Psalms 72 - Bible Ni Thothup

Ba meybil ni fan ngak e en ni pilung

¹ Got, mu fil ngak e en ni pilung rogon i turguy ban’en nib mat’aw, mu gagiyegnag nge rin’ e tin ba yal’uw ni bod gur,

² ya nge gagiyegnag e tirom e girdi’ nib yal’uw, mi i rin’ e tin nib mat’aw ngak e pi’in gafgow.

³ Mang e yigi felan’ me man’og e nam; mang e yigi e nang e nam e tin ni bmat’aw.

⁴ Mang e yigi turguy e en pilung e tin ba manigil ni fan ko pi’in gafgow; mang e yigi ayuweg e pi’in ke t’uf e ayuw rorad, me gechignag e pi’in yad be gafgow nagrad!

⁵ Mang e yigi liyor e girdi’ rom ngom u n’umngin nap’an ni bay i par e yal’ ni be mat, ngu n’umngin nap’an ni be par e pul ni be mat ram’en u reb e mfen ngu reb.

⁶ Mang e yigi par e en ni pilung ni bod e n’uw ni be aw nga daken e yungi flang, nge ran ni be tarannag e but’.

⁷ Mange yigi par ni be gel feni mat’aw u n’umngin nap’an e yafos rok, mi i man’og u n’umngin nap’an ni bay e pul ni be mat ram’en.

⁸ Gagiyeg rok e yan u bang e day nga bang e day, me tabab ko lul’ ni Eufrates nge yan i taw nga tungun e fayleng.

⁹ Girdi’ ko ted ni desert e bay ur siro’gad u p’eowchen; ma pi to’ogor rok e bay ra li’led e fiyath.

¹⁰ Pi pilung nu Spain nge pi donguch e bay ur pi’ed e tow’ath ngak; gal pilung nu Sheba ngu Seba e bay ur pi’ew e maligach ngak.

¹¹ Urngin e pilung e bay ur siro’gad ngak; urngin e pi nam ni bay ur pigpiggad ngak!

¹² Ma ayweg e pi’in gafgow ni yad ma pining, nge pi’in ke t’uf e ayuw rorad ma kan n’agrad.

¹³ Ma runguy e pi’in me’waer nge gafgow; ma ayuweg e yafos rok e pi’in ke t’uf e ayuw rorad.

¹⁴ Ma chuwegrad u fithik’ e gafgow nge cham, pogofan rorad e ri ba ga’ fan u wan’.

¹⁵ Nge par e en ni pilung nib n’uw nap’an! Mang e yugun pi’ e gol nu Sheba; mang e yugu’un meybilnag ni gubin ngiyal’; mang e yigi fal’eg Got wa’athan ni gubin ngiyal’!

¹⁶ Mang e yigi yo’or e grain u daken e nam; mang e yigi sug daken e yochi burey ko woldug, ngi i k’uf ni bod e woldug nu Lebanon. Mang e yigi sug e pi binaw ko girdi’, ni bod e pan u daken e pi flang.

¹⁷ Mang e yigi par fithingan e en pilung ni dab ni pag talin; mang e yigi par buguwan nn’umngin nap’an ni bay e yal’. Mang e yigi urngin e nam me ning ngak Got ni nge fal’eg wa’athrad ni bod nike fal’eg wa’athan e en ni pilung.

¹⁸ Ke sorok SOMOL, ni Got nu Israel! I go’ ir e ma ngongliy e pi maang’ang ney.

¹⁹ Fithingan nib gilbuguwan e ngu’un pining e sorok ngay ndariy n’umngin nap’an! Maluplup rok e mang e yigi suguy e fayleng. Amen! Amen!

²⁰ Irera’ tungun e meybil rok David nib mo’on ni fak Jesse.