Psalms 66 - Bible Ni Thothup

Ba tang ko sorok nge ogmagaer

¹ Gimed e girdi’ ni gubin, mu tolul niged e sorok u fithik’ e felfelan’ ngak Got!

² Mu tang niged feni gilbugwan fithngan; mu pininged e sorok ngak nge mus nga rogon!

³ Mu ga’ar gad ngak Got, “Rib thum’ feni manigil e pin’en ni ga ma rin’! Gelngim e rib ga’, pi to’ogor rom e yad be siro’ u fithik’ e marus u p’eowchem.

⁴ Urngin e girdi’ nu fayleng ni yad be liyor ngom; yad be yon’ tangin e sorok ngom, yad be tangnag e sorok nga fithngam.”

⁵ Mired ngam guyed e n’en ke rin’ Got; pi maang’ang nike ngongliy u fithik’ e girdi’.

⁶ Ke thilyeg e day ke ngal’ ni but’ nib mlik’; nge yan e pi chitamangidad kakrom riy u but’ nga barba’. U rom e da felfelan’gad riy ko n’en ke rin’.

⁷ Be gagiyeg ndariy n’umngin nap’an nga gelngin nrib gel ma be yaliy e pi nam. Dariy reb e pi tatogopluw nra thag ni nge togopluw ngak.

⁸ Gubin e pi nam, mu pininged e sorok ngak e Got rodad; mu pininged e sorok ngak ngan rung’ag.

⁹ Ke taydad ni ka gadad bafos, ma dawori pagdad ngad parawgad.

¹⁰ Got, gur e kam sikeng nagmad; ni bod e silber ni kan be’echnag ko nifiy, aram rogon ni kam sikeng nagmad.

¹¹ Kam pagmad kug awgad ko wup; ma kam tay e gilab nib tomal nga daken keru’mad.

¹² Kam pag e pi to’ogor romad ngar yot’yot’ed gamad; gu warod u fithik’ e nifiy nge sugbur, machane chiney e kam fekmad ko gin dabi buch ban’en romad riy.

¹³ Bay gu fek e maligach ni mo’oruf i yib ko naun rom; bay gu pi’ ngom e n’en kug micheg.

¹⁴ Bay gu pi’ ngom e n’en ni kugog ni gu ra pi’ ko fa ngiyal’ ni gu bay u fithik’ e gafgow.

¹⁵ Bay gu pi’ e saf ni ngan urfiy u daken e altar; bay gu maligach ko garbaw nge kaming, ma ath riy e bay i taw ngalan nga lanelang.

¹⁶ Mired ngam motoyilgad, gimed urngin e pi’in gimed ma liyor ngak Got, ma bay gog ngomed e tin ke rin’ ni fan ngog.

¹⁷ Gu yornag e ayuw ngak; mu gu pining e sorok ngak ko pi tang.

¹⁸ Fa’anra mang e gu sabalbalyang ko pi denen rog, ma dabi motoyil SOMOL ngog.

¹⁹ Machane, rriyul’ nike motoyil Got ngog; ke rung’ag e meybil rog.

²⁰ Gu be pining e sorok ngak Got, ya de siyeg e meybil rog, ara tel rog fare t’ufeg rok ni dabimus!