Psalms 59 - Bible Ni Thothup

Ba meybil ni fan ko riya’ ni da biyib

¹ Got rog, mu chuwegeg u pa’ e pi to’ogor rog; mu yororiyeg rok e pi’in yad be cham ngog!

² Mu chuwegeg u pa’ e pi’in kireb e leam rorad; ma ga lagneg u pa’ e pi tathang e pogofan nem!

³ Musap! Yad be son nigeg ni ngar li’edgag nggum’; girdi’ nma’angach ko cham e kar barba’gad ni yad be togopluw ngog. Ni gathi bochan e denen rog ara kug rin’ ban’en nib kireb,

⁴ A SOMOL, ma ku gathi bochan e bbuch e rog u ban’en, ni aram fan ni kar fal’eged rogorad nga tagil’rad.

⁵ SOMOL, ni Got ni Gubin ma Rayag Rom, mu sak’iy ngamub mu ayuwegneg; Got rok yu Israel, mu guy nga owchem! Mu od ngam gechignag urngin e pi nam, dab mu pag bagayad e pi’in yad be t’ar liyben e kireb!

⁶ Ra blayal’ miyad sul, ni yad be tolul ni bod e pilis ma yad be gurul u lan e binaw.

⁷ Mu telim ko yaba’ ni yad be tay nge thin ni yargal. Balowtharad e bod e saydon u lan l’ugunrad, ma yad be leamnag ni dariy be’ ni be rung’ag lungrad.

⁸ Machane, gur SOMOL, e ga be minmin ngorad; ga be moningnag gubin e pi nam.

⁹ Gelngim e be pagan’ug ngay; A Got, i gur e manaf rog.

¹⁰ Got rog e gub t’uf rok ma bayib ngog; mra pageg ngguy e pi to’ogor rog ni kar mo’waergad.

¹¹ Got, dab mu li’rad, ya ri pag e girdi’ rog talin. Mu weregrad u gelngim ma ga waer nagrad, A Somol, ni tayoror romad.

¹² Denen e bay u dap’il’ugunrad, urngin e tin yad ma yog e ba sug ko denen; mang e yugu ra awgad ko pi tolngan’ rorad! Ni bochan e yad ma yibil ni nge buch wa’athan be’ ma yad ma ban,

¹³ mu thang owcharad u fithik’ e damumuw rom; mu thirifrad u but’. Ma aram me nang gubin e girdi’ ni Got e be gagiyeg u lan yu Israel, ma gagiyeg ni be tay e ke garar u ga’ngin e fayleng.

¹⁴ Ra blayal’ me sul e pi to’ogor rog, ni yad be tolul ni bod e pilis ma yad be gurul u lan e binaw,

¹⁵ ni bod e pilis ni yad be deraw i yan ni bochan e ggan ma yad be tolul ni fa’anra de gaman e tin kar pir’eged.

¹⁶ Machane, bay gu tangnag murung’agen gelngim; gubin e kadbul ma bay gu tangnag ngalang fare t’ufeg rom ni dabimus. Ya gur e kam par ni rungrung rog, ma manaf rog ko ngiyal’ nike yib e gafgow ngog.

¹⁷ Bay gu pining e sorok ngom, ya gur e ga ma n’ufegeg. Got e yoror rog, fare Got ni gub t’uf rok.