Psalms 75 - Bible Ni Thothup

Got ni ir e tapufthin

¹ A Got, gamad be pining e magaer ngom, gamad be og e magaer ngom! Gamad be weliy i yan feni sorom ma gamad be yog e pi maang’ang ni kam rin’.

² Got e be ga’ar, “Kug duwgiliy e ngiyal’ ni ngan pufthin, ma gu ra pufthin nib mat’aw rogon.

³ Urngin e pin’en ni bay e yafos riy nra durru’ ma fayleng e ra rur, machane bay gu duwgiliy e pi duga’ ko fayleng nib muyluy.

⁴ Gu be yog ko pi’in kireb ni dab ra ufgad;

⁵ Gu be yog ngorad ni ngar talgad ko ufanthin.”

⁶ Pufthin e der ma yib ko ngek ara ngal ara lel’och ara yimuch;

⁷ Ya Got e ir e tapufthin, nge gechignag boch me faleg wa’athan boch.

⁸ I SOMOL e ke kol ba kap nga pa’, nike sugnag e damumuw rok ni bod e wayin nib gel. Ra pu’og, ma urngin e pi’in kireb ni yad ra unum; miyad unum ni dabi aw ta’reb e wa’angchal riy.

⁹ Machane ri dab gu tal i weliy murung’agen e Got rok Jakob fa gu tal i tangnag e sorok ngak.

¹⁰ Ra buthug gelngin e pi’in kireb, machane gelngin e pi’in yad ba manigil e ra gel i yan.