Psalms 58 - Bible Ni Thothup

Ba meybil ni nge gechignag Got e pi kireb

¹ Gimed e pi tagagiyeg, kay gu mu turguyed ban’en nib mat’aw? Ba mat’aw rogon ni gimed be pithig e oloboch rok e girdi’?

² Dangay! Ya kemus n’en nib kireb nrayag ni ngam rin’ed e gimed be leamnag, ma gimed be k’ar oloboch u lane nam.

³ Pi’in kireb e leam rorad e go’ tin kireb e yad ma rin’ nap’an e yafos rorad. yug nap’an nni gargalegrad miyad tabab ko sasalap l’ugun.

⁴ Yad ba sug ko yub ni bod e pi porchoyog; kar ninged telrad ni bod ba porchoyog ni kobra nib baling,

⁵ ni der rung’ag lungun e en ma thoy e ngal, ara tang rok fare salap ko pig.

⁶ A Got, mu tet’ar nguwolen e pi layon ni tak’ad,

⁷ Mang e yugu ra m’aygad ngabang ni bod e ran ni lul’ nge m’ay; mang e yugu notrad nga but’ ni bod e pan u kanawo’.

⁸ Mang e yugu ra boded e snail nma ranran nge ngal’ ni lamuw; mang e yugu ra boded bbitir ni yim’ ni dawor i guy ra’en e yal’.

⁹ U m’on ni dawor ra na’abgad, mi ni th’abrad nga but’ ni bod e pan; u fithik’ e damumuw rok Got e ra thirifrad u but’ ni ku yad bfos.

¹⁰ Ra felan’ e pi’in nib mat’aw ko ngiyal’ ni yad ra guy e pi tadenen ni kan gechig nagrad. yad ra maluknag e rifrif u ayrad nga racha’en e pi’in kireb.

¹¹ Bayi ga’ar e girdi’, “Pi’in nib mat’aw e rriyul’ ni kan pi pulworad; rriyul’ ni bay ba Got nma pufthinag e fayleng.”