Psalms 97 - Bible Ni Thothup

Got ni Ir e re tagagiyeg Nth’abi Tolang

¹ I SOMOL e pilung! Fayleng, mu felfelan’! Ngam felfelan’gad e pi donguch u lan e day!

² Manileng nge lumor nib dub’ag e ba liyeg; be gagiyeg nib mat’aw ma ba yal’uw.

³ Nifiy e be yan nib m’on rok nge urfiy e pi to’ogor rok ni kar liyeged.

⁴ Uluch rok e be gal’ e fayleng; me guy e fayleng me t’on.

⁵ Pi yochi burey e ranran ni bod e wax u p’eowchen SOMOL, u p’eowchen fare Somol ko fayleng ni polo’.

⁶ Tharmiy e be weliy feni mat’aw SOMOL, ma gubin e pi nam ni yad be guy feni maluplup’.

⁷ Ra tamra’ urngin e pi’in yad ma tayfan e pi liyos; gubin e got ni yad ra siro’ u p’eowchen SOMOL.

⁸ Ke felan’ e girdi’ nu Zion, nge pi binaw nu Judah e yad be felfelan’ ni bochan e tin ka mu tirigiliy, I gur SOMOL.

⁹ SOMOL ni Gubin ma Rayag Rok, gur e tagagiyeg ko fayleng ni polo’; ga ba ga’ ngak gubin e got.

¹⁰ I SOMOL e bt’uf rok e pi’in nib fananikay e kireb; mma ayuweg e yafos rok e girdi’ rok; ma chuwegrad u lan pa’ e pi’in kireb.

¹¹ Tamilang e be mat’ nga daken e pi’in bmat’aw, ma be felfelan’ e pi’in ba yal’uw gumircha’rad.

¹² Gimed urngin e pi’in gimed bmat’aw e nge felanmed ni bochan e n’en nike rin’ SOMOL! Mu leam niged e n’en ke rin’ Got nib thothup, mi gimed pining e magaer ngak.