Psalms 79 - Bible Ni Thothup

Ba meybil ni fen fare nam ni ngan ayuweg

¹ A Got, ke yib boch e nam ni mael ngak e nam rom. Kar ta’ay niged fare Tempel rom nib thothup ma kar paged yu Jerusalem nike mogothgoth.

² Kar paged e ldow rok e girdi’ rom ni nge languy e arche’ ni vulture, ma kar pi’ed e ldow ko pi tapigpig rom ngak e gamanman ni malboch ni nge languy.

³ Kar pu’oged racha’en e girdi’ rom ni bod e ran nike sugbur u ga’ngin yu Jerusalem; ma dariy be’ ni magach ni nge k’eyag e yam’.

⁴ Pi nam nib liyegmad e yad be yog e thin ni kireb ngomad; yad be garus ma yad be moning nagmad.

⁵ SOMOL, ga ra par ni gab damumuw ngomad ni dariy n’umngin nap’an? Ra par e damumuw rom ni be yik’ ni bod ba nifiy ni dabital?

⁶ Mu cheleg e damumuw rom nge sap ko pi nam ni darir liyorgad ngom, nge nga daken e girdi’ ni der meybil ngom.

⁷ Ya kar thanged e pogofan rok e girdi’ rom; ma ka ra gathayed e nam rom.

⁸ Dab mu gechig nagmad ni bochan e pi denen ko pi chitamangimad kakrom. Mu runguymad e chiney; ya dakriy e lagan’ romad ngabang.

⁹ A Got, mu aywegmad nge pogofan romad; mu ayuwegmad ma ga n’agfan u wun’um e denen romad ni bochan fithingam ni nge par nib gil.

¹⁰ Mangfan ni be fithmad e pi nam, ni yad be ga’ar, “Bu uw e Got romed?” Mu gagiyegnag ngguyed ni kam gechignag e pi nam ni bochan e yad be po’ug rachaen e pi tapigpig rom.

¹¹ Mmotoyil ko gel’gel’ rok e pi kalbus, ma gelngim nib gel e ngam ayweg ngay e pi’in ni kan tay ni ngan thang e fan rorad.

¹² Somol, mu fulweg labgen ngak e pi nam ni medlip yay ni bochan urngin e thin ni kireb ni yad be rugoy ngom.

¹³ Ma aram e gamad e tirom e girdi’ e gamad e saf rom, e bay gu pininged e magaer ngom ndariy n’umngin nap’an, nge sorok i yan ngaram.