1 Ates 3 - Chiyawo Bible

¹ Pakumalisya, nganitupakombola kose kupilila, myoyo twaganisisye kuti tusigalile kwa Atene.

² Myoyo twamtumisye Timoteo, mlongo njetu jwakamula masengo ga Mlungu ni uweji gakulalicila Ngani Syambone* sya Klistu.* Twamtumisye kuti tamlimbisye mitima ni kumkamucisya mcikulupi cenu,

³ kogopa kuti akawoneka jwine jwalijose jwa jemanja kuwujila munyuma ligongo lya yisawusyoyi. Mwacimsyene mkumanyilila kuti Mlungu ŵakundile kuti yele yisawusyoyi yitugwile uweji.

⁴ Pajatu katema katwaliji ni jemanja pamo, twamsalile cilepe kuti tukwenela kusimana ni yisawusyo. Nipo mpela mwele mumkumanyilila, yeleyi yatendekwe.

⁵ Ni ligongo lyakwe, pinalepele kupilila namtumisye Timoteo kuti ayice kukulola muciŵelele cikulupi cenu. Pakuti najogopaga kuti mwine Satana,* jwakunyenjelela jula, ŵamnyenjelele, nipo kuti masengo getu gosope pasikati penupa tigaciŵa gangali mate.

⁶ Sambano Timoteo ayice kutyocela kumangwenuko, ni atujigalile ngani syambone ni cinonyelano cenu. Atusalile soni kuti masiku gosope mkusatukumbucilaga mwakusangalala, nipo kuti mkusasaka kuti mtuwoneje uweji, mpela mutukusasacila uweji kumlola soni jemanja.

⁷ Myoyo acalongo acimjetu, myisawusyo yetu ni kulaga kwetu kosope, cikulupi cenu ni cele citulimbisyeje mitima,

⁸ ligongo sambano kusyene tukwete umi, naga jemanja mkuŵika umi wenu mwa Ambuje Klistu mwakulimbika.

⁹ Sambano tumtogolele Mlungu jwetu ligongo lya jemanja. Tukumtogolela Jwalakwe ligongo lya lukondwa losope lutukwete pameso pakwe ligongo lya jemanja.

¹⁰ Ni mtima wosope, cilo ni musi tukusapopela kuti tuwonegane soni ni jemanja meso ni meso, ni kumpa yele yayikupelembela pa cikulupi cenu.

¹¹ Tukumŵenda Mlungu Atati ŵetu msyene, ni Ambuje ŵetu Yesu* kuti atukolocesye litala lyambone kuti tuyice kumangwenu.

¹² Ni myoyo Ambuje amjonjecesye kunonyelana kwenu, nipo soni cinonyelo cenu ca kwa ŵandu wosope, mpela mucikukulila cinonyelo cetu pa jemanja.

¹³ Myoyo Jwalakwe tacilimbisya mitima jenu kuti jiŵe jambone ni jangali magambo pameso pa Mlungu Atati ŵetu, katema kitaciyikaga Ambuje Yesu pampepe ni ŵaswela ŵakwe wosope.