Psalms 64 - Bible Ni Thothup

Ba meybil ni fan ko ayuw

¹ Got, ku gu aw nga fithik’ e oloboch — mmotoyil ko meybil rog! Mu ayuweg e pogofan rog ya gu be rus ko pi to’ogor rog!

² Mu ayuwegneg ko pi makath rok e pi’in kireb, nge yu raba i girdi’ ni kireb e leam rorad.

³ Yad be uthum bolowtherad ni bod yungi saydon, yad be pulweg e thin ni kireb ni bod bogi gan e gat’ing.

⁴ Ri yad papey ni ngar gararegned e mululifith l’ugun rorad; yad be kirebnag e pi’in bfel’ nda rir rusgad.

⁵ Yad be pi’ lanin’rad ko pi makath rorad ni kireb; yad be weliy murung’agen e gin ngar ted e pi wup rorad riy. Ma yad be ga’ar, “Dariy be’ nrayag ni nge guy.”

⁶ Yad ma t’ar liyben e tin kireb me lungurad, “Ri bfel’ rogon ni kad ta’red liyben e re kireb ney.” Rriyul’ ni laniyan’ nge tafnay rok e girdi’ e dab nnang fan.

⁷ Machane, me pag Got e gat’ing rok ngorad, miyad maad’ad nib tomgin.

⁸ Bayi thangrad ni bochan e pi thin nem; gubin e pi’in nra guyrad miyad chichingeg lolgurad.

⁹ Ma aram e bay rrusgad ni yad gubin; bay ra leam niged murung’agen e n’en ke rin’ Got ngar welyed murung’agen e gafarig rok.

¹⁰ Gubin e pi’in nib mat’aw e bay ra felfelan’gad ni bochan e n’en ke rin’ SOMOL. Ir e bay ra pir’eged e gapas rok; Gubin e girdi’ nib manigil e bay ra pininged e sorok ngak.