Psalms 57 - Bible Ni Thothup

Ba meybil ko ayuw

¹ A Got, nge wurngan’um ngog, ma ga runguyeg, ya kugub ngom ni nggu naf nga tan pa’am. taglul’ u tan pom e kug naf ngay nge taw ko ngiyal’ nike m’ay e yoko’.

² Gu be pining Got, ni ir e ba Th’abi Tolang, Got nma pi’ urngin e tin bt’uf rog.

³ Ra fulweg lungug u tharmiy me ayuwegneg; bayi mo’waernag e pi’in yad be gafgow nigeg. Got e ra dag ngog e t’ufeg rok ni dabi mus nge feni yul’yul’.

⁴ Ke liyegeg e pi to’ogor, ni yad bod e layon nib talonguy e girdi’. Nguwelrad e bod bogi sarey nge gan e gat’ing; ma bolowtherad e bod yungi saydon nib m’uth.

⁵ A Got, mu dag fanam gel u lane lang, nge fal’ngim u gubin yang u fayleng.

⁶ Ke pag e pi to’ogor rog bangi nug ni nggu aw ngay; kari paraw lanin’ug. Ka ra kired ba low u lane kanawo’ rog, machane yad e kar mulgad nga langgin.

⁷ A Got, rib pagan’ug ngom; Bay gu tang nggu pining e sorok ngom!

⁸ Lanin’ug mu od! Talin e musik rog ni harp nge lyre mu odgow! Bay gu pug e yal’ nge od.

⁹ Somol, bay gu pining e magaer ngom u fithik’ e pi nam. Bay gu pining e sorok ngom u fithik’ e girdi’.

¹⁰ T’ufeg rom ni dabimus e ke dead ko tharmiy; ma fanam yul’yul’ e ke tun ngalan e lang.

¹¹ A Got, mu dag fanam gel u lane lang; nge fal’ngim u polo’ e fayleng.