Psalms 90 - Bible Ni Thothup

KAEN ANINGEG E BABYOR ( Psalms 90—106 ) Murung’agen Got nge girdi’

¹ Somol, gubin ngiyal’ ni gur e tabnaw ngomad.

² U m’on ndawor mu sunumeg e yochi burey, u m’on ndawor mu sunumeg e fayleng, ni gur ba Got ni urun, ma gur e Got ni dariy n’umngin nap’an.

³ Ga be yog ngomad ni nggu sulod ko n’en ni gu sumgad riy; ga ma pingegmad nggu sulod ko but’.

⁴ Bbiyu’ i duw e bod ta’reb e rran u wun’um; ra yan i aw u puluwom ni bod e fowap nike chuw, bod feni ngoch ba awa ko nep’.

⁵ Gur e ga ma chuwegmad ni bod e ran ni sugbur; dabi n’uw nap’anmad ni bod ba lik’ay. Gamad bod e pan ni tugul ni kadbul,

⁶ nge ga’ kaen nge puf e floras riy, me blayal’ me m’ingkowon nge mororay.

⁷ Ke ful’mad e damumuw rom; ku gu rusgad ko damumuw rom nib gel.

⁸ Kam tay e denen romad nga p’eowchem, pi denen romad nib mith e ka mu tay ko gin ga ra guy riy.

⁹ Damumuw rom e ke ngochnag e yafos romad; nap’mad be may nga bang ni bod ba kathkath.

¹⁰ Ya kemus ni medlip i ragag e duw nap’mad, ra mada’ ko meruk i ragag ni fa’anra ba gel fithik’ i dowmad; machane oloboch nge magfan’ e be yib ngomad ko pi duw nem; dar n’uw nap’an e yafos me m’ay, ma gamad chuw.

¹¹ I mini’ e ke thamiy mirin e damumuw rom nike mus nga gelngin? Mini’ e manang gelngin e marus ni yira tay ni fa’an ga ra damumuw?

¹² Mu fil ngomad feni ngoch nap’an e yafos romad, nge yag ni gu gonopgad.

¹³ A SOMOL, uw n’umngin nap’an ni ngki par e damumuw rom? SOMOL mu runguy e pi tapigpig rom!

¹⁴ Mu suguymad ni yu kadbul ko t’ufeg rom ni dabimus, nge yag ni ug tanggad ma gamad be par nib felan’mad u n’umngin nap’an e yafos romad.

¹⁵ Mpi’ ngomad e chiney e felfelan’ ni bod gelngin e kireban’ ni mpi’ ngomad u lan urngin e pi duw ni kug gafgowgad riy.

¹⁶ Mu pagmad, e pi tapigpig rom, ngu guyed e pi maruwel rom; mu gagiyegnag e pi’in ni owchemad ngar guyed gelngim nib gil.

¹⁷ SOMOL ni Got romad, mang yigi par fal’egwa’ath rom romad. Ma ga man’og nagmad ko urngin e tin bay u gu rin’ed!