Psalms 80 - Bible Ni Thothup

Ba meybil ni fen e nam ni nge sul nga rogon

¹ Gur fare tagafaliy e saf nu Israel, mmotoyil ngomad; mu rung’ag e meybil romad, gur e tagagiyeg romad. Kam par nga tagl’im ngalang ko kerubim

² mu gagyel nigem ngak e pi ganong ko Efraim, Benjamin, nge Manasseh. Mu dag gelngim ngomad! moy ngam ayuwegmad!

³ A Got, mu fulwegmad! Mu dag e runguy rom ngomad, ya nge dabi buch ban’en romad!

⁴ SOMOL ni Got ni Gubin ma Rayag Rom, bu uw n’umngin nap’an, ni ngam par ni gab damumuw ko pi meybil rok e girdi’ rom?

⁵ Kam pi’ e kireban’ ngomad ni nggu wed, nge ba kap i lu’ nib ga’ ni nggu umumed.

⁶ Kam pag e pi nam nib liyegmad ni yad be chamnag e binaw romad; ma be yog e to’ogor romad e thin ni kireb ngomad.

⁷ Got ni Gubin ma Rayag Rok, mu fulwegmad! Mu dag e runguy rom ngomad, ya nge dabi buch ban’en romad!

⁸ Kam fek ba pa’ i grape u Egypt; ka mu tuluf girdi’en e fapi nam ma ka mu yung nga daken e binaw rorad.

⁹ Kam tamilangnag mit ni nge tugul; ke yan lik’ngin nib to’ar’, ke fana’ daken e fare nam.

¹⁰ Ke taglul’nag e pi burey, ma pa’pa’ngin e ke taglulnag e pi cedar ni gagang’ kan.

¹¹ Ke yan pa’pa’ngin ke mada’ ko day ni Mediterranean fithingan, ma yan nge taw ko lul’ ni Eufrates.

¹² Mangfan ni kam buthug e yoror riy? Chiney e gubin e girdi’ ni be yan u charen e rayag ni nge iring wom’ngin;

¹³ ma be yot’yot’ e pi babiy ni malboch nga but’, ma gamanman ni malboch e be damunmun riy.

¹⁴ Got ni Gubin ma Rayag Rok, mu sul ngomad! Mu changar u tharmiy ngomad nga but’; moy ngam ayuweg e girdi’ rom!

¹⁵ Moy ngam ayuweg e re pa’ i grape ney ni mu yung, re pa’ i grape ney ni kafin mu yung ma ke ilal ke gel!

¹⁶ Pi to’ogor romad e kar paged e nifiy ngay ma kar th’abed nga but’; mu changar ngorad u fithik’ e damumuw ngam thirifrad u but’!

¹⁷ Mu ayuweg ma ga yororiy e girdi’ ni gur e mu mel’egrad, ni fare nam ni mu gagiyegnag ngi i par nib gel.

¹⁸ Ma aram e dab kug pi’ed keru’mad ngom bayay; mu taymad ni gamad bfos, ma gamad pining e sorok ngom.

¹⁹ SOMOL ni Got ni Gubin ma Rayag Rok, mu fulwegmad. Mu dag e runguy rom ngomad, ya nge dabi buch ban’en romad.