1 Ayi 10 - Chiyawo Bible

Mwenye jwamkongwe jwa ku Sheba ŵayice kukunguluka ni Solomoni

¹ Piŵapikene mwenye jwamkongwe jwa ku Sheba mbili jakupikanika kwakwe kwa Solomoni, ŵayice ku Yelusalemu kukumlinga ni yiwusyo yakusawusya.

² Ŵayice ni ŵakutumicila ŵakwe ŵajinji, ni ngamila* sili sitwicile mituka ja yindu yakutaga mu yakulya yakununjila, golidi* jwamjinji, ni maganga ga mtengo wapenani mnope. Piŵasimene ni Mwenye Solomoni, jwalakwe ŵamwusisye yiwusyo yosope yiŵakwete mu mtima mwakwe.

³ Solomoni ŵayijanjile cenene yiwusyo yakwe yosope. Nipo paliji pangali ciwusyo cakusawusya kwa jwalakwejo, cimkanapakombola kumgopolela cenene mwenye jwamkongwejo.

⁴ Mwenye jwa ku Sheba piŵalupikene lunda losope lwa Solomoni, ni piŵajiweni nyumba jiŵataŵile jila,

⁵ ni piŵaciweni cakulya cicaliji pa tebulo jakwe, majumba gakutama nduna syakwe, kamula kwa masengo kwa ŵakutumicila ŵakwe ni yakuwala yawo, ŵakutumicila ŵakwe ŵakupelecela yakumwa, ni mbopesi syakwe siŵatagaga ku Nyumba ja AMBUJE.* Ŵagambile kuŵa kukamwa jasa, kusoŵa cakuŵeceta.

⁶ Nipo ŵamsalile Mwenye Solomoni kuti, “Yinayipikanaga ndili ku cilambo ca kumangwetu ya ŵalakwe, yakusala ya masengo gawo ni lunda lwawo, yili yakuwona.

⁷ Nambo yeleyo ngininayikulupilila, mpaka pimbice akuno ni kuyiwona ni meso gangu. Nambo nayiweni kuti ŵanduwo nganasalila atamose hafu ja yindu yosope. Lunda lwawo ni cipanje cakwete ŵalakwe yipundile ni muŵasalilaga ŵele ŵanduwo kumangwetu.

⁸ Ŵana upile aciŵamkwenu. Ŵana upile ŵakutumicila ŵenu, ŵakuŵa pameso penu ndaŵi syosope, ni kukola upile ŵakupikanila yakuŵeceta yenu ya lunda.

⁹ Acimbicikwe AMBUJE Mlungu jwenu, ŵiŵanonyele ŵalakwe, ni kwatamika ŵalakwe pa mpando wa ucimwene wa cilambo ca Isalaeli. Ligongo cinonyelo ca AMBUJE pa Aisalaeli cili cangamala, ŵaŵisile ŵalakwe kuti aŵe mwenye jwakulamulila mwakulupicika ni mwa cilungamo.”

¹⁰ Ali amasile kuŵeceta mwenye jwamkongwejo, ŵapelece kwa Mwenye Solomoni golidi jwa usito wa makilogalamu 4,000, yakununjila yakutaga mu yakulya yejinji yamitundumitundu, ni maganga ga mtengo wapenani mnope. Yakununjila yakutaga mu yakulya yiŵapelece mwenye jwamkongwe jwa ku Sheba yaliji yejinji, yele yimkanapoceleje ni kalakose Mwenye Solomoni.

¹¹ Yombo ya Mwenye Hilamu, yiyajigele golidi kutyocela ku Ofili yila, yajigele soni yitela yejinji ya alimugi ni maganga ga mtengo wapenani mnope.

¹² Ni yitela yeleyo Mwenye Solomoni ŵapanganyisye misati ja Nyumba ja AMBUJE, ni misati ja nyumba ja ucimwene. Ŵapanganyicisye soni malulimba ni pangwe ni yakwimbila yine yangonji, yakwapa ŵandu ŵakwimba. Paliji pangali yitela ya alimugi yakusalala mpela yeleyi, yiyayice kapena kuwoneka soni mcilambo ca Aisalaeli mpaka lelo jino.

¹³ Mwenye Solomoni nombe najo ŵapelece kwa mwenye jwamkongwe jwa ku Sheba jula mtuka wakapelece kwa mwenye jwine jwalijose, nambo soni ŵampele cindu cilicose ciŵaŵendile. Myoyo mwenye jwamkongwejo pamo ni ŵakutumicila ŵakwe ŵala, ŵawujile ku cilambo ca Sheba.

Cipanje ca Mwenye Solomoni

¹⁴ Caka cilicose Mwenye Solomoni ŵapocelaga golidi jwakwanila makilogalamu 23,000,

¹⁵ ngaŵalanjila golidi juŵapocelaga kutyocela ku misongo jiŵakomaga ŵandu ŵa malonda, ni juŵapelekaga mtuka acayimwene wosope ŵa cilambo ca Alebiya, ni ma bwanamkubwa ga m'maboma ga mcilambo ca Isalaeli.

¹⁶ Mwenye Solomoni ŵapanganyisye yakucijila 200 yayikulungwa ya golidi. Mu cakulicinjilicisya cilicose mwajinjilaga golidi jwakwanila ma kilogalamu msano ni gaŵili.

¹⁷ Ŵapanganyisye soni yakucijila 300 yayinondi ya golidi. Mu cakulicinjilicisya cilicose mwajinjilaga golidi jwakwanila makilogalamu gaŵili. Ŵayiŵisile yakucijila yosopeyi mcipinda cakolanjidwa kuti, Nyumba ja mu Ukweti wa ku Lebanoni.

¹⁸ Ŵapanganyisye soni mpando wawukulungwa wa ucimwene ŵa misengo ja ndembo, ni ŵawusalalisye mpandowo ni golidi jwambone mnope.

^19-20 Mpando wa ucimwenewo wakwete makwelelo msano ni limo gakuja kuyicila pa malo gakutamila, ŵaŵisile yitusitusi ya masimba yiŵili mbali syosope siŵili sya likwelelo lililyose, gakwanile masimba 12 gosope. Pa cakusamila ca mpando wa ucimwenewo, capali citusitusi ca mtwe wa ng'ombe jamkambako, wakwete soni mwakusajika makono aku nakuku, ni yitusitusi ya masimba yili yijimi mu mbali mwa yakusajika makonoyo. Pangali mpando wine wa ucimwene pa cilambo capasi waliji wakulandana ni mpando wa Mwenye Solomoni.

²¹ Migawo josope jiŵamwelaga Mwenye Solomoni jaliji jakupanganyikwa ni golidi. Yida yosope yakamulila masengo yiŵaŵisile mcipinda cakolanjidwa kuti, Ukweti ŵa Lebanoni, nombe nayo yaliji yakupanganyidwa ni golidi msyesyene. Paliji pangali yida ya kupanganyidwa ni silifa,* pakuŵa silifa nganaŵa jwa mtengo wa penani mnope pa ndaŵi ja Solomoni.

²² Solomoni ŵakwete yombo yayikulungwakulungwa soni yakulimba, yiyajendaga pa nyasa pamo ni yombo ya Mwenye Hilamu. Pakumala pa yaka yitatu yili yose yomboyo yawujaga yili yijigele golidi, silifa, misengo ja ndembo, majani ni yitumbili.

²³ Mwenye Solomoni ŵaliji ŵakusicila soni ŵalunda kwapunda acayimwene wosope ŵa pa cilambo capasi.

²⁴ Ŵandu wosope ŵa pa cilambo capasi ŵamsosaga kuti amlole Mwenye Solomoni ni kumpikanila lunda lwakwe luŵapegwile ni Mlungu.

²⁵ Jwalijose juŵayikaga kwa Mwenye Solomoni ŵayikaga ni mtuka wakwe, yindu yakupanganyidwa ni silifa ni ya golidi, yakuwala, yida ya ngondo, yakununjila yakutaga muyakulya, mahaci ni acibulu. Yeleyi yatendekwaga caka ni caka.

²⁶ Solomoni ŵakwete mageleta ga ngondo 1,400 ni mahaci 12,000. Ŵagaŵisile gane mwakuŵandikana ni mwenye mu msinda ŵa Yelusalemu, ni gane ŵagaŵisile m'misinda jine.

²⁷ Pa ndaŵi jele Solomoni ŵaliji mwenye, silifa mu msinda wa Yelusalemu jwaliji mbwe palipose mpela maganga, ni yitela ya mikungusa yaliji yejinji mpela yitela wamba ya mkuju ya mungulugulu matumbi ga cilambo ca Yuda.

²⁸ Ŵa malonda ŵa Mwenye Solomoni ŵasumaga mahaci kutyocela ku misinda ja Musili ni ku Kuwe ja mcilambo ca Alebiya.

²⁹ Ŵasumaga soni mageleta kutyocela ku cilambo ca Iguputo. Ŵasumaga ligeleta limo pa mtengo wa mbiya sya silifa 600, ni haci jimo ŵasumaga masekeli ga silifa 150. Ŵa malonda ŵa mwenyewo nombe nawo ŵasumisyaga kwa acayimwene ŵa Ahiti ni ŵa ku Siliya.