Psalms 84 - Bible Ni Thothup

Tawrengnag e naun rok Got

¹ SOMOL ni Gubin ma Rayag Rok, ri ba t’uf e Tempel rom rog!

² Kari gum’ ni bochan ni ngub ngaram! Kari gum’ ni bochan ni ngu’un ngalan e yoror rok SOMOL. Polo i gag ni gu be tangnag e felfelan’ ngak fare Got ni be par ni bafos.

³ Mus ko arche’ ni sparrow ni yad ma toy taferad, ma arche’ ni swallow e bay taferad; yad ma tay pifakrad nib chugur ko pi altar rom, I gur SOMOL ni Gubin ma Rayag Rom, ni pilung rog ma Got rog.

⁴ Rib felfelan’ e pi’in yad be par u lan e Tempel rom, ni gubin ngiyal’ ni yad be yin’ tangin e sorok ngom!

⁵ Rib felfelan’ e pi’in gelngirad e gur e be yib rom, ma ba pasigan’rad ngay ni ngar milekaggad ngarbad ko burey ni Zion.

⁶ Ma yad ra yan u lan e loway nu Baka nib mlik’, me ngal’ ni bang i ban’en ni bay e ran ni alublub riy, som’on ko n’uw nma aw e ma sugnag yu yang riy ko ran.

⁷ Ra yad be yan ma yad be gel i yan, bay ra guyed fare Got ni ir e th’abi ga’ u fithik’ e pi got u Zion!

⁸ SOMOL ni Got ni Gubin ma Rayag Rom, mu rung’ag e meybil rog; Got rok Jakob, mu telim ngog!

⁹ A Got, mu ayuweg e pilung romad, ni fare pilung ni gur e mturguy ni nge pilung!

¹⁰ Ta’reb e rran ni yira par u Tempel rom ma kabfel’ nga bbiyu’ e rran nni par u bang; kug ba’adag ni nggu sak’iy u langan e garog ko naun rok e Got rog ko bin ni nggu par u tafen e girdi’ ni kireb.

¹¹ I SOMOL e ir e yoror rodad, me ir ba pilung nib maluplup, ir e ma tow’ath nagdad ko runguy nge tayfan. Der ma siyeg ban’en ni bfel’ ni nge pi’ ngak e pi’in yad be rin’ e n’en nib mat’aw.

¹² SOMOL ni Gubin ma Rayag Rom, rib felfelan’ e pi’in gur e ke lagan’rad ngom!