Psalms 48 - Bible Ni Thothup

Zion, fare Binaw rok Got

¹ I SOMOL e ba ga’ ma ngan pining e bin th’abi tolang e sorok ngak u lan fare binaw rok e Got rodad, ngu daken e burey rok nib thothup.

² Zion e fare burey rok Got nib tolang ma ba gamog, ni fare binaw rok ba pilung nib ga’ nma pi’ e felfelan’ nga ga’ngin yang u fayleng.

³ I Got e ke dag ni ir e matnag u lan fare binaw ni kan yororiy ni fan ko mael.

⁴ I mu’ulung e pilung nga ta’bang ngarbad ni ngar chamgad ko Burey ni Zion,

⁵ ma nap’an nra guyed, me gin’anrad; miyad rus ngar milgad.

⁶ I m’agrad e marus riy nge amith u rom, ni bod be’ ni bpin ni nge gargeleg bbitir,

⁷ ni bod e pi barkow ni be yin’rad e day ko yoko’.

⁸ Kad rung’aged e n’en ke rin’ Got, ma chiney ma kadguyed u lan fare binaw rok e Got rodad, ni fare SOMOL ni Gubin ma Rayag Rok; e bayi ayweg fare binaw ni dabi buch ban’en riy bi’id.

⁹ A Got, u lan e Tempel rom, e gamad ma leamnag riy e t’ufeg rom ni dabimus.

¹⁰ Girdi’ u gubin yang e yad be pining e sorok ngom, ma bugwam e ke garer u fayleng i yan. Ga ma gagiyeg nib mat’aw;

¹¹ nge felfelan’ e girdi’ nu Zion! Ga ma pufthin nib mat’aw; nge felan’ e pi binaw nu Judah!

¹² Girdi’en Got, mmarod ngam liyeged yu Zion ngam the’eged e pi wulyang;

¹³ mu yaliyed fapi rungrung mi gimed sikengnag e pi yoror ni fan ko mael, ya ngam ga’argad ngak e bin migid e mfen:

¹⁴ “Re Got ney e Got rodad ni manechibog ko pichibog, i Ir e bayi pow’iydad e chiney i yan ngaram.”