1 Akoli 3 - Chiyawo Bible

Ŵakutumicila ŵa Mlungu

¹ Acimjangu, nginipakombola kuŵeceta ni jemanja mpela mungusimbecetela ni ŵandu ŵakwete Msimu Ŵaswela; nambo ngwenela kuŵeceta ni jemanja mpela ŵandu ŵagamba kunonyelwa ni yindu ya pasi pano, kapena kuti makandi mu umi wa ciklistu mwakulingana ni cikulupi cenu.

² Nampele m'mwejo mkaka kuti m'mwe, ngaŵa cakulya cakulimbangana kuti mlye, ligongo ngimkinimcikombola kulya. Atamose sambano jino ngimcikombola kulya,

³ ligongo lyakuti mkunonyelape yindu yapasi pano. Pasikati penu pana wiwu ni ukangani. Ana yeleyi ngayikusimicisya kuti jemanja mkupelenganya kuyinonyela ya pasi pano, soni mkusatenda mpela mwakusatendela ŵandu ŵakwamba kunonyela kutenda yindu ya pasi pano?

⁴ Pakuti naga jwine akuŵeceta kuti, “Une ndili jwakukuya jwa Paulo,” soni jwine kuŵeceta kuti, “Une ndili jwakukuya jwa Apolo,” Naga mkutenda myoyo, ana mwelemu ngaŵa mwakusatendela ŵandu ŵakudalila yindu yapasi pano?

⁵ Ana Apolo ali nduni? Nambi Paulo soni ali ŵani? Jemanjaji ali ŵakutumicila wamba ŵiŵamjigalile jemanja ku cikulupi. Jwalijose jwa jemanjaji jwagambile kukamula masengo giŵapegwile ni Mlungu.

⁶ Une napandile mbeju, nipo Apolo ŵasijitilile, nambo juŵayimelesye ni Mlungu.

⁷ Myoyo jwakupanda kapena jwele jwajitilile nganaŵa kandu, nambo akaŵe Mlungupe jwele jwakusayitendekasya kuti yimele.

⁸ Jwakupanda nganalekangana ni jwakwitilila, nipo jwalijose tacipocela mbote jakwe mwakamulana ni masengo giŵatesile.

⁹ Pakuti uwe tuli ŵakupanganya masengo ga Mlungu pampepe nipo jemanja mli mgunda wa Mlungu. Jemanja soni mli nyumba ja Mlungu.

¹⁰ Pakukamulisya masengo ukombosi uŵambele Mlungu, natesile masengo ga umisili pakuŵika yilimbilimbi, nipo jwine jwakwe ali mkutaŵa pa yilimbilimbiyo. Nambo jwalijose akwenela kusamalila ni mwele mwakutaŵila.

¹¹ Pangali yilimbilimbi yine yele mundu jwine komboleka kuyitamilisya yakulekangana ni yilimbilimbi yayiŵicidwe kala, yele yili Yesu* Klistu.*

¹² Pa yilimbilimbi yeleyi mundu komboleka kutaŵapo pakamulisya masengo golidi,* silifa,* maganga ga mtengo wapenani, matabwa ni manyasi kapena mapesi.

¹³ Masengo ga mundu jwalijose tigaciwonecela pa lisiku lyakulamula lyele tilicigalosya masengogo. Lisikulyo tiliciyika ni moto, nipo motowo tiwucilinga masengo ga mundu jwalijose.

¹⁴ Naga yiŵataŵile mundujo pa yilimbilimbiyo yikuŵa ciŵela, m'misilijo tacipocela mbote.

¹⁵ Naga moto ukoca masengo ga jwalijose, ni kuti ngasapocela mbote, msyenejo tacikulupuka ku conasiko, mpela mundu jwakulupwice pakucuwulidwa pa moto.

¹⁶ Ana ngimkumanyilila kuti jemanja mli Nyumba ja AMBUJE, nipo kuti Msimu wa Mlungu akutama mwa jemanja?

¹⁷ Naga jwalijose akujijonanga Nyumba ja AMBUJE, nombe jwalakwejo tacijonanjidwa. Pakuti Nyumba ja AMBUJE jili jeswela, nipo Nyumbajo mli jemanja.

¹⁸ Mundu jwalijose akalilambusya msyene. Naga jwine pa sikati jenu akulijigala msyene mpela jwalunda, kwambaga lunda lwa masiku aganolu, jwalakwejo akwenela kuŵa jwakuloŵela, ni cakulinga cakuti aŵe jwalunda.

¹⁹ Yele yakusayikolanga ŵandu ŵa cilambo capasi pano kuti lunda, yili yakuloŵela pameso pa Mlungu. Yili mpela muyilembedwele m'Malemba kuti, “Mlungu akusiŵatega ŵandu ŵalunda kupitila mu kukalamuka kwawo,”

²⁰ soni Malemba gakuti, “Mlungu akusamanyilila kuti nganisyo sya mundu jwakalamuka sili syakusakala.”

²¹ Ali ni ligongo lyakwe pakapagwa jwine jwalijose jwakulikwesya pameso pa ŵandu, pakuti yindu yosope yili ya jemanja.

²² Paulo, Apolo ni Kefa, cilambo capasi, umi ni ciwa, yayipali ni yele yili mkwisa msogolo yosopeyi yili ya jemanja,

²³ jemanja mli ŵakwe ŵa Klistu, nipo Klistu ali jwakwe jwa Mlungu.