Psalms 46 - Bible Ni Thothup

Bay Got rodad

¹ I Got e ir e manaf rodad me ir gelngidad, gubin ngiyal’ nike fal’eg rogon ke par nra yib e oloboch ngodad me ayuwegdad.

² Fa’anra rur e fayleng me muchubu’ e pi burey nga t’ay e rigur, ma dab da tamdaggad;

³ ara puw e day nga mada’ lingan ngalang, me rur e pi burey.

⁴ Bay ba lul’ ni be fek e felfelan’ i yib ko fare binaw rok Got, ko fare naun nib thothup rok fa’anem ni ir e ba Th’abi Tolang.

⁵ Got e be par u lan e re binaw nem, ndabiyag ni ngan kirebnag; ra yib i ayuweg e re binaw nem nnap’an ni fini be puf e woch.

⁶ Ke m’age marus e pi nam, ma gil’ilungun e pi pilung e ke morur; me non Got ni be chob ndirra’, me ranran e fayleng.

⁷ I SOMOL ni Gubin ma Rayag Rok e bay rodad; fare Got rok Jakob e ir e yoror rodad!

⁸ Mired, ngam guyed e n’en ke rin’ SOMOL! Mu guyed e pin’en ni yira ngat ngay nike ngongliy u daken e fayleng!

⁹ Be taleg e pi mael ni yibe tay u fayleng i yan; be t’ar e gat’ing, ma be kirebnag epi sarey nge dilak, ma be urfiy e pi shield!

¹⁰ Be ga’ar, “Mu paged e cham, mi gimed nang ni gag Got, ni gag e th’abi tolang u fithik’ e pi nam, mi gag e th’abi tolang u fayleng!”

¹¹ SOMOL ni Gubin ma Rayag Rok e bay rodad; fare Got rok Jakob e ir e yoror rodad!