Psalms 41 - Bible Ni Thothup

Ba meybil ko m’ar

¹ Nge falan’ e pi’in ma magfan’rad ko pi’in gafgow; ya SOMOL e ra aywegrad ko ngiyal’ nike yib e oloboch ngorad.

² I SOMOL e ra yororiyrad me ayuweg e pogofan rorad; ra tayrad ni yad ba felfelan’ u daken fare but’; ma dabi n’agrad nga pa’ e pi to’ogor rorad.

³ I SOMOL e ra aywegrad ko ngiyal’ ni yad ba m’ar nge gol nagrad.

⁴ I gag e lungug, “SOMOL, kug denen nib togopluw ngom; mu runguyeg ngam gol nigeg.”

⁵ Pi to’ogor rog e yad be yogneg nga kireb. Yad ba’adag ni nggum ngan pagtalig.

⁶ Pi’in yad ma yib ni ngar guyed gag e bochan e nge chuw e thin riy; yad ma kunuy thibngig ngar weliyed i yan.

⁷ Urngin e pi’in kar fanenikayed gag e yad be gun’gun’ nigeg nga but’; tin th’abi kireb e yad ma leamnag ngog.

⁸ Me lungurad, “Dabki gol e cha’nir; dakriy bangiyal’ nra chuw u chob rok.”

⁹ Mus ko en nri gamow bpach, ni en nri ma pagan’ug ngak, ni be’ ni gamow ma abich u ta’bang, nike cheal ke togopluw ngog.

¹⁰ SOMOL, mu runguyeg ngam gol nigeg, ya nggu fulweg taban e kireb ko pi to’ogor rog.

¹¹ Ra dabiyag ni gel e pi to’ogor rog ngog, ma aram e bay gu nang ni kug fel’ u wun’um.

¹² Bay mu ayuwegneg, ni bochan e gu be rin’ e n’en ni bfel’; bay um teg u p’eowchem ni dariy n’umngin nap’an.

¹³ Ngan pining e sorok ngak SOMOL, ni fare Got rok yu Israel! Ngan pining e sorok ngak e chiney i yan ngaram ndariy n’umngin nap’an! Amen! Amen!