsalile kuti,

⁴ “Baba ŵenu Solomoni ŵatusunjile uweji mwa ngalwe, nipo ŵatukamulisye masengo mwakutukanganicisya. Nambo naga ŵalakwe ngakutukamulisya masengo mwakunonopa, ni kutusunga cenene, uwe tutwatumicile ni kuyitenda yindu yosope yitatulamule ŵalakwe.”

⁵ Lehobowamu ŵajanjile ŵanduwo kuti, “Mumbe ndaŵi kuti nganisye cenene ya ciwusyo cenu, ni mkawuje soni mtondo, kuti tinamjanje cenene.” Myoyo ŵanduwo ŵatyosile.

⁶ Mwenye Lehobowamu ŵaŵendile lunda kwa acakulungwakulungwa ŵiŵaliji apungu, ŵiŵatamaga ni Solomoni baba ŵawo, ali ciŵela umi. Ŵawusisye kuti, “Ana tangamucisye uli kuti najanje cenene ŵandu ŵeleŵa?”

⁷ Jemanjajo ŵamjanjile kuti, “Naga ŵalakwe akusaka kuti ŵatumicile ŵandu ŵeleŵa cenene, ŵatendele yindu yakwaŵendayo. Nipo tacatumicila ni kwapikanila ŵalakwe ndaŵi syosope.”

⁸ Nambo Lehobowamu nganapikanila yiŵamsalile acakulungwakulungwa ŵala, ni ŵajawile kuja kuŵenda lunda kwa acacanda acimjakwe, ŵakulya nawo yalumo, sambano ŵaliji nduna syakwe.

⁹ Ŵawusisye kuti, “Ana acimjangu timungamucisye uli?” “Ana najanje cici ŵandu ŵakumbusya une kuti naganondiye masengo gawo?”

¹⁰ Acacanda acimjakwewo ŵamjanjile kuti, “Ŵandu ŵelewo mwajanje kuti: ‘kulandanya une ni baba ŵangu, nayiweni kuti baba ŵangu, ŵaliji ŵangali macili.’

¹¹ Mwasalile soni kuti, ‘Baba ŵangu ŵamkamulisye masengo mwakumkanganicisya, nambo une tinjonjecesye kumkamulisya masengo mwakumkanganisya mnope. Baba ŵangu ŵamkwapwile ni yikoti wamba, nambo une tinamkwapule jemanja ni yikoti yana yisyano.’ ”

¹² Pali gapite masiku gatatu Yelobowamu pamo ni ŵandu wosope ŵayice kwa Mwenye Lehobowamu mpela muŵasalile kuti, “Mkawuje soni mtondo.”

¹³ Mwenyewo ŵaganyosisye maloŵe gacakulungwakulungwa gala, ni ŵajanjile ŵandu ŵala mwa cipongwe,

¹⁴ ni ŵaŵecete ni ŵanduwo pakuya yiŵamsalile acacanda acimjakwe ŵala, Ŵasalile kuti, “Baba ŵangu ŵamkamulisye masengo mwakumkanganicisya, nambo une tinjonjecesye kumkamulisya masengo mwakumkanganicisya mnope. Ŵamkwapwile ni yikoti wamba, nambo une tinamkwapule jemanja ni yikoti yana yisyano.”

¹⁵ Mwenye nganapikana kudandawula kwa ŵanduwo, pakuŵa lyaliji lisosa lyawo AMBUJE* kuti akwanilisye yiŵaŵecete kwa Yelobowamu, mwanace jwa Nebati, kupitila mwa jwakulocesya* Ahiya jwa ku Shilo.

¹⁶ Ŵa Isalaeli wosope ŵa kumpoto ali ayiweni kuti mwenye nganayipikana yakudandawula kwawo, ŵagumisile kuti, “Nganitukola mbali mwiŵasa lya Daudi!* Atutendele cici uweji jemanjaji! Sambano tukomboleka kutenda yindu yili yose yitukusaka! Ŵandu ŵa ku Isalaeli, kwendeje kumangwetu! Tumlece Lehobowamu aliloleleje jika pa liŵasa lyakwe!” Myoyo Aisalaeli ŵa mbali ja kumpoto ŵatyosile ni kwawula kumangwawo,

¹⁷ ŵamlesile Lehobowamu kuti alamulileje ŵandu ŵa m'misinda ja cilambo ca Yuda.

¹⁸ Mwenye Lehobowamu ŵamtumile Adonilamu, juŵaliji jwamkulungwa jwakulolela ŵandu ŵamasengo ŵa mwenye, kuti ajawule kwa Aisalaeli, nambo jemanjajo ŵamsomile maganga mpaka kumwulaga. Ndaŵi jijojo Mwenye Lehobowamu ŵakwesile ligeleta mwacitemacitema, ni ŵatilile ku Yelusalemu.

¹⁹ Kutandila jele ndaŵijo, Aisalaeli ŵa ku mpoto ŵalijimucile liŵasa lya Daudi, mpaka lelo jino.

²⁰ Aisalaeli wosope piŵapikene kuti Yelobowamu awujilile kutyocela ku Iguputo, ŵamtumicisye utenga kuti ayice ku msongano. Kweleko ŵamjinjisye ucimwene wakwalamulila ŵandu wosope Aisalaeli. Paliji pangali mundu jwa ku Isalaeli juŵapikanilaga ulamusi wa liŵasa lya Daudi, akaŵe ŵandu ŵa lukosyo lwa Yuda.

Kulocesya kwa Shemaya

²¹ Piŵayice Lehobowamu ku Yelusalemu, ŵasongenye ŵandu ŵa ngondo 180,000 ŵa lukosyo lwa Yuda ni Benjamini, ŵakwete nganisyo syakuti akamenyane ni ŵandu ŵa mtundu wa Isalaeli. Kuti pakutenda myoyo amwucisye jwalakwe ucimwene wakwe.

²² Nambo Mlungu ŵamsalile jwakulocesya Shemaya,

²³ kuti akapelece utenga kwa Lehobowamu ni kwa ŵandu wosope ŵa ngosyo sya Yuda ni Benjamini.

²⁴ Mkasalile kuti, “Mkajawula kumenyana ni acalongo acimjenu ŵa ku Isalaeli. Jwalijose awujile kumangwakwe, ligongo yitendekweyi yikutyocela kwa une AMBUJE.” Ŵanduwo ŵapikanile maloŵe ga AMBUJE, ni ŵawujile kumangwawo mpela muŵaŵecetele AMBUJE.

Yelobowamu akumgalawucila Mlungu

²⁵ Yelobowamu, mwenye jwa kumpoto, ŵataŵile soni msinda ŵa Shekemu ku cilambo ca matumbi ga Efelemu, ni ŵatemi kweleko. Kutyocela kweleko ŵajawile soni kuja kutaŵa msinda wa Penuwele.

^26-27 Yelobowamu ŵaliji mganisya mu mtima mwakwe kuti, “Muyiŵelele yindu sambano, naga ŵandu ŵanguŵa ngwakunda kwawula ku Yelusalemu ku Nyumba ja AMBUJE, kuja kutaga mbopesi kwa AMBUJE, mitima jawo tijiciwujila kwa Lehobowamu, mwenye jwa ku Yuda, nipo tacimbulaga.”

²⁸ Myoyo mwenyewo ali aganisisye cenene pa yele yinduyi, ŵagumbile ŵanace ŵaŵili ŵa ng'ombe ŵa golidi.* Ni ŵasalile ŵandu ŵakwe kuti, “Jemanja, Aisalaeli, mŵele mli mkwawula ku Yelusalemu kwa ndaŵi jelewu. Pangali ligongo lya kwawulila kweleko sambano, ligongo milungu jenu ni aji, jijamkopwesye jemanja kutyocela ku Iguputo.”

²⁹ Myoyo Yelobowamu ŵajigele mwanace jumo jwa ng'ombe jwagumba ni golidi, ni ŵamŵisile mu msinda wa Beteli, jwine ŵajile kumŵika mu msinda wa Dani.

³⁰ Ŵandu ŵalemwisye, pakuja kupopela ku Beteli ni ku Dani.

³¹ Yelobowamu ŵataŵile soni nyumba pa malo gakulambila, ni ŵasagwile ŵakutaga mbopesi ŵa mkanaŵa ŵa lukosyo lwa Lefi.

Kupopela ku Beteli kukulekasidwa

^32-33 Yelobowamu ŵaŵisile lisiku lya 15, lya mwesi wa msano ni jitatu, kuŵa lisiku lyakutenda cindimba Aisalaeli, mpela muŵatendelaga cindimba ku cilambo ca Yuda. Pa lyele lisikuli, Yelobowamu ŵajawulaga ku Beteli kuja kutaga mbopesi, kwa mwanace jwa ng'ombe jwa golidi juŵagumbile. Nipo kweleko ŵaŵisile ŵakutaga mbopesi pa malo gakulambila giŵataŵile kuti atumicileje.