Psalms 62 - Bible Ni Thothup

Pagan’ ko ayuw rok Got

¹ Gu be gum’an nigeg gu be sonnag Got ni nge ayuwegneg; kemus ni ir e gu ma toer ngak.

² Kemus ni ir e be yororiyeg mma mat’aw nigeg ngak; ir e ma n’ufeggeg, ni dariy e n’en nra rin’ mu gu waer.

³ Bu uw n’umngin nap’an ni ngkum chamgad ngak be’ nike bod feni waer ba yoror nike m’ing?

⁴ Kemus ni gimed ba’adag ni ngam girngiyed nga but’ u tagil’ nib gil; ma bfel’ u wan’med e sasalap. Gimed ma yog e thin ni fel’faen, machane lanin’med e be gernagey.

⁵ Kemus ni Got e gu be toer ngak; ni ir ke l’agan’ug ngak.

⁶ Kemus ni ir be yororiyeg mma mat’aw nigeg ngak; ir e ma n’ufeggeg, ni dariy e n’en nra rin’ mu gu waer.

⁷ I Got e ir e ke ayuwegneg ma ke gagiyegnag kan tayfag; Ir fare yoror rog nib gel; ma ir e manaf rog.

⁸ Gimed pi girdi’eg, nge pagan’med ngak Got ni gubin ngiyal’. Mu weliyed ngak urngin e magfan’ romed, ya ir e manaf rodad.

⁹ Girdi’ ni gubin e yad bod ba wuchuth i nifeng pi tolang nge pi sobut’ e ta’reb feni dariy rogorad ngabang. Yira thabthabel nagrad, ma dariy malngirad; yad bba’ud nga ba wuchuth i nifeng.

¹⁰ Dabi pagan’med nga fanmed yargal; dabi l’agan’med ko n’en ni yibe iring; ma ku ra mun daken e fel’ rogon romed, ma dabi pagan’med ngay.

¹¹ Ke yo’oryay ni kug rung’ag nike yog Got ni gelngiy e bmilfan ngak,

¹² ma fare t’ufeg rog e dabimus. A Somol, i gur e ga ma pi’ puluwon urngin e girdi’ nib m’ag ko ngongol rorad.