Psalms 47 - Bible Ni Thothup

Fare pilung ni ir e th’abi ga’

¹ Girdi’en urngin e nam, mu waywaygad ko felfelan’! Mu pininged e magaer nge sorok ngak Got u fithik’ e tang ni ba ga’ lammed!

² I SOMOL, ni ir e ba Th’abi Tolang, e ngan dugow ngak; i ir ba pilung ni th’abi ga’, ni be gagiyegnag e fayleng ni polo’.

³ Ke ayuwegdad kad gelgad ngak girdi’en e pi nam, ke taydad ni ngad gagiyeg niged e pi nam.

⁴ I ir e turguy e nam ni gadad be par riy, ba nam nib uf e girdi’ rok ngay, ni girdi’ nri yad ba t’uf rok.

⁵ Got e ke yan ngalang nga tagil’! Min tolulnag e felfelan’ me thow e rappa ni be yan SOMOL ngalang!

⁶ Mu pininged e magaer nge sorok ngak Got u fithik’ e tang; mu pininged e magaer nge sorok ngak e pilung rodad u fithik’ e tang!

⁷ Got e ir e pilung ko fayleng nib polo’; mu pininged e magaer nge sorok ngak u fithik’ e tang!

⁸ Got e ke par nga but’ u tagil’ nib thothup; be gagiyegnag e pi nam.

⁹ Pi pilung ko pi nam e kar mu’ulunggad girdi’en fare Got rok Abraham. Ba gel gelngin ngak urngin raba’ e salthaw; ir e be gagiyegnag urngin ban’en!