Psalms 98 - Bible Ni Thothup

Got e tagagiyeg ko Fayleng

¹ Nga nin’ ba tang nib be’ech ngak SOMOL; ya tin ke rin’ e rib th’abi fel’! Ba’ ni mat’aw i pa nge pa’ nib thothup e ke gelnag.

² I SOMOL e ke weliy nike gel; ke gagiyegnag kenang e pi nam gelngin e ayuw rok.

³ Ke tay u gil’ e tin ni micheg ko girdi’ nu Israel u fithik’ e yul’yul’ nge fare t’ufeg rok ngorad ni dabimus. Gubin e girdi’ u gubin yang ni ka ra guyed e gel nike tay e Got rodad.

⁴ Polo’ e fayleng mu tangnaged e felfelan’ ngak SOMOL; mu pininged e sorok ngak ko pi tang, mi gimed garusnag e felfelan’!

⁵ Mu tang niged e sorok ngak SOMOL! Mu chubeged e musik ko harp!

⁶ Mu thoyed e rappa nge yabul, mi gimed tolul’nag e felfelan’ ngak SOMOL ni pilung rodad.

⁷ Day mu chub ma ku arrogon gubin e yafos ni bay u fithik’am; Fayleng nge gubin e pi’in bay u daken mu tanggad!

⁸ Gimed e pi lul’ mu waywaygad; gimed e burey mu tanggad u ta’bang ko felfelan’ u peowchen SOMOL,

⁹ ni bochan e yib ni nge gagiyegnag e fayleng. Ir e nge gagiyegnag e girdi’ u fayleng nib mat’aw ma ba yal’uw.