1 Ates 4 - Chiyawo Bible

Ya umi wakumsangalasya Mlungu

¹ Pakumalisya, acalongo acimjetu tukumŵenda kusyene kuti, pakuti mwalijiganyisye kwa uwe ndamo syambone syakwenela kumsangalasya Mlungu. Nipo pakuti mkutama ni ndamo syambonesi, myoyo tukumŵenda mnope mu lina lya Ambuje Yesu* kuti mpitilisye kupunda kala.

² Pakuti mkumanyilila yindu yamkwenela kutenda yele yitwamsalile kutyocela kwa Ambuje Yesu.

³ Cakusaka Mlungu naci: mŵe ŵaswela mtima, nipo soni kuligosa ku cikululu.

⁴ Jwamlume jwalijose aŵeje jwakumanyilila kucilamula cilu cakwe, pakucicimbicisya ni kucisamala cenene, pangacisakasya.

⁵ Mkayikosya yakusaka ya cilu cenu ya usakwa, mpela mwakusatendela ŵandu ŵa mitundu jine* ŵangam'manyilila Mlungu.

⁶ Pa yeleyi, mundu jwalijose akusamlemwecesya mlongo mjakwe kapena kumlambusya. Uwe twamsalile ni kumtetela cilepe kuti Ambuje tacipeleka cilango kwa ŵandu ŵakutenda yeleyi.

⁷ Pakuti Mlungu nganatuŵilanga kuti tutendeje ya usakwa, nambo kuti tuŵe ŵaswela mtima.

⁸ Myoyo mundu jwalijose jwakugakana maloŵe gelega, ngakumkana mundupe iyayi, nambo soni akumkana Mlungu jwele jwakusapeleka Msimu ŵakwe Ŵaswela.

⁹ Kuŵeceta ya kunonyelana pasikati pa aklistu acimjenu kuli kwangasosekwa kuti jwine akamlembele. Ligongo Mlungu msyene ŵamjiganyisye jemanja mwele mumkwenela kunonyelana jwine ni mjakwe.

¹⁰ Nipo pakuti mwanonyelanaga nawo acalongo acimjenu wosope ŵa mcilambo cosope ca Masedoniya. Nambo tukumŵenda jemanja acalongo acimjetu kuti mtendeje yeleyi kupunda yimtesileje kala.

¹¹ Mlinjilile kutama umi wa mtendele, ni jwalijose asamale masengo gakwe. Mtendeje yeleyi mpela mutwamjiganyicisye mula.

¹² Pakutenda myiyi timcikola ucimbicimbi pasikati pa ŵandu ŵangakulupilila, nipo kuti jemanja mŵe ŵangajegamila kwa mundu jwalijose ku yakusoŵa yenu.

Yakwika kwa Ambuje

¹³ Acalongo acimjetu, tukusaka kuti m'manyilile ya ŵandu ŵele ŵiŵawile, kuti canasa cenu cikaŵa mpela ca ŵandu ŵane ŵele ŵali ŵangali cembeceyo.

¹⁴ Paja uwe tukusakulupilila kuti Yesu ŵawile ni kwimuka soni ku ŵawe. Myoyo tukulupilila soni kuti ŵandu ŵele ŵiŵawile ali mkulupilila Yesu, jemanjajo soni Mlungu tacajimusya ku ŵawe ni kwika nawo pampepe ni Yesujo.

¹⁵ Sambano tumsalile maloŵe ga Ambuje asyene. Uwe ŵatuciŵa cijumi mpaka kwika kwa Ambuje, ngaŵa kuti tucaleka kunyuma ŵandu ŵele ŵiŵawile ŵala uwe ni kulongolela iyayi.

¹⁶ Tipaciŵa kubangula kwa maloŵe ga jwamkulungwa jwa malayika* ni jwa lipenga lya Mlungu. Ni ndaŵi jelejo Ambuje msyene taciyika kutyocela kwinani. Ŵandu ŵele ŵiŵawile ali mkulupilila Klistu* ni ŵitacitanda kwimuka ku ŵawe.

¹⁷ Kaneko uwe ŵituciŵa cijumi, ndaŵi jelejo tucijigalwa pampepe ni jemanjajo m'mawunde kuti tukasimane ni Ambuje mwinani. Myoyo tuciŵa ni Ambuje ndaŵi syosope.

¹⁸ Myoyo sambano mlimbisyaneje mitima pakusalilana maloŵe gelega.