Psalms 63 - Bible Ni Thothup

Tawrengnag Got

¹ A Got, i gur e Got rog, ku gum’ ni bocham. Polo’ i gag ni be yim’ ni bocham; ni bod rogon e belel nma yib, ni bod bangi binaw nike mlik, nike finey e ran.

² Mu pageg ngguyem u lan e naun rom nib thothup, mu gguy fanam gel nge fanam fla’ab.

³ T’ufeg rom ni dabi mus e kabfel’ ko yafos, ere bay gu pining e sorok ngom.

⁴ Bay ug pining e magaer ngom u n’umngin nap’an e yafos rog; bay gu pug pa’ag ngalang nggu meybil ngom.

⁵ Lanin’ug e bayi mur, me par nike manigil, bay gu tang nigem u fithik’ e felfelan’ ni gu be pining e sorok ngom.

⁶ Gu ra pageg nga but’ ma ga yib nga lanin’ug; n’umngin e nep’ ni gu be leam nigem,

⁷ ya gur e gubin ngiyal’ ni ga be ayuwegneg. Tagalul’en pom e gu be tang riy u fithik’ e felfelan’.

⁸ I gur e kug chichiiyeg ngom; ma pa’am e be teg nder buch ban’en rog.

⁹ Pi’in yad be guy rogon ni ngar thanged e fan rog e bay ranod nga’ar ko fayleng ko yam’.

¹⁰ Yira li’rad u fithik’ e mael, ma pi gamanman ni wolf e bay yib i longuy downgirad.

¹¹ En ni pilung e bayi felfelan’ ni bochan Got; ma urngin e girdi’ ni yad ma micheg ban’en nga fithingan Got, e bay ra pininged e sorok ngak machane l’ugun e pi’in yad ma lifith l’ugunrad e bay nning.