Psalms 81 - Bible Ni Thothup

Ba Tangin e Madnom

¹ Mu tolul niged e felfelan’ ngak Got nma n’ufegdad; mu tang niged e sorok ngak fare Got rok Jakob!

² Mu tabab niged e musik mi gimed chubeg e tambourine; mi gimed chubeg e harp nge lyre ni bfel’ lingan.

³ Mu thoyed e rappa ni fan ko fare madnom, ko rofen ni m’ug e pul nge rofen ni ngo’on.

⁴ Irera’ e motochiyel u lan yu Israel, ni yog fare Got rok Jakob.

⁵ I pi’ ko girdi’ nu Israel nnap’an ni cham ko fare nam nu Egypt. Mu gu rung’ag ba lam ndawor gu rung’ag bi’id ni be ga’ar,

⁶ “Ku gu fek e gilab u pomed; kug fek e dug nib tomal u pa’med.

⁷ Nap’an ni yib e oloboch ngomed, mi gimed piningeg, mu gu chuwegmed u fithik’. Gu fulweg lungumed u tagl’ig ni bay u fithik’ e yoko’ nib mith. Gu sikeng nagmed ko fare alublub nu Meribah.

⁸ Mmotoyilgad, e girdi’ rog ko ngiyal’ ni gu be ginangmed; Israel, gu be athpeg ni mang e yigum motoyil ngog!

⁹ Thingar dab mu tedfan yug reb e got.

¹⁰ I gag e SOMOL ni Got romed, ni gu chuwegmed u lan yu Egypt. Mu faled langmed’, mu gu durwi’iymed.

¹¹ “Machane girdi’ rog e dar motoyilgad ngog; yu Israel e dar folgad rog.

¹² Ere ku gu pagrad ngranod u farad gel’an ngu’ur rin’ed e tin yad ba’adag.

¹³ Ri gu be athpeg ni gomang e yigi motoyil e girdi’ rog ngog; ri gu be finey ni gomang e yug ra folgad rog!

¹⁴ Ma gu ra gur nigeg ngug gel ko pi to’ogor rorad mug gad pa’ag ngak e pi’in be togopluw ngorad.

¹⁵ Pi’in yad be fanenikeg e bay ra siro’gad u fithik’ e marus u p’eowcheg; gechig rorad e dariy n’umngin nap’an.

¹⁶ Machane gu ra durwi’iymed to tin th’abi fel’ e wheat; nge honey ni yib ko war ngar mu fosgad ngay.”