Zekariah 6 - Bible Ni Thothup

Aningeg i Chariot ni pilyeg e changar ngan guy

¹ Yaney ni pilyeg e changar rog e gguy aningeg i chariot nike yib u thilin l’agruw i burey nib bronze.

² Bin m’on ko fapi chariot e bogi os ni row e be girengiy, ma bin l’agruw e bogi os nib talmor,

³ ma bin dalip e bogi os ni wechwech, ma bin aningeg e bogi os nib wupwupnun’.

⁴ Ma aram mug fith fare engel nug ga’ar, “Siro’ ngom, mang e be yip e pi chariot ney fan?”

⁵ Me ga’ar, “Irera’ fa aningeg yang i nifeng; ni kafin ra chuwgad u p’eowchen fare SOMOL ko fayleng ni polo’.”

⁶ Fare chariot ni be girengiy fapi os nib talmor e ra sorgad ko lel’och nga Babylon, ma fa tinem e os nib wech e ra sorgad ko ngal, ma fa tinem e os nib wupwupnun’ e ra sorgad ko fare nam ni bay ko yimuch.

⁷ Nap’an e yib fapi os nib wupwupnun’ ma ke guran’rad ni ngranod ngar damit niged e fayleng. Me ga’ar fare engel, “Mmarod ngam damit niged e fayleng!” — miyad yan.

⁸ Ma aram me tolul fare engel ngog ni ga’ar, “Fapi os ni kranod nga lel’och nga Babylon e kar gapasaged e damumuw rok SOMOL.”

Nta’ chiylen ni ngan te’elyawnag Joshua

⁹ I pi’ SOMOL e re thin ni ba’aray ngog.

¹⁰ Ni ga’ar, “Mu fek fapi tow’ath ni pi’ e kalbus ni Heldai, Tobijah, nge Jedayah, ngam man e chiney ko tabnaw rok Josiah nib mo’on ni fak Zefaniah. Gubin fapi cha’ ni ur kalbusgad u lan yu Babylon ni karsulod.

¹¹ Mu ngongliy ba te’elyaw ko silber nge gol ni kar pi’ed, ngam tay nga lolgen fare Prist ni Th’abi Ga’, i Joshua nib mo’on ni fak Jehozadak.

¹² Mog ngak ni be yog fare SOMOL ni Gubin ma Rayag Rok ni be ga’ar, ‘Fare mo’on ni yima pining Fare Pa’ngin ngak e bayi dammal ko gin bay riy me toy bayay fare Tempel rok SOMOL.

¹³ I ir e cha’ ni bayi toy bayay fare Tempel me yag thawon e pilung ngak, ma bay i gagiyegnag e girdi’ rok. Ma bayi sak’iy ba prist nga charen facha’ ni be gagiyeg, mar maruwelgow u ta’bang u fithik’ e gapas nge ta’reban’.’

¹⁴ Fare te’elyaw e ra par ni be puguran feni gilbugwan Heldai, Tobijah, Jedayah, nge Josiah u lan fare Tempel rok SOMOL.”

¹⁵ Pumo’on ni yad ma par nib palog e bay rabad ngar ayuwgad i toy bayay fare Tempel rok SOMOL. Ma nap’an e ra lebug e maruwel riy, migmed nang ni fare SOMOL ni Gubin ma Rayag Rok e ke l’oegeg ngomed. Yira mu’nag gubin e pin’ey ni fa’anra gimed ra yul’yul’ ngam folgad ko tin keyog SOMOL ni Got romed ni ngan rin’.