Tang Ko Pitang 6 - Bible Ni Thothup

Fapi Fager

¹ Gur e an th’abi pidorang u fithik’ e ppin, bu uw e gin ke yan gamarem ngay? Mog ngomad e ra pa’ i kanawo’ nike sor gamarem ngay, ya nge yag ni nggu ayuweged gur i gay.

Fare Pin

² En ni gamareg e ke yan ko milay’ rok, ko gin ma tugul e gek’iy ni balsam riy. Be durwi’iy e gamanman rok u milay’ ma be kunuy e flores ni giyab.

³ En ni adag rog e ba milfan ngog, ma ba milfag ngak; be durwi’iy e gamanman rok u fithik’ e giyab.

Bin lal e tang Fare Mo’on

⁴ Adag rog, rigab pidorang ni bod fel’ngin yu Jerusalem, ma bfel’usum ni bod fare binaw nu Tirzah, ga bod e pi binaw ni felel’, ni be un e fan rog ngom.

⁵ Mu chefeg e changar rom rog nga orel; ya be fek e fan rog. Piyan lolgem e be churu’ ni bod ba ran’ i kaming ni be ’og i yib nga p’ening ko burey nu Gilead.

⁶ Nguwelem e ta’reb feni wech nga ba ran’ i saf ni kafinn luknag. Dariy reb riy nib mul; ma gubin nib ta’reb foyin.

⁷ Linglingim e be mat’ ram’en u fon fagi e mad u owchem.

⁸ Ngan pag e en pilung nge yag ngak nel’ i ragag e queen, nge meruk i ragag e ppin rok nge rugod ni dabiyag i the’eg!

⁹ Ma kabm’on u wun’ug ta’reb, ni ir e bod fini pidorang ba dove. Kari mus ni ta’reb rok e chitiningin, ni ir e th’abi t’uf rok e chitiningin. Urngin e ppin ni yad ma changar ngak ma yad ma yog e sorok ngak; pi le’engin e pilung nge ku boch e ppin e yad ma yon’ tangin nib sorok.

¹⁰ Mini’ e ray nra changar ma bod ni be puf e woch? Rib pidorang ma ba gal ra’en, ni be maluplup ni gowa yal’ ara pul.

¹¹ Ku gub nga p’ening u fithik’ e gek’iy ni keal ni ngguy e gek’iy ni kafni for u loway, mug guy yuwan e grape ni kafni sum nge mak’uf ko pomegranate.

¹² Gu da’da’ make thum an’ug ngom ni bod be’ u daken e chariot nike th’ab mirin nga mit e mael.

Fapi Fager

¹³ Mu churu’! Mu churu’! Gur fare rugod nu Shulam, Ngguyed gur ni ga be churu’. Mangfan ni gimed ba’adag ni ngu’um yaliyedgag ni gu be churu’ u p’eowchen e girdi’ ni be sap?