Psalms 45 - Bible Ni Thothup

Ba tangin e mabgol ko pilung

¹ Yu bugithin nib manigil e ke suguy lanin’ug, nnap’an ni gu be tunguy e re tang ney ni fen fare pilung. Ba’aray ba tang u daken balowtheg ni bod e pen u pa’ be’ nib salap ko yol.

² Gur e th’abi picho’ay u fithik’ e pumo’on; ma ri ga ba salap ko welthin. Gubin ngiyal’ ni be tow’ath nigem Got.

³ Pilung ni madangdang, mm’ag e saydon rom nga lukngum; gur e bgilbugwam ma ba sorom.

⁴ Mman u fanam falu’ ngam gel ni fan ko tin riyul’ nge tin bmat’aw gelngim e ra i gel nigem ko pi mael!

⁵ Pi gan e gat’ing rom e bm’uth, ka ra kurufed gumircha’en e pi to’ogor rom; pi nam e ka ra parawgad nga charen rifrifen’em.

⁶ Fare lung nike pi’ Got ngom e ra par ni manechibog ko pichibog. Bmat’aw rogon ni ga ma gagiyegnag e girdi’ rom;

⁷ bt’uf rom e n’en ni bfel’ ma dabum e n’en nib kireb. Aram fan ni Got, ni ir e Got rom, e ke mel’egem ke pu’og e felfelan’ ni yo’or nga dakenam ni dabi ta’reb rogon ngak boch e pilung.

⁸ Florida ni myrrh nge aloe e bay ko mad rom; girdi’en e musik e yad be musik nigem u lan tafen e pilung ni kan nunuwnag ko ivory.

⁹ Pi’in rugod ni fak e pilung e yad bay u fithik’ e ppin ni yad ma par u lan e yoror rom, ma nga ba’ ni mat’aw ko chiya’ rom e ba sak’iy fare bpin ni le’engim riy, nib nunuw ko tin th’abi fel’ e gol.

¹⁰ Le’engin e pilung, mmotoyil ko n’en nggog mu pagtalin e girdi’ rom nge pi girdi’em.

¹¹ Fare pilung e ra yim’ ni bochan fanam pidorang; i ir e masta rom, ere thingar um fol rok.

¹² Girdi’ nu Tyre e bay ra feked e tow’ath rom i yib; girdi’ ni yo’or ban’en rorad e bay ra guyed rogon ni ngam adag dakenrad.

¹³ Fare rugod ni fak e en pilung e bay u lan tafen e pilung — rib pidorang! Mad rok nib n’uw e ni ngongliy ko tret nib gol.

¹⁴ Ni fek i yib ngak fare pilung ni bay u madan ni bfel’ ram’en, ni be lek e pi bpin nta’ayuw rok fare pin ni nge mabgol, ku ni fekrad i yib ko fare pilung.

¹⁵ Rabad ni yad ba felfelan’ ngalan tafen e pilung.

¹⁶ Pilung rog, gur e bayi yo’or pifakam ni pumo’on, ni ngranod nga luwan e pi chitamangim kakrom ngar manged pilung, ma bay mu gagiyeg nagrad nga rogned e thin u polo’ e fayleng.

¹⁷ Re tang rog ney e bayi gilnag bugwam u gubin e mfen, ma gubin e girdi’ ni bay ra pininged e sorok ngom e chiney i yan ngaram.