Psalms 39 - Bible Ni Thothup

Ba meybil ko kalngan’ rok be’ nike gafgow

¹ Mug ga’ar, “Bay gu kol’ayuw ko n’en ni gu be rin’ ma dab gu pag bolowtheg nge k’aring e denen ngog; Bay gu par ni dab gog ban’en, u charen e girdi’ nib kireb.”

² Kug th’ab gulungag, nda gog ta’ab bugithin, mus nga ban’en ni bfel’ mda gog! Machane, mi ri gel boch e gafgow ngog,

³ ma ke li’eg e magfan’. Fane almarin ni gu be leam, ma aram feni gel ni gu be gafgow; ma dakiyag rog ni dab gu fith ni ngug ga’ar:

⁴ “SOMOL, bu uw n’umngin nap’an ni ngku’ug par ni gub fos? Wu’in e nggum’? Mog ngog ko uw feni ke chugur ni nge mus e yafos rog.”

⁵ Karim ngochnag nap’an e yafos rog! Dariy n’umngin nap’an e yafos rog u pulwom. Rriyul’ ni gubin e girdi’ nib fos e gowa ba wuchuth i nifeng,

⁶ ni bod fon ban’en ni pel u owchey. Gubin e n’en ni yima rin’ ma dariyfan; gadad be kunuy e machaf, machane dad nanged ko mini’ e ra fla’ab riy.

⁷ Somol, ere mang e ku rayag ni nge l’agan’ug ngay? Gur e ke l’agan’ug ngom.

⁸ Mu chuwegeg u fithik’ urngin e pi denen rog, ma dab mu pag e pi’in balyang ngar gosgos nigedgag.

⁹ Bay gu th’ab gulngag, ni ta’ab bugithin ma dab gog, ya gur e kam teg ni ngug gafgow ni aray rogon.

¹⁰ Mu tal i gechig nageg! Aram e nggum’ u marin e dumow rom.

¹¹ Ga ma gechig nagmad nib gel ni bochan e pi denen romad. Ga ma gathay e n’en nib t’uf romad ni bod e ngal. Rriyul’ ni girdi’ e bod ba wuchuth i nifeng!

¹² SOMOL, mu rung’ag e meybil rog, ma ga telim ko meyor rog; moy ngam ayuwegneg u nap’an ni gu ra yor. Bod urngin e pi chitamangig kakrom kemus ni gu ba milekag ni ku gub ngom bochingiyal’.

¹³ Mu pageg nggu par rog nge yag ni yiggu felfelan’ bochu’uw u m’on ni nggum’ nggu chuw.