Psalms 76 - Bible Ni Thothup

Got e ir e ke Ge!

¹ Got e go’ yim nang u Judah; ma yima mathangeluwolnag fithngan u Israel.

² Tabnaw rok e bay u Jerusalem; ma ir e ma par ko Burey ni Zion.

³ U rom e t’ar e pi gan e gat’ing rok e pi to’ogor riy, nge shield nge saydon rorad, gubin talin e cham rorad.

⁴ A Got, ri gab gil, ma ri ga ba tolang rok e pi burey ni yug ma par.

⁵ Pi salthaw rorad nib m’uthan’rad e kan fek urngin e tin immoy rorad ma chiney e kar molod ni yam’; ni gelngirad nge urngin e pi salap rorad e yi go’ ke m’ayfan.

⁶ A Got rok Jakob, nap’an ni mu puwan’ ngorad, me aw e os nge pi’in nma yan u os nga but’ ni karm’ad.

⁷ Machane gur SOMOL, e go’ yibe rus ngom. Dariy be’ nrayag ni nge sak’iy u p’eowchem nnap’an ni gab damumuw.

⁸ Tiriggil rom e kamog u tharmiy kannang; me rus e fayleng me th’ab gulingan,

⁹ nap’an ni mu sak’iy ngam weliy e n’en ni ka mu tirigiliy, ni ngan ayuweg gubin e pi’in yibe gafgow nagrad u fayleng.

¹⁰ Damumuw ko girdi’ e kemus ni be gelnag feni sorom; ma pi’in de yim’ ko mael e bay ur madnom niged gur.

¹¹ Mu pi’ed ngak SOMOL ni Got romed e tin kam micheged ngak; gimed gubin e pi nam ni gimed ba chugur, mu feked e tow’ath romed i yib ngak. Got e ma gagiyegnag e girdi’ ngar rusgad ngak;

¹² ma sobut’nag lanyan’ pipifak e pilung ni tolngan’rad, ma k’ar marus ngak e pi pilung nib gel.