1 Ates 5 - Chiyawo Bible

Kuliŵicila cile yakwika kwa Ambuje

¹ Acalongo acimjetu pangali ligongo lyakuti namlembele ya ndaŵi jitiyicitendekwa yeleyi.

² Jemanja mwacimsyene mkumanyilila cenene kuti Ambuje taciyika ndaŵi jele mundu jwalijose akakuganicisya kuti tayice, mpela mwakusayicila jwawiyi, msyene nyumba akakuganicisya kuti jwawiyi tayice.

³ Ndaŵi jele ŵandu tacitiji. “Tuli pamtendele ni pambone,” Pelepo conasiko cicasimana mwacisisimucisya. Ticicasimana mpela mwele yayikusatiji jwamkongwe pakuyiwona yipwetesi pa ndaŵi jakuti aŵelece, nipo soni ngasapakombola kose kuti atile.

⁴ Nambo jemanja acalongo acimjangu, nganimŵa mcipi kuti lisikulyo limsisimusye mpela jwawiyi.

⁵ Paja jemanja wosope mli ŵandu ŵa mwilanguka, ni kuti musi. Uwe yetu nganiyiŵa yacilo kapena yamcipi iyayi.

⁶ Ni ligongo lyakwe sambano tukagona lugono mpela mwakusatendela ŵandu ŵane, nambo tuŵe mesope ni kuligosa.

⁷ Cilo ni cele cakasagona ŵandu nipo soni cilo ni cele cakusakolelwa.

⁸ Nambo uwe, yetu yili yamusi, tuligoseje. Tuŵe tulituwete cikulupi ni cinonyelo mpela malaja ga cisyano gakucinjilicisya pamtima, nipo cembeceyo cacikulupusyo mpela cisoti.

⁹ Pakuti Mlungu nganatusagula kuti tusimane ni lutumbilo lwakwe, nambo kuti tupate cikulupusyo mwa Ambuje ŵetu Yesu* Klistu,*

¹⁰ ŵele ŵiŵatuwilile uwe kuti tukaŵe ni umi pampepe ni Jwalakwe, ndaŵi jituli cijumi atamose tuli tuwile.

¹¹ Myoyo sambano mlimbisyaneje mtima ni kamucisyana jwine ni mjakwe, mpela mwele mumkutendelamu.

Maloŵe gambesi

¹² Tukumŵenda acalongo acimjetu, kuti mwacimbicisyeje ŵele ŵakukamula masengo pasikati penu, ŵele ŵakulongolela ni kumsalila yakwenela kutenda mu ndamo sya ciklistu.

¹³ Mwacimbicisyeje mnope ni cinonyelo ligongo lya masengo gawo. Soni mŵeje ŵamtendele pasikati penu.

¹⁴ Tukumŵenda acalongo acimjetu, kuti mwajamuceje ŵandu ŵangasaka kamula masengo, nipo ŵandu ŵakwasa mtima mwalimbisyeje, mwakamucisyeje ŵandu ŵangali macili nipo soni mtulasyeje mtima ni ŵandu wosope.

¹⁵ Mlolecesyeje kuti mundu jwine jwalijose akusawucisya cakusakala kwa mjakwe ligongo lyakuti jwalakwe atesile cakusakala, nambo ndaŵi syosope mlinjeje kwatendela acimjenu yambone ni ŵandu wosope.

¹⁶ Mŵe ŵakusangalala ndaŵi syosope.

¹⁷ Mpopeleje mwangalecesya ndaŵi syosope,

¹⁸ mumtogoleleje Mlungu muyosope yene. Pakuti yeleyi ni yakusaka Mlungu kuti myitendeje mwa Klistu Yesu.

¹⁹ Kasimlinga kose kulekasya masengo ga Msimu Ŵaswela,

²⁰ kasimganyosya maloŵe gakulalicidwa mu lina lya Mlungu.

²¹ Mlinje yindu yosope naga yili yakuwona; nipo myikamulicisyeje masengo yayili yambone

²² nipo mŵambaleje cakusakala ca mtundu uliwose.

²³ Mlungu msyene, jwele jwakusatupa mtendele, ampitikusye mtima kuti mŵe ŵakweŵakwepe. Amsunjeje ŵambumbu mu msimu, mu umi, soni mcilu, kuti cimŵe ŵangali liŵasi pakwisa Ambuje ŵetu Yesu Klistu.

²⁴ Jwalakwe jwele jwamŵilasile jemanja ali jwakulupicika, nipo tacimtendela yosopeyi.

²⁵ Acalongo acimjetu, mtupopeleleje nowe ŵakwe.

²⁶ Mpelece moni kwa acalongo acimjetu wosope mwa cinonyelo.

²⁷ Mu lina lya Ambuje ngumlamula kuti cikalataci mwaŵalanjile acalongo acimjetu wosope.

²⁸ Umbone mtima ŵakutyocela kwa Ambuje ŵetu Yesu Klistu uŵe ni jemanja.