Psalms 95 - Bible Ni Thothup

Ba tangin e sorok

¹ Mired, ngad pininged e sorok ngak SOMOL! Ngad tang niged Got u fithik’ e felfelan’, ya ir e be yororiydad!

² Ngadbad nga p’eowchen ngad pininged e magaer ngak, ma gadad tangnag u fithik’ e felfelan’ ni gadad be pining e sorok ngak!

³ Ya SOMOL e ba Got ni gubin ma rayag rok, ir ba pilung nib gel ngak urngin e pi got.

⁴ Ir e be gagiyegnag e fayleng ni polo’, ni mus ngalan e tin th’abi toar e yiy nge mada’ ko tin th’abi tolang e burey.

⁵ Ir e be gagiyegnag lan e day, ni ir e sunumeg; ma ku er rogon e but’ ni ir e ngongliy.

⁶ Mired, ngad siro’gad ngak ngad ted fan; marod ngad ragbuggad u p’eowchen SOMOL, ni ir e sunumegdad!

⁷ I ir e Got rodad; ma gadad fapi girdi’ ni be ayuweg, ni fare ran’ i saf ni ir e be gafaliy. Mu telmed e daba’ ko thin ni be yog ni be ga’ar:

⁸ “Dab mu gel niged lanin’med, ni bod ni rin’ pi chitamangimed u Meribah, ni bod e n’en nrin’ed fa rofen nem u daken e ted u Massah.

⁹ U rom e ra sikeng niged e gumaen’ rog riy nge fanag k’adan’, ni yugu aram rogon ni kar guyed e tin gu rin’ ni fan ngorad.

¹⁰ Aningeg i ragag e duw nri gu dabuy e ngongol rok e pi girdi’ nem; i lungug, ‘Ri darir yul’yul’gad! Ya ra siyegged ni ngar rin’ed e tin ni kugog ngorad ni ngar rin’ed.’

¹¹ Gu damumuw ngar gu micheg ngorad ni lungug, “Ri dab mmarod ngalan fare nam ni ir e gu ra pi’ e toffan ngomed riy.”