Psalms 96 - Bible Ni Thothup

Got e ir fare pilung ni Th’abi Tolang

¹ Mu tang niged SOMOL nga ba tang nib be’ech! Gimed e girdi’ nu fayleng ni polo’, mu tang niged SOMOL!

² Mu tang niged SOMOL ngam pininged e sorok ngak! Gubin e rran ni ngam weliyed ngak e girdi’ fare thin ni bfel’ ni murung’agen nike mat’aw nagdad ngak!

³ Mu weliyed ngak e pi nam murung’agen gelngin, mi gimed weliy ngak urngin e pi nam e pi maang’ang nike ngongliy.

⁴ I SOMOL e ba sorok, ere thingar ni pining e sorok ngak; thangri ga’ madgun u wun’uy ngak urngin e pi got.

⁵ Urngin fapi got rok boch e nam e kemus ni bogi liyos, machane SOMOL e ir e sunumeg lanelang ni ga’ngin.

⁶ Maluplup’ nga feni rir e ke liyeg’, feni sorok nge feni gamog e ke suguy e Tempel rok.

⁷ Gimed gubin e girdi’ nu fayleng, mu pininged e sorok ngak SOMOL! Mpininged e sorok nga feni muluplup’ nge feni gel gelngin!

⁸ Mpininged e sorok nga feni maluplup fithingan SOMOL; mfeked ba maligach ngam badnag ngalan e Tempel rok.

⁹ Mu siro’gad u p’eowchen fa’anem nib Thothup ko ngiyal’ nra yib i m’ug riy; fayleng ni polo’, mu t’on u p’eowchen!

¹⁰ Mogned ngak urngin e nam ni nge lungumed, “I SOMOL e ir e pilung! Fayleng e kan tay nga tagil’ ndabiyag ni ngan mithmitheg; rib yal’uw rogon ni bayi pufthinnag e girdi’.”

¹¹ Fayleng nge lanelang, mu felfelan’gow! Day, mu chub ni ba ga’ lingam, ma ku arrogon gubin e yafos ni bay u fithik’am;

¹² mu fefelan’gad gimed gubin e pi flang, nge gubin ban’en ni bay u dakenmed! Pi gek’iy u magerger e bay ra tolul niged e felfelan’

¹³ nap’an ni bayi yib SOMOL ni nge gagiyegnag e fayleng. Bayi gagiyegnag girdi’en e fayleng nib mat’aw rogon, ma dabi laniyan’.