1 Ates 1 - Chiyawo Bible

¹ Cikalataci cikutyocela kwa une Paulo pamo ni Sila ni Timoteo. Tukulembela mpingo wa ku Tesalonika, wele wawuli wakwe wa Mlungu Atati, nipo soni wa Ambuje Yesu* Klistu.* Umbone mtima wa Mlungu ni mtendele uŵe ni jemanja.

Ya umi wa Atesalonika ni cikulupi cawo

² Tukusamtogolela Mlungu ndaŵi syosope ligongo lya jemanja wosope nipo soni tukusamkolanga jemanja m'mapopelo getu.

³ Pakuti uwe tukusamkumbucila jemanja pameso pa Mlungu Atati ŵetu ya mwele mumkucikamulicisya masengo cikulupi cenu, soni ya mwacikumkamucisya cinonyelo cenu kukamula masengo mwakulimbangana, nipo soni ya mwele mumkusatendela lung'wanu pakwembecela Ambuje ŵetu Yesu Klistu.

⁴ Acalongo acimjetu, tukumanyilila kuti Mlungu akumnonyela jemanja nipo ŵamsagwile kuti mŵe ŵakweŵakwepe.

⁵ Paja Ngani Syambone* sitwayice nasyo kwa jemanja nganisiŵa syagamba kuŵeceta ni pakamwape, nambo twaliji mkusilalicila ni macili ga Msimu Ŵaswela nipo soni mwangakayika kose. Soni mkumanyilila mwele mututamileje sikati jenu pakusaka kuti tumkamucisye jemanja.

⁶ Jemanja mwaliji mkutusyasya uwe ni Ambuje. Atamose kuti mwayiweni yipwetesi yejinji, nambope mwapocele utengawo ni cisangalalo cakutyocela kwa Msimu Ŵaswela.

⁷ Mwamti jemanja mwaliji soni cisyasyo ca ŵandu wosope ŵakulupilila ŵa ku Masedoniya ni ŵa ku Akaya.*

⁸ Ngaŵa utengape ŵakuŵeceta ya Ambuje uwatyocele kwa jemanja ni uwajenele ku Masedoniya ni ku Akaya kosope iyayi, nambo soni utenga wakuŵeceta ya cikulupi ca jemanja mwa Mlungu ujenele palipose. Mwakuti uweji nganitukola kandu kalikose kakuti tuŵecete.

⁹ Ŵandu wosopewo akuŵeceta acimsyenepe ya yimwatesile jemanja pakutupocela uwe pitwayice kukumkungulusya pala, ni mwele mumwapitikucile kwa Mlungu pakujileka milungu jakupanganyidwa ni ŵandu, kuti mumtumicileje Mlungu msyesyene ni jwa umi,

¹⁰ ni kumlindilila mwanagwawo kuti ayice kutyocela kwinani. Mwanagwawojo ni Yesu, jwele Mlungu ŵamjimwisye ku ŵawe, soni jwele jwakutukulupusya uweji ku lutumbilo lwa Mlungu lwaluli mkwisalo.