Tang Ko Pitang 3 - Bible Ni Thothup

¹ Gubin e nep’ ni gu ra mol nga chob rog mu gu lik’aynag e cha’ ni gu ba’adag; ug sapnag fare mo’on, ma da gu pir’eg.

² Ug mogow u lan e binaw i yan, u gu th’ab e yupa’ i kanawo’ ni ba ga’ nge kanawo’ ni achig. Ni gu be sapnag e cha’ ni gu ba’adag. Ug changar i yan, ma da gu pir’eg.

³ Pi pumo’on ni matanagin e binaw e ra guyed gag. Mu gu fithrad, “Ka mu piri’egged e en ni gamareg?”

⁴ Ma yug nap’an e gu pagrad, mu gu pir’eg fare mo’on. Mu gu kol ni da kug pag nge yan nge mada’ ko ngiyal’ ni kug fek nga naun rok e chitnag, ko re senggil nni gargelegneg riy.

⁵ Mmicheged ngog, gimed e ppin nu Jerusalem; mmicheged u daken e deer nib machreg nge gazelle ni dab mmagawon niged e adag romow.

Bin dalip e tang Fare Pin

⁶ Be mang e biney ni be yib u daken e ted ni desert ni bod ba rumog ni ath, nib boni incense nge myrrh ni bfel’ bon, ni fare incense nni chuw’iy ko pi tachuway’?

⁷ Ke yib Solomon, ni yibe fek u daken tagil’ nib pilung; nel’ i ragag e salthaw ni kan yarmiy ni matnag rok, ni tin th’abi falu’ e salthaw u lan yu Israel.

⁸ Yad gubin ni yad ba salap ko saydon; ni riyad ba cheag ko mael. Ra bagyad ma bay e saydon rok, ni ka ra fal’eged rograd ko cham nma yib nnep’.

⁹ I Solomon ni Pilung e yibe fek u daken tagil’ nib pilung nni ngongliy ko tin th’abi fel e ren.

¹⁰ Ra reb e ren riy ma kan ing ko silber; ma nga daken e bay e mad riy ni kan nunuwnag ko gol. Ma gayul riy e ka ni upnguy ko mad ni purple, ni bfel’ ya’an e wup riy ni ngongliy e ppin nu Jerusalem.

¹¹ Ppin nu Zion, mired ngam guyed Solomon ni Pilung. Ke tay fare te’elyaw ko pilung ni chitiningin e tay nga daken lolgen fa rofen nmadnom ko mabgol rok, ni rofen ni felfelan’ nge puw ufan.