Psalms 52 - Bible Ni Thothup

Gechig nge runguy rok Got

¹ Mang ni ga be uf ko kireb rom, gur e en ni yargel? Feni yul’yul’ Got e dariy n’umngin nap’an.

² Ga be t’ar liben ni nge math owchen boch e girdi’; balowthem e bod bangi resa nib m’uth. Gubin ngiyal’ ni ga ma tunguy e thin.

³ Ba t’uf e kireb rom ko fel’ ma bo’or e tin malfith ni ga ma yog ko tin riyul’.

⁴ Ga ba’adag ni ga ma kirebnag lanyan’ e girdi’ ko thin rom, gur e re mululufith langan nir!

⁵ Are Got e bayi tem ko bin but’ e fol ni dariy n’umngin nap’an; bayi tharbegem u tafnam; bayi chuwegem ko fayleng ko pi’in bafos.

⁶ Pi’in nib mat’aw e bay ra guyed e ran’ey miyad rus; ma aram e bay ra garus niged gur me lungurad,

⁷ “Muguyew, ba’aray facha’ nda i naf ngak Got ni nge ayuweg, ya i pagan’ nga feni yo’or bogi ban’en rok, ma fel’ rogon rok e ke mang yoror rok.”

⁸ Me gag e gu bod bake gek’iy ni olive ni galunglung u lane naun rok Got; Ke pagan’ug ko t’ufeg rok ni dabi mus ni manechibog ko pi chibog.

⁹ Got, bay gu pining e magaer ngom ni gubin ngiyal, ko n’en ni kam rin’; bay gu weliy u p’eowchen e girdi’ rom nri gab manigil.