1 Ates 2 - Chiyawo Bible

Ya masengo ga Paulo ku Tesalonika

¹ Acalongo acimjetu, jemanja mkumanyilila kuti ndaŵi jitwaliji ni jemanja kumangwenu kula nganijigambaga konasika cabe iyayi.

² Mpela mumkukumbucilila, kuti ŵandu ŵa ku Filipi* ŵatulagasisye ni kututendelela cipongwe. Nambope Mlungu jwetu ŵatulimbisye mitima mpaka twalalicile Ngani syakwe Syambone, atamose kuti ŵandu ŵajinji ŵasisyanaga ni uwe.

³ Pakuti yele yitwalalicilaga nganitulalicilaga ligongo lyakusaka kwiganya ya unami, kapena kuganisya yangalumbana, kapena kusaka kwalambusya ŵandu iyayi.

⁴ M'malo mwakwe, tukusalalicila ndaŵi syosope mwakusasacila Mlungu kuti uwe tulalicile, ligongo ŵatujiticisye ni kutukulupilila kuti tulalicile Ngani Syambone.* Myoyo patukulalicila ngatukusaka kusangalasya ŵandu, nambo kumsangalasya Mlungu, jwele jwakusalolecesya mitima jetu.

⁵ Jemanja mkumanyilila, kuti uwe nganituyika kumangwenu kuno ni maloŵe gawutambwali kapena ni mtima wakusaka kupindula iyayi. Pa yeleyi Mlungu ali mboni jetu.

⁶ Nganitusakaga soni ucimbicimbi wakutyocela kwa ŵandu, kapena kwa jemanja kapena soni kwa ŵanepe, atamose kuti yikakombolece kumlamula kuti mtukamucisye, pakuti uwe tuli ŵandumetume ŵa Klistu.*

⁷ Nambo twaliji ŵakuweŵa pasikati penu mpela mama jwakusamalila ŵanace ŵakwe.

⁸ Ligongo lya cinonyelo cetu pa jemanja, twaliji cile kugaŵana ni jemanja ngaŵape Ngani Syambone sya Mlungupe, nambo atamose umi wetu soni, ligongo twamnonyele mnope jemanja.

⁹ Acalongo acimjetu, ngukulupilila kuti mkukumbucila mutukamulileje mnope masengo mpaka kupela. Twakamulaga masengo cilo ni musi kuti tukamlagasya jwalijose jwa jemanja ndaŵi jitwaliji mkulalicila Ngani Syambone sya Mlungu.

¹⁰ Jemanja ni mboni syetu, Mlungu jwene ali soni mboni, kuti ndamo syetu pasikati pa jemanja ŵakulupilila syaliji syeswela, syakulungama ni syangali soni cakulemwa.

¹¹ Paja mkumanyilila kuti twamsamalilaga jwalijose jwa jemanja mpela mwakusasamalila baba ŵanace ŵakwe.

¹² Twamlimbisyaga mitima, kumsangalasya ni kumŵenda kuti ndamo syenu siŵeje syakumnonyelesya Mlungu, jwele jwakumŵilanga kuti mkajinjile mu Ucimwene wakwe wa lumbili.

¹³ Pa lyele ligongoli, tukusamtogolela Mlungu mwangalecesya. Tukusatenda yeleyi ligongo lyakuti pimwapikene maloŵe ga Mlungu gele gatwamlalicile, mwagapocele ngaŵa mpela maloŵe ga ŵandu wamba, nambo mpela mwele mugaŵelele nditu maloŵe ga Mlungu, gagakukamula masengo mwa jemanja ŵakulupilila.

¹⁴ Acalongo acimjetu, yindu yiyatendecele jemanjajo, iyoyo soni yatendecekwe ku mipingo ja Mlungu ku Yudeya, kwa ŵandu ŵali ŵakwe wa Klistu Yesu.* Paja jemanja soni ŵandu ŵakumangwenu ŵamlagasisye mpela muŵalagacisye aklistu ŵa ku Yudeya.

¹⁵ Ayudawo ni ŵaŵamwuleje Ambuje Yesu ni ŵakulocesya, nipo soni uwe ŵatulagasisye mnope. Jemanjaji ŵangasangalasya Mlungu kose, nipo akuŵengana ni ŵandu wosope.

¹⁶ Jemanjaji ŵatulekasyaga kulalicila Ngani Syambone kwa ŵandu ŵa mitundu jine syakwakamucisya kuti akulupuce. Mwakuti ndaŵi syosope agamba konjecesyajonjecesya ulemwa wawo, mwakuti sambano lutumbilo lwa Mlungu lwagwilile jemanjaji.

Paulo ŵasacile soni kwawula kwa Atesalonika

¹⁷ Acalongo acimjetu, pakandaŵi kamnono kitwalekangene kala, twaliji mkusaka mnope kuti tumwone jemanja meso ni meso. Atamose pitwatyokaga, mtima wetu waliji pa jemanja.

¹⁸ Twasakaga kuti tuyice soni kumangwenuko. Une Paulo, nalinjile kakajinji kuti yice, nambo Satana* ŵatulepelekasisye.

¹⁹ Ana pameso pa Ambuje ŵetu Yesu, cici ticiciŵa cembeceyo cetu, lukondwa lwetu, ni mbote jakuti uwe tutupocele, Ambuje Yesu pitaciyikapo? Ana ngaŵa jemanjamwe?

²⁰ Kusyene jemanja mli ŵa lumbili ni lukondwa lwetu.