Psalms 83 - Bible Ni Thothup

Ba meybil ni nge waer e pi to’ogor rok yu Israel

¹ A Got, dab mu par ni kam th’ab gulngam; yug dab mu par u lom, ni dabmog ban’en!

² Amsap, pi to’ogor rom e kar chelgad kar maelgad nib togopluw ngom, ma pi’in yad be fanenikem e yad be togopluw.

³ Yad be puruy’ nib mith nib togopluw ngak e tirom e girdi’; yad be makath nib togopluw ngak e pi’in ga ma yororiyrad.

⁴ Yad be ga’ar, “Mired, ngad thirifed e re nam rorad ney, ya ngan pagtalin yu Israel ndabki yib ngan’uy bi’id.”

⁵ Me ta’reb e puruy’ rorad ngay ni ka ra ta’rebgad ni ngar togopluwgad ngom:

⁶ ni aram fapi girdi’ nu Edom nge pi Ishmaelite; nge girdi’en yu Moab nge pi Hagrite;

⁷ nge girdi’en yu Gebal, Ammon, nge yu Amalek, nge yu Filistia nge yu Tyre.

⁸ Miki chagil yu Assyria ngorad; kar manged ngak e pi Ammonite nge Moabite, pi cha’ney e pi’in owchen Lot.

⁹ Mu rin’ ngorad ni bod ni mu rin’ ngak e pi Midianite, nge Sisera nge Jabin ko fare Lul’ nu Kishon.

¹⁰ Gur e mu gel ngorad u Endor, ni mel e ldow rorad u daken e but’.

¹¹ Mu rin’ ngak e pi tayugang’ rorad e n’en nim rin’ ngak Oreb nge Zeeb; mu gel ngak gubin e pi tagagiyeg rorad ni bod ni mu gel ngak Zabah nge Zalmunna,

¹² ni fa’an ni lungurad, “Bay da feked nge milfan ngodad fare binaw nib milfan ku Got.”

¹³ A Got rog, mu weregrad ni bod e fiyath, ni bod e chabung ni changagnag e nifeng.

¹⁴ Bod e nifiy ni urfiy e loway, nge daramram ni mo’oruf e yochi burey,

¹⁵ mu tulufrad ko yoko’ ni ga ma pi’ ma ga k’aring e marus ngorad nga nifngim nib gel.

¹⁶ A SOMOL, mu upnguy owcherad ko tamra’ nge mang e yigi yag nra gayed Gur.

¹⁷ Mang e yug ra waergad miyad rus ni dariy n’umngin nap’an; mang e yugur m’ad ni rib m’ayfarad.

¹⁸ Mang e yugur nanged ni kemus ni gur e SOMOL, ni gur fare tagagiyeg Nib Th’abi Tolang u polo’ e fayleng.